Read Библија, Константинов Осија 13 Bible Online

Осија 13 - Библија, Константинов bible

Осија 13

¹Кога зборуваше Ефрем, задаваше страв, зашто тој беше првенец во Израел, но згреши со Ваала и загина.

²И сега уште грешат тие правејќи си идоли од сребро, идоли според својата замисла: сите тие се дело на ракотворец! Ним - велат - жртвувајте им, луѓето нека ги целиваат телињата!

³Затоа тие ќе бидат како утрински облак, како роса што ја снемува бргу, како плева разнесена од гумното, како дим што излегува низ отворот.

⁴А Јас Сум Господ, твој Бог сè од Египетската Земја: не љуби друг Бог освен Мене! Нема Спасител освен Мене.

⁵Јас те љубев во пустината, во сувата земја.

⁶Јас ги пасев, и беа сити; наситените срца им се вообразија; и така Ме заборавија.

⁷Затоа ќе им бидам како лав, како леопард што дебне на патот;

⁸како мечка на која и ги грабнаа мечињата, Јас ќе се фрлам на нив, ќе им ги раскинам градите до срцето; како лав ќе го изедам нивното месо, полските ѕверови ќе ги растргаат.

⁹Ќе те уништам, Израелу, и кој ќе ти помогне?

¹⁰Та каде ти е царот за да те спаси, каде се твоите кнезови за да те бранат - оние за кои зборуваше: „Дај ми цар и кнезови!”

¹¹Во Својот гнев ти дадов цар, и во расрденост ти го земам.

¹²Добро се чува Ефремовото беззаконие, неговиот грев добро е пазен во скривалиште.

¹³Врз него дојдоа родилни болки, ама тој е лудо чедо, не излегува на време од мајчината утроба!

¹⁴Јас ќе ги избавам од власта на пеколот, ќе ги спасам од смртта! Смрт, каде е твоето осило? Гробу, каде е твојата победа? За тоа нема да се покајам.

¹⁵Така е плоден Ефрем меѓу браќата, но ќе дојде источен ветер, Господов ветер од пустината: ќе му ги исуши изворите, ќе му ги пресуши кладенците, ќе му ја ограби ризницата, ќе му го однесе благото.

¹⁶Самарија ќе биде запустена зашто се побуни против Својот Бог. Тие ќе паднат од меч, нивните младенци ќе бидат погубени, ќе им ги распорат нивните трудни жени.