Read Библија, Константинов Осија 6 Bible Online

Осија 6 - Библија, Константинов bible

Осија 6

¹„Ајде да му се вратиме на Господа! Тој раскина, Тој ќе не исцели: Тој нè рани, Тој ќе ни ги завитка раните;

²по два дни ќе нè оживее, на третиот ден ќе нè подигне, и ние ќе живееме пред Него.

³Да се стремиме да Го запознаеме Господа; како утринската зора е Неговото јавување. Тој ќе ни дојде како есенски дожд, како пролетен дожд што ја натопува земјата.”

⁴Што можам да сторам за тебе, Ефреме? Што можам да сторам за тебе, Јудо? Вашата побожност е како утрински облак, како рана роса што ја снемува.

⁵Затоа ги сечев преку пророците и ги убивав со зборовите на Својата уста; но Твојот суд ќе излезе како светлина.

⁶Зашто милоста ја сакам, а не жртви, и познавањето на Бога, повеќе од палениците.

⁷Но тие како Адама го прекршија заветот и таму Ме изневерија Мене.

⁸Галад е злосторнички град, полн со крвави траги.

⁹Свештеничката дружба е како разбојничка заседа: убиваат по Сихемскиот Пат; навистина, прават срам!

¹⁰Ужас видов во Израелевиот дом; таму Ефрем му се предава на блудството и се обесветува Израел.

¹¹И тебе, Јудо, ти одредив жетва, кога ќе ја свртам судбината на Својот народ.