Read Библија, Константинов Осија 9 Bible Online

Осија 9 - Библија, Константинов bible

Осија 9

¹Не радувај се, Израелу, не воскликнувај како другите народи; му се предаде на блудството, зашто, откако го остави Својот Бог, ја засака блудничката плата по сите гумна.

²Ни гумното ни кацата не ќе ги хранат, и младото вино ќе ги измами.

³Не ќе живеат веќе во Господовата Земја, Ефрем ќе се врати во Египет и ќе јадат нечисти јадења во Асир.

⁴Не ќе Му налеваат веќе вино на Господа, ниту ќе Му ги принесуваат своите жртви; лебот ќе им биде како леб на жалост, и ќе биде нечист кој ќе го јаде; зашто нивниот леб е само за нив, нема да влезе во Господовиот Дом.

⁵Што ќе правите во празничен ден, во денот на Господовиот собир?

⁶Зашто, еве како отидоа пред запустувањето; Египет ќе ги прифати, Мемфис ќе ги погребе, копривата ќе ги наследи нивните сребрени блага, нивните шатори ќе зарастат во трње.

⁷Дојдоа деновите на казната! Дојдоа деновите на одмаздата! Израел нека знае! Пророкот е луд, вдахновениот блада! Заради твоето големо беззаконие и заради големата омраза.

⁸Ефрем е стражар покрај Мојот Бог; пророкот - стапица за птици на сите негови патишта, соблазна - во куќата на неговиот Бог.

⁹Паднаа во длабока расипаност како во деновите на Гаваја; Господ ќе си спомне за нивните беззаконија и ќе ги казни нивните гревови.

¹⁰Го најдов Израел како грозје во пустината, ги видов вашите татковци како ран плод на смоквата; тие дојдоа во Вел Фегор, му се посветија на срамот и станаа грозотии како нивните љубимци.

¹¹Ефремовата слава одлета како птица: од раѓањето, од утробата, од зачнувањето.

¹²Но иако ги одгледаат своите синови, ќе ги одземам пред добата на мажеството, да, тешко им ним кога ќе ги оставам!

¹³Ефрем е како да го гледам Тир посаден во нива, но Ефрем ќе ги води своите деца на колење.

¹⁴Дај им, о Господи! А што да им дадеш? Дај им утроба што не раѓа, исушени гради.

¹⁵Во Галгал е сета нивна злоба, таму ги замразив. Заради нивните лоши дела, ќе ги истерам сите од Својата куќа, не ќе ги љубам веќе, сите кнезови им се одметници.

¹⁶Ефрем е поразен, им се исуши коренот; не ќе има род. И ако им се родат деца, ќе им го умртвам милиот плод на утробата.

¹⁷Мојот Бог ќе ги отфрли зашто не Го послушаа; и ќе скитаат меѓу народите.