Read Библија, Константинов Амос 2 Bible Online

Амос 2 - Библија, Константинов bible

Амос 2

¹Господ зборува вака: „За три злосторства на Моав, за четири злодејства, одлуката е неотповиклива: зашто коските на едомскиот цар ги спалија во вар.

²Ќе пуштам оган на Моав за да ги изгори кариотските дворци, а Моав ќе умре во метеж, со бојна врева и со звукот на труба;

³ќе го истребам судијата во него и ќе ги умртвам сите кнезови со него,” говори Господ.

⁴Господ зборува вака: „За три злодејства на Јуда, за четири злосторства, одлуката е неотповиклива: зашто го отфрлија Господовиот Закон и не се придржуваа за Неговите одредби; ги заведоа лажните богови по кои одеа нивните татковци,

⁵ќе пуштам оган на Јуда, за да ги изгори ерусалимските дворци.”

⁶Господ зборува вака: „За три злостори, за четири злодејства, одлуката е неотповиклива: зашто го продаваа праведникот за сребро и бедниот за лесни обувки;

⁷зашто газат по главата на сиромавиот, и бедните ги водат на зло. Синот и таткото одат кај истата девојка за да го обесветат Моето свето име;

⁸и врз облеките земени во залог лежат покрај секој жртвеник; и пијат вино на обвинетите во домот на своите богови.

⁹Јас ги истребив пред нив Аморејците високи како кедар, силни како дабјето, Јас го уништив и плодот на нив и коренот под нив.

¹⁰Јас ве изведов од Египетската Земја и четириесет години ве водев по пустината за да ја завладеете Аморејската Земја.

¹¹Јас издигнав пророци од вашите синови и назирејци меѓу вашите младинци. Не е ли така, Израелеви синови?” говори Господ.

¹²„Но вие ги натеравте назирејците да пијат вино, а на пророците им заповедавте: ‘Не пророкувајте!’

¹³Ете, Јас ќе ве притискам до земјата, како што притиска кола полна со снопје,

¹⁴не ќе има богатство за брзиот, силата не ќе го зацврсти силниот, јунакот не ќе се спаси,

¹⁵стрелецот не ќе се додржи, итриот тркач нема да избега, ниту јавачот ќе побегне,

¹⁶најхрабрите јунаци ќе бегаат голи во оној ден,” говори Господ.