Read Библија, Константинов Амос 5 Bible Online

Амос 5 - Библија, Константинов bible

Амос 5

¹Чујте го ова слово што го изнесувам против вас, тажачката, Израелев доме:

²Падна и веќе не стана израелската девица. Таа лежи на своја земја, и нема никој да ја дигне.

³Зашто Господ Бог му зборува вака на Израелевиот дом: „Во градот од кој излегуваа илјада, ќе останат сто, од кој излегуваа сто, ќе останат десет.”

⁴Зашто Господ му зборува вака на Израелевиот дом: „Барајте Ме Мене и ќе живеете.

⁵Не барајте го Ветил, не одете во Галгал, не патувајте во Вирсавеа, зашто Галгал ќе биде одведен во ропство, а Ветил ќе се претвори во ништо.

⁶Барајте Го Господа и ќе живеете, или како оган ќе ја зафати Јосифовата куќа и ќе ја изгори, а во Ветил не ќе има никој да го угасне пламенот.

⁷Тешко им на оние кои ја претворуваат правдата во пелин, кои ја фрлаат чесноста во прав!”

⁸Тој ги направи Плеадите и Орион, Тој го обрнува мракот во зора, а денот во најгуста ноќ. Тој ги повикува морските води и ги излева преку лицето на земјата. Господ Му е името.

⁹Одненадеж и праќа гибел на крепоста и и носи пропаст на тврдината.

¹⁰Го мразат човекот што дели правда при вратата, и го корат оној што зборува чесно.

¹¹Затоа, бидејќи го угнетувате сиромашниот, истргнувајќи од него данок во жита, во куќите што ги создадовте од делкан камен никогаш не ќе живеете; од пријатните лозја што ги посадивте никогаш не ќе пиете вино.

¹²Зашто знам многу ваши злостори, и вашите преголеми гревови. Го угнетувате праведникот и примавте поткуп, одбивајќи го сиромашниот при градската врата.

¹³Мудрецот молчи во ова време, зашто времињата се толку лоши.

¹⁴Барајте го доброто, а не злото, за да живеете, и за да биде Господ, Бог над Воинствата, навистина со вас како што велите дека е.

¹⁵Мразете го злото, љубете го доброто, пазете ја правината, при градската врата, па можеби Господ, Бог над Воинствата, ќе му се смилува на Јосифовиот остаток.

¹⁶Затоа Господ зборува вака, Бог над Воинствата, Господ: „На секоја улица ќе има плач: По сите патишта ќе викате: ‘Леле! Леле!’ Ќе ги повикаат земјоделците за да лелекаат, тажачите за да тажат,

¹⁷ќе има плач во секое лозје, зашто ќе поминам сред тебе,” говори Господ.

¹⁸Тешко ви вам што копнеете по Господовиот ден! Што ќе ви биде Господовиот ден? Темнина, а не светлина.

¹⁹Ќе ви биде како на оној што и избега на лавската уста, а мечката го сретна; како оној што влезе во куќа и ја стави раката на ѕид, а змија го касна.

²⁰Не ќе ли биде Господовиот ден темнина, а не светлина? Мрак, а не сончев блесок?

²¹„Ги мразам и ги презирам вашите празници и веќе не ми се мили вашите свечености.

²²Кога ми принесувате паленици, вашите лебни приноси не Ми се мили, на жртвата благодарница од вашите згоени телиња и не погледнувам.

²³Отстранете го од Мене шумот на своите песни, не сакам да ги слушам звуците на вашите псалтири.

²⁴Правдата нека потече како вода, и справедливоста како силна буица.

²⁵Дали Ми принесувавте жртви и приноси во пустината четириесет години, Израелев доме?

²⁶Ќе го носите Сикут, својот цар, и Кеван, својот бог, ѕвездата на твоите богови, што си ги направивте за себе.

²⁷Затоа ќе ве преселам во Дамаск,” зборува Господ; Бог над Војските е името Негово.