Read Библија, Константинов Броеви (4 Moj.) 12 Bible Online

Броеви (4 Moj.) 12 - Библија, Константинов bible

Броеви (4 Moj.) 12

¹А Маријам и Арон почнаа да зборуваат против Мојсеја заради неговата жена Етиопка, за која се ожени, зашто беше зел за жена една Етиопка.

²„Зар Господ му зборува само на Мојсеја? - рекоа. - Зар не ни зборуваше и нам?” Господ го чу тоа.

³Мојсеј беше мошне скромен човек, најскромен човек на земјата.

⁴И Господ им рече веднаш на Мојсеја, на Арона и на Маријам: „Вие тројцата јавете се во Шаторот на средбата.” Тие тројца се јавија.

⁵Господ слезе во облачен столб и застана при влезот на Шаторот. Ги повика Арона и Маријам. Кога тие истапија напред,

⁶Господ рече: „Чујте ги Моите зборови: Ако се најде пророк среде вас, Јас му се јавувам нему во видение, му говорам на сон.

⁷Но не е така со Мојот слуга Мојсеј. Од сите во Мојата куќа тој е најверен.

⁸Јас му зборувам нему уста во уста, јавно, а не со гатанки, и тој смее да го гледа Господовиот лик. Како тогаш не се плашевте да зборувате против Мојот слуга Мојсеја?”

⁹Откако пламна со гнев против нив, Господ си отиде.

¹⁰Штом облакот се оддалечи од Шаторот, ете, Маријам стана лепрозна, како потурена со снег. Арон се сврте кон Маријам, а лепрата беше на неа.

¹¹Тогаш Арон му рече на Мојсеја: „Господару мој, не сметај ни за грев, зашто постапивме глупо и согрешивме.

¹²Не оставај таа да остане како мртво дете на кое, веќе при излегувањето од мајчината утроба, снагата му е напола уништена!”

¹³Тогаш Мојсеј извика кон Господа: „Боже, Те молам, оздрави ја!”

¹⁴„Ако нејзиниот татко и плукнал во лицето - Господ му рече на Мојсеја - зар не ќе требаше да се срами седум денови? И таа нека биде одвоена надвор од логорот седум денови, па потоа нека биде прибрана пак.”

¹⁵Така Маријам беше одвоена надвор од логорот седум денови. Народот не тргна на пат додека Маријам не се прибра пак.

¹⁶Потоа народот тргна од Асирот и се настани во Фаранската Пустина.