Read Библија, Константинов Броеви (4 Moj.) 27 Bible Online

Броеви (4 Moj.) 27 - Библија, Константинов bible

Броеви (4 Moj.) 27

¹Тогаш пристапија ќерките на Салпад, синот Оферов, син Галадов, син Махиров, син Манасиев, од родот на Јосифовиот син Манасиј. А имињата на ќерките беа: Мала, Нуја, Егла, Мелха и Терса.

²Тие застанаа пред Мојсеја, пред свештеникот Елеазар, пред главатарите и пред сето општество при влезот во Шаторот на средбата па рекоа:

³„Нашиот татко умре во пустината. Не и припаѓаше на дружината што се побуни против Господа на Кореевата дружина - туку умре заради својот сопствен грев. Немаше синови.

⁴Зошто да исчезне името на нашиот татко од неговиот род? Бидејќи немаше син, дај ни наследство меѓу браќата на нашиот татко!”

⁵Мојсеј го изнесе нивното дело пред Господа.

⁶А Господ му рече на Мојсеја:

⁷„Салпадовите ќерки зборуваат право. Секако треба да им дадеш недвижен имот што ќе биде нивно наследство меѓу браќата на нивниот татко.

⁸Натаму, кажи им на Израелевите синови: ‘Кога ќе умре некој човек а нема син, пренесете го неговото наследство на неговата ќерка.

⁹Ако нема ни ќерка, предајте го наследството на неговите браќа.

¹⁰Ако нема ни браќа, предајте го неговото наследство на браќата на неговиот татко.

¹¹Ако татко му нема браќа, дајте му го неговото наследство на најблискиот роднина од неговиот род: нека ја земе тој во сопственост. Тоа нека им биде законска одредба на Израелевите синови, како што Господ му заповеда на Мојсеја.”

¹²Господ му рече на Мојсеја:

¹³„Искачи се на онаа гора - Аварим и разгледај ја земјата што им ја давам на Израелевите синови. А кога ќе ја разгледаш, ќе им се придружиш и ти на своите предци, како што им се придружи и твојот брат Арон.

¹⁴Зашто при побуната на општеството во пустината Цин и се спротививте на Мојата уста, место да ја покажете, со водата, Мојата светост во нивните очи.” (Тоа се водите на Мерива кај Кадис во пустината Цин).

¹⁵А Мојсеј Му проговори на Господа вака:

¹⁶„Господ, Бог на духовите на секое тело, нека постави човек над ова општество,

¹⁷кој ќе излегува пред него, кој ќе врви пред него, кој ќе го изведува и воведува, така што Господовата заедница да не биде како стадо што нема пастир.”

¹⁸„Земи го Исуса, синот Навинов!” - Господ му рече на Мојсеја. „Тоа е човек во кого има Дух. Положи ја твојата рака на него!

¹⁹Тогаш одведи го пред свештеникот Елеазар и пред целото општество, па дај му наредба пред нивните очи!

²⁰Предај му дел од твојата власт, за да го слуша целото општество на Израелевите синови.

²¹И нека му се обратува на свештеникот Елеазар и нека го праша него за одлуките, со посредство на Урим пред Господа. На негова заповед нека излегуваат и на негова заповед нека влегуваат: тој и сите Израелеви синови со него, и целото општество.”

²²Мојсеј направи како што Господ му заповеда: го зеде Исуса па го постави пред свештеникот Елеазар и пред целата заедница.

²³Потоа ги положи своите раце на него и му ги даде заповедите, како што Господ заповеда преку Мојсеја.