Read Библија, Константинов Броеви (4 Moj.) 3 Bible Online

Броеви (4 Moj.) 3 - Библија, Константинов bible

Броеви (4 Moj.) 3

¹Ова е Ароновото и Мојсеевото родословие од времето кога Господ му зборуваше на Мојсеја на Синајската Гора.

²Ова беа имињата на Ароновите синови: првороденец Надав, потоа Авиуд, Елеазар и Итамар.

³Тоа се имињата на Ароновите синови, на свештениците помазани, за свештенство на посветените.

⁴Но Надав и Авиуд умреа пред Господа, кога во Синајската Пустина, принесуваа непосветен оган пред Господа. Бидејќи немаа синови, затоа Елеазар и Итамар служеа како свештеници во присуство на татка си Арона.

⁵Господ му рече на Мојсеја:

⁶„Повикај го Левиевото племе, нека застане пред свештеникот Арона. Нека му прислужуваат;

⁷нека ги исполнуваат неговите должности и должностите на целото општество пред Шаторот на средбата, и нека ја вршат работата околу Шаторот.

⁸Нека се грижат за сиот намештај во Шаторот на средбата, за должноста на Израелевите синови, и нека ја исполнуваат службата во Шаторот.

⁹Дај им ги левитите на Арона и на неговите синови. Израелците нека му ги подарат целосно.

¹⁰Постави ги Арона и неговите синови да ја исполнуваат својата свештеничка должност. А странец кој би се приближил до тоа нека биде погубен.”

¹¹Господ му рече на Мојсеја:

¹²„Ете, Јас ги земам Левиевците од среде Израелците место сите првороденци - место оние кои ја отвараат мајчината утроба кај Израелевите синови. И така, Левиевците се мои!

¹³Имено, Мене Ми припаѓа секој првороденец. Во оној ден кога ги поразив сите првенци во Египетската Земја; си ги посветив Себеси сите првенци во Израел и од луѓето и од животните. Тие се Мои. Јас Сум Господ.”

¹⁴Господ му рече на Мојсеја во Синајската Пустина:

¹⁵„Изврши попис на Левиевите синови по нивните семејства и родови; изброј ги сите машки од еден месец и повеќе.”

¹⁶Мојсеј ги изброја според Божјата заповед, како што му беше наредено.

¹⁷Овие беа Левиеви синови по име: Гирсон, Каат и Мерариј.

¹⁸А ова се имињата на Гирсоновите синови по нивните родови: Ливниј и Семеј.

¹⁹А Каатови синови сè по своите родови: Амрам, Исар, Хеврон и Озиил.

²⁰Мерарови синови сè по своите родови: Малиј и Мусиј. Тоа се Левиевите родови по нивните семејства.

²¹Родот Ливниев и родот Семеев влечат лоза од Гирсона. Тоа се родови на Гирсоновците.

²²Од нив во пописот на сите машки од еден месец нагоре беа избројани седум илјади и пет стотини.

²³Родовите на Гирсоновците да ги поставуваат шаторите зад Шаторот кон запад.

²⁴Елисаф, синот Лаилов, беше глава на семејството на Гирсоновците.

²⁵Гирсоновците се грижеа, во Шаторот на средбата, за Шаторот и за неговиот покрив, за завесата на влезот во Шаторот на средбата;

²⁶потоа за завесите во дворот, за завесата на влезот во дворот што е околу Шаторот и жртвеникот, за нивните јажиња и за сè друго што спаѓа во таа служба.

²⁷Од Каат произлегуваат: Амрамовиот род, Исаровиот род, Хевроновиот род и Озииловиот род. Тоа се родовите на Каатовците.

²⁸Кога беа избројани сите машки од еден месец нагоре, ги имаше осум илјади и шест стотини. Тие се грижеа за Светилиштето.

²⁹Каатовите родови поставуваа логор од јужната страна на Шаторот.

³⁰Елисафан, синот Озиилов, беше глава на родовите во Каатовиот дом.

³¹Тие се грижеа за Ковчегот, за столот, за светилникот, за жртвениците и за светиот прибор со кој се служеа и, конечно, за завесата и за сè што и припаѓаше.

³²Елеазар, синот на Арона свештеникот, беше врвен главатар на левитите, Тој вршеше надгледување над оние кои се грижеа за Светилиштето.

³³Од Мерариј произлегуваа Малиевиот род и Мусиевиот род. Тоа се Мерариеви родови.

³⁴Од нив, при пописот на сите машки од еден месец и повеќе, беа избројани шест илјади и две стотини.

³⁵Сурил, синот Авихаилов, беше глава на родовите во Мерариевиот дом. Тие поставуваа логор на северната страна од Шаторот.

³⁶Мерариевите синови се грижеа за даските на Шаторот, за неговите лостови, за столбовите и за неговите подножја, за сиот негов прибор и за сè што спаѓа во неговата служба.

³⁷Освен тоа, за столбовите околу дворот, за нивните подножја, за колчињата и за јажињата.

³⁸А оние што ќе ги поставуваат шаторите на предната страна, пред Шаторот на средбата на источната страна, да бидат Мојсеј, Арон и нивните синови, на кои им беше доверена служба во Светилиштето во име на Израелевите синови. Странец кој би се доближил, ќе биде погубен.

³⁹Сите избројани од левитите од еден месец нагоре, кои Мојсеј и Арон ги избројаа, по Господова заповед, по нивните родови, беа дваесет и две илјади.

⁴⁰Господ му рече на Мојсеја: „Преброј ги сите машки израелски првороденци од еден месец нагоре па изврши попис на нивните имиња.

⁴¹И левитите додели Ми ги Мене - Јас Сум Господ - место сите израелски првенци, а левитскиот добиток место сите првородени на добитокот на Израелевите синови.”

⁴²Така Мојсеј ги изброја сите израелски првороденци, како што му заповеда Господ.

⁴³Во пописот имаше дваесет и две илјади и две стотини и седумдесет и три имиња на сите машки првенци од еден месец нагоре.

⁴⁴Тогаш Господ му рече на Мојсеја:

⁴⁵„Земи ги левитите место сите израелски првороденци, а левитскиот добиток место нивниот добиток; левитите нека бидат Мои. Јас Сум Господ.

⁴⁶А за откупнина на двеста седумдесет и три израелски првороденци, што ги има повеќе од левитите,

⁴⁷земи по пет шекели на глава, земи ги според храмскиот шекел: дваесет гери - еден шекел.

⁴⁸Тогаш предај им ги тие сребреници на Арона и на неговите синови за откуп на оние што се отповеќе.”

⁴⁹Така Мојсеј ги прими сребрениците како откупнина за првенците што го надминуваа бројот на оние кои беа откупени од левитите.

⁵⁰Прими од Израелевите првороденци во сребро илјада триста шеесет и пет шекели според храмската мерка.

⁵¹По Господов налог Мојсеј им го предаде среброто за откуп на Арона и на неговите синови, како што Господ му нареди на Мојсеја.