Read Библија, Константинов Броеви (4 Moj.) 32 Bible Online

Броеви (4 Moj.) 32 - Библија, Константинов bible

Броеви (4 Moj.) 32

¹Рувимовите синови и Гадовите синови имаа мошне многу добиток. И согледаа дека Јазирската Земја и Галадската Земја се погодни за сточарство.

²Затоа Гадовците и Рувимовците дојдоа при Мојсеја, при свештеникот Елеазар и при управителите на општеството, па рекоа:

³„Атарот, Девон, Јазир, Нимра, Есевон, Елеалиј, Севам, Нево и Веон -

⁴земја што Господ ја порази пред Израелевото општество - е земја погодна за сточарство; а твоите слуги се занимаваат со сточарство.

⁵Ако најдовме благонаклоност во твоите очи - продолжија - овој крај нека им биде даден во владеење на твоите слуги; не нè преведувај преку Јордан!”

⁶Мојсеј им одговори на Гадовите синови и на Рувимовите синови: „Вашите браќа ќе одат во војна, а вие да останете тука?

⁷Зошто ги одвраќате срцата на Израелевите синови од преминот во земјата, која им ја даде Господ?

⁸Така постапија и вашите татковци кога ги испратив во Кадис-Варни за да ја извидат земјата.

⁹Тие се искачија до долината Есхол, ја видоа земјата и ги обесхрабрија срцата на Израелевите синови, за да не влезат во земјата, која Господ им ја даде.

¹⁰Во тој ден Господ пламна со гнев. Се заколна и рече:

¹¹‘Луѓето кои излегоа од Египет, од дваесет години или нагоре, зашто не Ме следеа верно, никогаш нема да ја видат земјата што им ја ветив под заклетва на Авраама, Исака и Јакова!’

¹²Господа единствено Го следеа верно: Кенезецот Халев, синот Ефониев и Навиновиот син Исус.

¹³Господ пламна со гнев на Израелевите синови па ги водеше низ пустината четириесет години, сè додека не изумре сето поколение што постапи зло во очите на Господа.

¹⁴А сега вие - грешно поколение - станувате место вашите татковци, за да го зголемите уште повеќе јаросниот гнев на Господа против Израел.

¹⁵Ако се одвратите од Него, Тој ќе го продолжи вашиот престој во пустината и вие ќе го погубите сиот овој народ.”

¹⁶Тогаш тие се доближија кон него и рекоа: „Ние ќе подигнеме тука огради за нашиот добиток и градови за нашите деца,

¹⁷а самите ќе го грабнеме оружјето и ќе тргнеме на чело на Израелевите синови додека не ги доведеме до нивното место, а нашите деца нека останат во утврдените градови, заради жителите на земјава.

¹⁸Ние нема да се вратиме во нашите домови сè додека секој Израелец не го заземе своето наследство.

¹⁹Нема да земаме дел од недвижните имоти од онаа страна на Јордан ниту подалеку, зашто нашето наследство ни припадна од оваа страна, на исток од Јордан.”

²⁰Мојсеј им рече: „Ако направите така, ако тргнете во бој пред Господа;

²¹ако вие сите вооружени пребродите преку Јордан пред Господа додека Тој не ги растера пред Себе сите Свои непријатели,

²²тогаш, кога земјата ќе Му биде покорена на Господа, вие ќе можете да се вратите. Така ќе бидете ослободени од одговорноста кон Господа и кон Израел, а оваа земја ќе стане ваша сопственост пред Господа.

²³Но ако не направите така, ќе согрешите против Господа, и знајте дека ќе ве стигне казна за вашиот грев.

²⁴И така, соѕидајте градови за вашите деца и огради за вашиот добиток, но направите што ветивте.”

²⁵Гадовите синови и Рувимовите синови му одговорија на Мојсеја: „Твоите слуги ќе направат како што заповеда нашиот господар.

²⁶Нашите деца, нашите жени, нашите стада и сиот наш добиток, нека останат онаму во галадските градови,

²⁷а твоите слуги, сите кои се способни за бој, ќе тргнат пред Господа во војна, како што зборува нашиот господар.”

²⁸И Мојсеј им даде повелба за нив на свештеникот Елеазар, на Навиновиот син Исус и на главатарите на семејствата на израелевите племиња.

²⁹И Мојсеј им рече: „Ако Гадовите синови и Рувимовите синови, сите оние кои носат оружје, пребродат со вас преку Јордан за да војуваат пред Господа, и ако земјата ви биде покорена вам, тогаш дајте им ја Галадската Земја во сопственост.

³⁰Ама ако не поминат вооружени со вас, нека добијат наследство меѓу вас во Ханаанската Земја.”

³¹Гадовците и Рувимовците одговорија на тоа: „Што им рече Господ на твоите слуги, така ќе направиме.

³²Ние ќе отидеме вооружени пред Господа во Ханаанската Земја, но недвижниот имот на нашето наследство нека ни биде од оваа страна на Јордан.”

³³И така Мојсеј ним - на Гадовите синови, на Рувимовите синови и на половината од Манасиј, племето на синот Јосифов - им ги даде: царството на аморејскиот цар Сион и царството на васанскиот цар Ог; земјата со градовите во нивните меѓи, градовите на соседната земја.

³⁴Гадовите синови ги изградија: Девон, Атарот и Ароир,

³⁵Атрот-Софан, Јазир, Јогвеј,

³⁶Вет-Нимра и Вет-Аран, утврдени градови и огради за стадата.

³⁷Рувимовите синови ги изградија: Есевон, Елеалиј, Киријатаим,

³⁸Нево, Валмеон - на кои им ги изменија имињата - и Сивма. И им дадоа имиња на градовите што ги изградија.

³⁹Синовите на Махир, синот Манасиев, отидоа во Галад и го освоија, и ги протераа Аморејците кои беа таму.

⁴⁰Мојсеј му го предаде Галад на Манасиевиот син Махир и тој се насели во него.

⁴¹А Манасиевиот син Јаир отиде па ги зазеде нивните села и ги нарече „Јаирови Села.”

⁴²Потоа Новах отиде и ги зазеде Кенат и неговите подрачја, па го нарече со своето име Новах.