Read Библија, Константинов Броеви (4 Moj.) 33 Bible Online

Броеви (4 Moj.) 33 - Библија, Константинов bible

Броеви (4 Moj.) 33

¹Ова се патувањата на Израелевите синови што ги поминаа кога излегоа од Египетската Земја по своите полкови, под водство на Мојсеја и Арона.

²По Господова повелба, Мојсеј го опиша нивното патување по нивните престојувања, и еве ги застанките на нивните патувања:

³тргнаа од Рамес во првиот месец. Беше петнаесеттиот ден на првиот месец - утреден по Пасхата - кога Израелевите синови се запатија со подигнати раце и пред очите на сиот Египет,

⁴додека Египетците ги погребуваа оние, кои Господ ги погуби среде нив, односно сите првороденци, и така изврши суд над нивните божества.

⁵И така Израелевите синови тргнаа од Рамес и расположија шатори во Сокхот.

⁶Потоа отидоа од Сокхот и ги оптегнаа шаторите во Етам, токму на работ на пустината.

⁷Отпатуваа од Етам, а тогаш свртија кон Пи-Ајрот, што се наоѓа спроти Велсефон. Ги расположија шаторите пред Мигдал.

⁸Тргнаа од Ајрот и поминаа среде морето во пустината. Одеа три дни низ пустината Етам, а тогаш се настанија во Мера.

⁹Потоа отидоа од Мера и стигнаа во Елим. Во Елим беа дванаесет извори и седумдесет палми. Расположија шатори тука.

¹⁰И тргнаа од Елим и се настанија покрај Црвеното Море.

¹¹А откако заминаа од Црвеното Море, ги оптегнаа шаторите во пустината Син.

¹²Потоа отпатуваа од пустината Син и ги поставија живеалиштата во Дофка.

¹³Откако отидоа од Дофка расположија шатори во Елус.

¹⁴Тргнаа од Елус и се настанија во Рафидин. Таму народот немаше вода да пие.

¹⁵Заминаа од Рафидин и се настанија во Синајската Пустина.

¹⁶Тргнаа од Синајската Пустина па се настанија во Киврот Атави.

¹⁷Отпатуваа од Киврот Атави и оптегнаа шатори во Асирот.

¹⁸Тогаш отидоа од Асирот и расположија шатори во Ритма.

¹⁹Тргнаа од Ритма и се настанија во Римнон Фарес.

²⁰Отидоа од Римнон Фарес и расположија шатори во Ливна.

²¹Отидоа од Ливна и оптегнаа шатори во Риса.

²²Заминаа од Риса и се настанија во Келат.

²³Тргнаа од Келат и се настанија во гората Сафер.

²⁴Отпатуваа од гората Сафер и се настанија во Харад.

²⁵Откако се дигнаа од Харад се настанија во Макилот.

²⁶Тргнаа од Макилот и расположија шатори во Тахат.

²⁷Отпатуваа од Тахат и застанаа во Тара.

²⁸Заминаа од Тара и се настанија во Митка.

²⁹Отпатуваа од Митка и оптегнаа шатори во Асемон.

³⁰Тргнаа од Асемон и расположија шатори во Мосирот.

³¹Заминаа од Мосирот и се настанија во Вене-Јакан.

³²Тргнаа од Вене-Јакан и се настанија во Хор-Агидгад.

³³Отидоа од Хор-Агидгад и расположија шатори во Јотвата.

³⁴Отпатуваа од Јотвата и оптегнаа шатори во Еврон.

³⁵Отидоа од Еврон и се настанија во Есион-Гавер.

³⁶Отидоа од Есион-Гавер и расположија шатори во пустината Син, односно Кадис.

³⁷Тргнаа од Кадис па расположија шатори во гората Ор, на границата на Едомската Земја.

³⁸По Господова наредба свештеникот Арон се искачи на гората Ор и таму почина во првиот ден на петтиот месец, во четириесеттата година по излезот на Израелевите синови од Египетската Земја.

³⁹Арон беше на сто и дваесет и три години кога умре на планината Ор.

⁴⁰Арадскиот цар, Хананеец, кој живееше во ханаанскиот крај Негев, чу за доаѓањето на Израелците.

⁴¹Отидоа од гората Ор и расположија логор во Салмон.

⁴²Заминаа од Салмон и се настанија во Финон.

⁴³Отпатуваа од Финон и застанаа во Овот.

⁴⁴Отидоа од Овот и оптегнаа шатори во моавското подрачје, во Ије-Ха- Аварим.

⁴⁵Заминаа од Ије-Ха-Аварим и расположија шатори во Девон Гад.

⁴⁶Отпатуваа од Девон Гад и се настанија во Алмон-Дивлатаим.

⁴⁷Од Алмон - Дивлатаим отидоа и поставија шатори на Аваримските Гори, пред Нево.

⁴⁸А од Аваримските Гори заминаа и расположија шатори во Моавските Полиња, покрај Јордан, спроти Ерихон;

⁴⁹се настанија покрај Јордан од Вет-Јесимот сè до Авел-Ситим во Моавските Полиња.

⁵⁰Господ му рече на Мојсеја, во Моавските Полиња покрај Јордан, спроти Ерихон:

⁵¹„Речи им вака на Израелевите синови: ‘Кога ќе поминете преку Јордан во Ханаанската Земја,

⁵²изгонете ги пред себе сите жители на земјата, уништете ги сите нивни слики; уништете ги сите нивни одлеани идоли и разурнете ги сите нивни високи места.

⁵³Тогаш завладејте ја земјата и населете се во неа, зашто ви ја предавам да стане ваша.

⁵⁴Разделете ја земјата со жрепка меѓу сите ваши родови. Зголемете им го делот на побројните, а намалете им го на помалубројните. Каде и да падне жрепката, за кого и да е, тоа нека биде негово, а делете им го наследството според татковските племиња.

⁵⁵Ако не ги изгоните пред себе жителите на земјата, тогаш тие, кои ќе останат од нив во живот, ќе ви бидат трње во вашите очи и боцкалки во вашите ребра; ќе ве притеснуваат во земјата во која ќе живеете,

⁵⁶и ќе постапам со вас како што мислев да постапам со нив.’”