Read Библија, Константинов Броеви (4 Moj.) 34 Bible Online

Броеви (4 Moj.) 34 - Библија, Константинов bible

Броеви (4 Moj.) 34

¹Господ му рече на Мојсеја:

²„Дај им повелба на Израелевите синови и речи им: ‘Кога ќе влезете во Ханаанската Земја, таа земја ќе ви припадне во наследство; Ханаанската Земја со нејзините граници:

³Јужната страна ќе се тегне од пустината Син покрај Едом. Јужната граница ќе ви почнува од крајот на Соленото Море на источната страна.

⁴Тогаш границата ќе ви заврти кон југ, кон Акравимската Стрмнина, и ќе продолжи преку Син. Ќе допре на југ до Кадис-Варни; потоа ќе излезе кон Хасар-Адар и ќе продолжи до Асмон.

⁵Од Асмон границата ќе сврти кон Египетскиот Поток и ќе излезе на море.’

⁶‘Големото Море ќе ви биде западна граница; тоа нека ви е меѓа кон запад.’

⁷‘А ова ќе ви биде северна граница: од Големото Море повлечете линија на гората Ор;

⁸тогаш повлечете линија од Ор до влезот во Емат; завршеток на границата ќе биде Седад.

⁹Тогаш границата ќе се продолжи до Зифрон и ќе заврши во Хасар-Енан. Тоа ќе ви биде северна граница.’

¹⁰‘За своја источна граница повлечете линија од селото Хасар-Енан до Сефам.

¹¹Границата ќе се спушта од Сефам до Ривла, источно од Аин. Оттаму границата ќе се спушти и ќе допре до источниот брег на Хинеротското Езеро.

¹²Потоа границата ќе се спушти, низ Јордан, за да заврши при Соленото Море. Тоа ќе биде ваша земја со нејзините граници наоколу.’”

¹³Тогаш Мојсеј им нареди на Израелевите синови: „Тоа е земјата што со жрепка ќе ја добиете во наследство, а за која Господ нареди да ја добијат девет племиња и половината од едно племе.

¹⁴Зашто племето на Рувимовите синови според нивните семејства; потоа племето на Гадовите синови според нивните семејства, веќе го добија нивното наследство, како што го прими своето наследство и половината од Манасиевото племе.

¹⁵Тие две ипол племиња го примија своето наследство отаде Јордан, спроти Ерихон, на источната страна.”

¹⁶Господ му рече на Мојсеја:

¹⁷„Ова се имињата на луѓето, кои ќе ви ја поделат земјата: свештеникот Елеазар и Навиновиот син Исус;

¹⁸и земи од секое племе по еден главатар за делба на земјата.

¹⁹Ова се имињата на тие луѓе: Халев, син Ефониев, од Јудиното племе;

²⁰Самоил, син Амиудов, од Симеоновото племе;

²¹Елидад, син Хислонов, од Венијаминовото племе;

²²кнезот Вакхир, Еглиевиот син, од Дановото племе;

²³Од Јосифовите синови: кнезот Анил, син Суфидов, од племето на Манасиевците;

²⁴кнезот Камуил, син Сафтанов, од племето на Ефремовците;

²⁵кнезот Елисафан, син Фарнаков, од племето на Завулоновците;

²⁶кнезот Фалтиил, син Азанов, од племето на Исахаровците;

²⁷кнезот Ахиуд, син Селомиев, од племето на Асировците;

²⁸кнезот Федаил, син Амиудов, од племето на Нефталимовците.”

²⁹Тоа се оние на кои Господ им наложи да им го поделат наследството на Израелевите синови во Ханаанската Земја.