Read Библија, Константинов Броеви (4 Moj.) 8 Bible Online

Броеви (4 Moj.) 8 - Библија, Константинов bible

Броеви (4 Moj.) 8

¹Господ му рече на Мојсеја:

²„Зборувај му на Арона и речи му: ‘Кога ќе ги палиш светилките, седум светилки нека светат на предната страна на светилникот.’”

³Арон така и направи: ги намести светилките на предната страна на светилникот, како што Господ му нареди на Мојсеја.

⁴Светилникот беше искован од злато; искован од своето подножје до својата чашка. Светилникот беше направен според образецот што Господ му го покажа на Мојсеја.

⁵Господ му рече на Мојсеја:

⁶„Земи ги левитите од меѓу Израелевите синови и очисти ги!

⁷Постапи вака со нив за да ги очистиш: попрскај ги со водата за очистување, а тие нека се избричат по сето свое тело и нека ја исперат својата облека, и ќе бидат чисти.

⁸Потоа нека земат еден јунец и лебен принос од пченично чисто брашно, измешано со масло. А ти земи друг јунец за жртва за грев.

⁹Потоа доведи ги левитите пред Шаторот на средбата и собери го сето Израелево општество.

¹⁰Кога ќе ги доведеш левитите пред Господа, Израелевите синови нека ги положат своите раце на нив.

¹¹Потоа Арон нека ги посвети левитите, како принос пред Господа, во име на Израелевите синови. Така нивната работа ќе биде да Му служат на Господа.

¹²А левитите нека ги стават своите раце на главите на јунците; и принеси го едниот како жртва за грев, а другиот како паленица на Господа, за покривање на гревот на левитите.

¹³Откако ќе ги поставиш левитите пред Арона и пред неговите синови, изврши над нив нивно посветување на Господа.”

¹⁴„Одвои ги така левитите од среде Израелевите синови за да бидат Мои.

¹⁵Потоа, откако си ги очистил и откако си ги посветил, левитите нека влезат во служба на Шаторот на средбата.

¹⁶Зашто тие ми се подарени целосно од среде Израелевите синови; нив ги зедов за Себе место сите првенци; место сите израелски првороденци.

¹⁷Имено, Мои се сите првенци на Израелевите синови, од луѓето и од животните; ги посветив Себеси во денот кога ги погубив сите првородени во Египетската Земја.

¹⁸Така ги зедов левитите место сите израелски првороденци.

¹⁹И им ги предадов левитите, од среде Израелците, како дар на Арона и на неговите синови, за да исполнуваат место Израелевите синови служба во Шаторот на средбата; за да ги очистуваат, па да не ги најде некаков помор Израелевите синови, кога ќе му се приближат на Светилиштето.”

²⁰Мојсеј, Арон и сета израелска заедница направија така со левитите; како што Господ му нареди на Мојсеја за левитите; така Израелевите синови и им сторија.

²¹Левитите се очистија и ја испраа својата облека; и Арон ги посвети пред Господа. Арон направи покривање на гревот за да бидат чисти.

²²Потоа левитите стапија во служба во Шаторот на средбата, во присуство на Арона и на неговите синови. Како што Господ му нареди на Мојсеја за левитите, така и направија со нив.

²³Господ му рече на Мојсеја:

²⁴„И ова се однесува за левитите: левитите, од дваесет и пет години нагоре, нека преземаат по ред служба во Шаторот на средбата.

²⁵А на педесет години нека истапат од службата и веќе нека не служат.

²⁶Но можат да им помагаат на своите браќа во исполнување на нивните должности во Шаторот на средбата, но самите не треба да ја исполнуваат службата.