Read Библија, Константинов Авакум 1 Bible Online

Авакум 1 - Библија, Константинов bible

Авакум 1

¹Пророчко видение што го виде пророк Хабакук.

²До кога, Господе, ќе викам за помош, а Ти да не чуеш? Да викам кон Тебе „Насилство!” а Ти да не спасиш?

³Зошто ми ја покажуваш неправдата пред очи? Зошто го гледаш угнетувањето? Грабеж и насилство се пред мене. Расправија и раздор беснеат.

⁴Затоа законот ја изгуби силата, а правдата не се појавува ни за миг. Да, злосторникот го гони праведникот, затоа судот излегува изопачен.

⁵„Погледајте меѓу народите, гледајте, чудете се, вчудоневидете се! Зашто во ваши денови правам дело, во кое не бисте поверувале, ако некој ви го раскаже.

⁶Зашто еве, ги подигам Халдејците, народ жесток и брз, што навлегува ширум низ земјата, за да ги одземе живеалиштата кои не се негови.

⁷Тој е страшен и морничав, од самиот него излегува неговиот суд и неговата власт.

⁸Коњите му се побрзи од леопардите, побесни од волците навечер; јавачите му се простираат, стигаат оддалеку, налетуваат како орли, се спуштаат за да колват.

⁹Сите тие ќе дојдат да насилствуват, лицата им се устремени напред како источен ветер, собират пленици како песок!

¹⁰Тој им се потсмева на царевите, кнезовите му се за подбив, се подигрува со сите тврдини, насипува земја и ги зазема.

¹¹Тогаш провева како ветер и си оди, престапува и е виновен, кому сил?та му е негов бог.”

¹²Не си ли Ти од дамни времиња, Господи, мој Боже, мој Светецу? Ние нема да умреме! Ти, Господи, го определи да суди, го постави, Стено моја, за да казнува.

¹³Твоите очи се пречисти, за да гледаат зло. Ти не можеш да ги гледаш беззаконијата. Зашто ги гледаш вероломците, молчиш кога злочинецот го голтнува поправедниот од себе?

¹⁴Ги правиш ли луѓето како морските риби, како лазачите, што немаат господар?

¹⁵Тој ги лови сите на јадица, ги извлекува со мрежа, ги собира во својата рибарска мрежа, и така се радува и ликува.

¹⁶Затоа и жртвува на својата мрежа, и пали темјан на својата рибарска мрежа, зашто му набавуваат мрсен дел, и храната му е обилна.

¹⁷И заради тоа ќе ја испразни ли мрежата своја и ќе ги убива ли постојано народите безмилосно?