Read Библија, Константинов Авакум 3 Bible Online

Авакум 3 - Библија, Константинов bible

Авакум 3

¹Молитва на пророк Хабакук врз Шигонот.

²Господи, ја чув Твојата вест, и сум уплашен. Господи, оживи го делото Свое среде годините, среде годините објави го. Во гневот спомни си за милост!

³Бог доаѓа од Теман, и Светецот од планината Фаран. Неговото величество ги покрива небесата, и земјата е полна со фала кон Него.

⁴Болскотот Му е како светлина, зраци светкаат од Неговите раце, таму е скривалиштето на Неговата сила,

⁵Помор оди пред Него, треската Го следи по стапките.

⁶Тој застана и земјата се тресе, Тој погледа, и ги стресе народите. Тогаш се растурија дамнешните планини, вечните ридови пропаднаа, одењата на вечноста се Негови.

⁷Ги видов кушанските шатори во тага, шаторските завеси на Мидиската земја трепереа.

⁸Пламна ли Господ против реките? Беше ли гневот Твој против реките? Или Твојата јарост против морето? Ти јаваш на Свои коњи, Твоите коли на спасението.

⁹Го откриваш Својот лак според клетвите направени на племињата преку Твоето слово. Со порои ја расечуваш земјата,

¹⁰планините Те видоа и затреперија, воден порој премина, бездната го даде својот глас, ги подигна високо своите раце.

¹¹Сонцето и месечината застанаа во своите живеалишта, пред светлоста на Твоите стрели, пред сјајот на Твоето блескаво копје.

¹²Разјарено чекориш по земјата, расрдено ги газиш народите.

¹³Си излегол за спасението на Твојот народ, за спасението на Твојот помазаник; ја разбиваш главата на нечестивата куќа, и ги откриваш основите до вратот.

¹⁴Со неговите сопствени копја Ти ја пронижа главата на неговите воини, кои се пуштија како виор да ме разбијат, нивната радост беше потајно да го изедат бедниот.

¹⁵Газиш во морето со Твоите коњи, преку пенењето на многу води.

¹⁶Чув! Мојата утроба се затресе, ми треперат усните при тој звук, гнилеж навлегува во моите коски, на своето место се растреперив. Зашто јас ќе го чекам спокојно скрбниот ден, за народот кога ќе се подигне да нè нападне.

¹⁷Макар и да не процвета смоквата, а и да нема плод по лозјата, макар и трудот на маслинката да не успее, и полињата да не донесат храна, макар и стадото да е истребено од трлото, и да нема говеда во оборите,

¹⁸јас и тогаш ќе се веселам во Господа, ќе се радувам во Бога на моето спасение.

¹⁹Господ Бог е моја сила, Тој ги направи нозете мои како на срните, и ќе ме направи да одам по височините мои. За пејачкиот предводник на моите жичани инструменти.