Read Библија, Константинов Захарија 4 Bible Online

Захарија 4 - Библија, Константинов bible

Захарија 4

¹Ангелот, кој зборуваше со мене, се врати тогаш и ме разбуди како човек кој се буди од сон.

²„Што гледаш?” праша. Јас одговорив: „Еве, гледам светилник, сиот од злато со чаша за масло врз него; и на светилникот се седум светилки, со седум чашки за седумте светилки што се на него.

³Две маслинови стебла се покрај него, едното оддесно, другото одлево.”

⁴Му се обратив на ангелот кој зборуваше со мене и го прашав: „Што е тоа Господару?

⁵Ангелот кој зборуваше со мене, ми одговори: „Зар не знаеш што е тоа?” Јас реков: „Не, господару.”

⁶Тогаш тој ми одговори вака: „Еве ги Господовите зборови на Зоровавела: ‘Не со сила ни со снага туку со Мојот Дух! - слово е на Господа над Војските.

⁷Што си ти голема горо? Пред Зоровавела стануваш рамница! Тој ќе го извлече врвниот камен со воскликнување: „Благодат! Благодат нему!”‘“

⁸Потоа ми дојде Господово слово:

⁹„Зоровавеловите раце му ставија основи на овој Дом, неговите раце ќе го довршат. И вие ќе знаете дека Господ над Воинствата ме испрати кај вас.

¹⁰Зашто, кој го презре денот на скромните почетоци? Ќе се радуваат кога ќе видат камено висулче во Зоровавеловите раце. Овие седум се Господовите очи што ја опфаќаат со поглед сета земја.”

¹¹Тогаш проговорив и го прашав: „Што се оние две маслинови дрва оддесно и одлево на светилникот?”

¹²Пак проговорив и го прашав: „Што се оние две маслинови гранчиња што низ две златни цевки дотуруваат масло?”

¹³Тој ми одговори: „Зар не знаеш што е тоа?” Одговорив: „Не, господару.”

¹⁴Тој рече: „Тоа се два помазаника кои стојат пред Господарот на целата земја.”