Read Библија, Константинов Матеј 1 Bible Online

Матеј 1 - Библија, Константинов bible

Матеј 1

¹Книга на родословот на Исуса Христа, син Давидов, син Авраамов:

²На Авраама му се роди Исак, на Исака му се роди Јаков, на Јакова му се родија Јуда и неговите браќа.

³На Јуда му се родија Фарес и Зара од Тамара, на Фареса му се роди Есром, а на Есрома му се роди Арам,

⁴на Арама му се роди Аминадав, на Аминадава му се роди Насон, на Насона му се роди Салмон;

⁵на Салмона му се роди Вооз од Рава, на Вооз му се роди Овид од Рута, на Овида му се роди Јесеј;

⁶на Јесеја му се роди цар Давид. На цар Давид му се роди Соломон од Уриевата жена.

⁷На Соломона му се роди Ровоам, на Ровоама му се роди Авија, на Авија му се роди Аса,

⁸на Аса му се роди Јосафат, на Јосафата му се роди Јорам, на Јорама му се роди Озија,

⁹на Озија му се роди Јоатам, на Јоатама му се роди Ахаз, на Ахаза му се роди Езекија,

¹⁰на Езекија му се роди Манасија, на Манасија му се роди Амон, на Амона му се роди Јосија,

¹¹на Јосија му се родија Јехонија и неговите браќа во времето на преселувањето во Вавилон.

¹²По Вавилонската преселба, на Јехонија му се роди Салатиел, на Салатиела му се роди Зоровавел,

¹³на Зоровавела му се роди Авијуд, на Авијуда му се роди Елијаким, на Елијакима му се роди Азор,

¹⁴на Азора му се роди Садок, на Садока му се роди Ахим, на Ахима му се роди Елијуд,

¹⁵на Елијуда му се роди Елеазар, на Елеазара му се роди Матан, на Матана му се роди Јаков,

¹⁶на Јакова му се роди Јосиф, мажот на Марија, која го роди Исуса, наречен Христос.

¹⁷И така, сите родови од Авраама до Давида се четиринаесет родови; и од Давида до преселбата во Вавилон четиринаесет родови; и од преселбата во Вавилон до Христа четиринаесет родови.

¹⁸А раѓањето на Исуса Христа стана вака: кога Неговата мајка Марија беше свршена за Јосифа, пред да се состанат, се најде забременета од Светиот Дух.

¹⁹А нејзиниот маж Јосиф, бидејќи беше праведен и не сакаше јавно да ја засрами, намисли да ја остави тајно.

²⁰Но штом го намисли тоа, ете, Господов ангел му се јави на сон и му рече: „Јосифе, сине Давидов, не бој се да ја земеш Марија, својата жена, зашто зачнатото во неа е од Светиот Дух.

²¹Таа ќе роди Син и ти ќе Му го дадеш името Исус, зашто Тој ќе го спаси својот народ од нивните гревови.”

²²А сето тоа стана за да се исполни она, што Господ го рече преку пророкот, кој вели:

²³”Ете, девица ќе зачне и ќе роди Син, и ќе го наречат Емануел, кое преведено значи: „Бог со нас!”

²⁴А кога Јосиф се разбуди од сонот, направи како што му заповеда Господовиот ангел, ја зеде својата жена.

²⁵И не ја позна, додека таа не Го роди нејзиниот Син, Првородениот; и тој Го нарече Исус.