Read Библија, Константинов Матеј 11 Bible Online

Матеј 11 - Библија, Константинов bible

Матеј 11

¹А кога Исус заврши заповедувајќи им на Своите дванаесет ученици, замина оттаму да поучува и да проповеда во нивните градови.

²Кога Јован чу во темницата, за делата на Христос, испрати двајца од своите ученици,

³и Му рече: „Ти ли си Оној, Кој треба да дојде, или да очекуваме друг?”

⁴Исус им одговори и рече: „Одете и јавете му на Јована што слушате и што гледате:

⁵слепите прогледуваат и хромите одат, лепрозните се очистуваат и глувите слушаат, мртви воскреснуваат и бедните го примаат Евангелието;

⁶и блажен е оној, кој не се соблазнува заради Мене.”

⁷Кога тие си отидоа, Исус почна да му зборува на народот за Јована: „Што излеговте да видите во пустината? Трска ли што ветерот ја лулее?

⁸Но што излеговте да видите? Човек ли облечен во меки облеки? Ете, тие кои носат меки облеки се во царските дворци.

⁹Туку зошто излеговте? Да видите ли пророк? Да, ви велам, и повеќе од пророк.

¹⁰Овој е оној, за кого е пишано: ‘Еве, го испраќам Мојот вестител пред Твоето лице, кој ќе го приготви Твојот пат пред Тебе.’

¹¹Вистина ви велам, меѓу родените од жени не се подигнал поголем од Јована Крстител; но, најмалиот во царството небесно е поголем од него.

¹²А од дните на Јована Крстител досега царството небесно трпи насилство и насилниците го земаат насила;

¹³зашто сите пророци и Законот пророкуваа до Јована;

¹⁴и ако сакате да примите, тој е Илија, кој треба да дојде.

¹⁵Кој има уши нека слуша!”

¹⁶”А со што да го споредам овој род? Личи на децата, кои седат по трговиштата и им викаат на другарите,

¹⁷велејќи: ‘Ви свиревме на свирол и не игравте, ви пеевме жални песни и не жалевте.’

¹⁸Зашто дојде Јован, кој ниту јаде, ниту пие, а тие велат: „Има демон!”

¹⁹Дојде Синот Човечки, кој јаде и пие, па велат: „Еве, човек лаком и пијаница, пријател на цариници и на грешници! „И мудроста се оправда преку нејзините дела.”

²⁰Тогаш почна да ги укорува градовите, во кои се случија најмногу Негови чуда, зашто не се покајаа.

²¹”Тешко тебе, Хоразине! Тешко тебе, Витсаидо! Зашто ако во Тир и Сидон се случија чудата, што се случија при вас, одамна би се покајале во вреќиште и пепел.

²²Но, ви велам: полесно ќе им биде на Тир и Сидон во судниот ден, отколку вам.

²³И ти, Капернауме, до небото ли ќе се воздигнеш? Ќе слезеш до пеколот. Зашто ако во Содом се случеа чудата, што се случија во тебе, ќе останеше до денешен ден.

²⁴Но ви велам, на земјата Содомска ќе и биде полесно на судниот ден, отколку тебе.”

²⁵Во тоа време, Исус одговори и рече: „Те фалам, Татко, Господи на небото и на земјата, зашто си го скрил тоа од мудрите и разумните, а си го открил на младенците.

²⁶Да, Татко, зашто така беше угодно пред Тебе.

²⁷Сè Ми е предадено од Мојот Татко, и никој не Го познава Синот, освен Таткото; ниту некој Го познава Таткото, освен Синот, и оној кому Синот сака да му открие.”

²⁸”Дојдете при Мене сите, кои се трудите и сте обременети, и Јас ќе ви дадам одмор.

²⁹Земете го Мојот јарем на себе и научете се од Мене, зашто Јас сум кроток и понизен по срце; и ќе најдете одмор на своите души;

³⁰зашто Мојот јарем е пријатен и Моето бреме е лесно.”