Read Библија, Константинов Матеј 12 Bible Online

Матеј 12 - Библија, Константинов bible

Матеј 12

¹Во она време, Исус минуваше низ посевите во сабота; а Неговите ученици огладнеа и почнаа да кинат класје и да јадат.

²А фарисеите штом го видоа тоа, Му рекоа: „Гледај, Твоите ученици прават, што не е дозволено да се прави во сабота.”

³А Тој им рече: „Зар не сте читале што направи Давид, кога огладне тој и оние кои беа со него?

⁴Како влезе во Божјиот дом и ги изеде изложените лебови, што не смееја да ги јадат ни тој, ни неговите другари, а само свештениците?

⁵Или, зар не сте читале во Законот дека свештениците, во сабота во Храмот, ја осквернуваат саботата и не се виновни?

⁶Но Јас ви велам, има тука еден што е Поголем од Храмот.

⁷Ако би сте знаеле што значи: ‘Милост сакам, а не жртва,’ немаше да ги осудите невините.

⁸Зашто Синот Човечки е Господар и на саботата.”

⁹И кога си замина оттаму, дојде во нивната синагога.

¹⁰И ете, таму беше човек со исушена рака; и - за да Го обвинат - го прашаа, велејќи: „Дали е дозволено да се исцелува во саботите?”

¹¹А Тој им рече: „Кој човек од вас, ако има една овца, и таа падне во саботен ден во јама, не ќе ја фати и не ќе ја извади?

¹²А колку е поскап човекот од овцата. Затоа е дозволено да се прави добро во сабота.”

¹³Тогаш му рече на човекот: „Протегни си ја раката!” И тој ја протегна, и таа стана здрава како и другата.

¹⁴А фарисеите излегоа и се советуваа против Него, како да Го погубат.

¹⁵Но знаејќи го тоа, Исус се отстрани оттаму; а мнозина Го следеа и ги исцели сите,

¹⁶и ги предупреди да не разгласуваат за Него;

¹⁷за да се исполни кажаното преку пророкот Исаија, кој рече:

¹⁸”Еве Го Мојот Слуга, Кого Го избрав; Мојот Возљубен, во Кого Ми е милината на Мојата душа. Ќе Го положам Мојот Дух на Него и ќе им објави суд на народите.

¹⁹Нема да се препира, ниту ќе вика, ниту некој ќе го чуе Неговиот глас по улиците.

²⁰Нема да докрши прекршена трска, ниту ќе угасне фитиљ што тлее, додека го изведе судот кон победа.

²¹И народите ќе се надеваат во Неговото Име.”

²²Тогаш доведоа при Него еден опседнат од демон, кој беше слеп и нем; и го исцели, така што слепонемиот проговори и прогледа.

²³И сите мноштва се восхитуваа и зборуваа: „Не е ли Овој Синот Давидов?”

²⁴А фарисеите, кога го чуја тоа, рекоа: „Овој ги изгонува демоните само преку Велзевул, владетелот на демоните.”

²⁵Исус знаејќи ги нивните мисли, им рече: „Секое царство, разделено против себеси, запустува, и секој град или дом, кој се разделил против себеси, нема да опстане.

²⁶И ако сатаната изгонува сатана, тој се разделил против себеси, и како ќе опстане неговото царство?

²⁷И ако Јас ги изгонувам демоните преку Велзевула, преку кого ги изгонуваат вашите синови? Затоа тие ќе ви бидат судии;

²⁸но, ако Јас ги изгонувам демоните преку Духот Божји, тогаш царството Божјо дошло врз вас.

²⁹Или, како може некој да влезе во куќа на силен човек и да му ја плени покуќнината, ако најнапред не го врзе силниот, и тогаш ќе му ја ограби куќата?

³⁰Кој не е со Мене, тој е против Мене; и кој не собира со Мене, растура.

³¹Затоа ви велам: секој грев и хула ќе им се прости на луѓето, но хулата против Духот нема да се прости.

³²И ако некој рече збор против Синот Човечки, ќе му се прости; но ако некој рече против Светиот Дух, нема да му се прости ниту во овој век, ниту во идниот.

³³Или направете го дрвото добро, и неговиот плод добар; или направете го дрвото расипано, и неговиот плод расипан; зашто дрвото се познава по плодот.

³⁴Породи змиини! Како можете да зборувате добро, кога сте зли? Зашто од преполнувањето на срцето зборува устата.

³⁵Добриот човек од доброто сокровиште донесува добри нешта; а злиот човек од злото сокровиште донесува зли нешта.

³⁶И ви велам, дека за секој празен збор, што ќе го изговорат луѓето, ќе одговараат на судниот ден;

³⁷зашто по твоите зборови ќе бидеш оправдан, и по твоите зборови ќе бидеш осуден.

³⁸Тогаш некои од книжниците и фарисеите Му одговорија, велејќи: „Учителе, сакаме да видиме знак од Тебе.”

³⁹А Тој им одговори и рече: „Зло и прељуботворно поколение бара знак, и нема да му се даде знак, освен знакот на Јона пророкот.

⁴⁰Зашто, како што Јона беше во утробата на големата риба три дни и три ноќи, така и Синот Човечки ќе биде во срцето на земјата три дни и три ноќи.”

⁴¹”Ниневијските мажи ќе станат на суд со ова поколение и ќе го осудат, зашто се покајаа од проповедта на Јона; а еве, тука е Поголем од Јона.

⁴²Царицата на југот ќе се крене на суд со ова поколение и ќе го осуди; зашто дојде од краиштата на земјата, за да ја чуе мудроста на Соломон; а еве, тука е Поголем од Соломона.”

⁴³Кога нечистиот дух излегува од човек, минува низ безводни места барајќи одмор, и не го наоѓа.

⁴⁴Тогаш вели: ‘Ќе се вратам во својата куќа, од каде излегов.’ И кога дојде, ја најде празна, изметена и уредена.

⁴⁵Тогаш оди и зема со себе седум други духови, полоши од себе; и влегуваат и живеат таму; и последната состојба на оној човек станува полоша од првата, така ќе му биде и на ова зло поколение.”

⁴⁶Додека Тој уште им зборуваше на мноштвата, ете, мајка Му и браќата Негови стоеја надвор и сакаа да Му зборуваат.

⁴⁷И некој Му рече: „Еве, мајка Ти и Твоите браќа стојат надвор и сакаат да Ти зборуваат.”

⁴⁸А Тој во одговор му рече на оној, кој му кажа: „Која е Мојата мајка, и кои се Моите браќа?”

⁴⁹И ја протегна Својата рака кон Своите ученици и рече: „Еве ја Мојата мајка и Моите браќа;

⁵⁰зашто, кој ја врши волјата на Мојот Татко, Кој е во небесата, тој Ми е брат, и сестра, и мајка.”