Read Библија, Константинов Матеј 24 Bible Online

Матеј 24 - Библија, Константинов bible

Матеј 24

¹Кога Исус излезе од Храмот, одеше натаму; Неговите ученици Му се приближија за да Му ги покажат зградите на Храмот.

²А Тој им одговори: „Го гледате ли сето ова? Вистина ви велам: нема да остане тука ни камен на камен, што не ќе биде урнат.”

³Кога седеше пак на Маслиновата Гора, Неговите ученици дојдоа при Него насамо и Му рекоа: „Кажи ни, кога ќе биде тоа и кој е знакот на Твоето доаѓање и на свршетокот на векот?”

⁴И Исус одговори и им рече: „Гледајте да не ве заблуди некој;

⁵зашто мнозина ќе дојдат во Мое име, говорејќи: „Јас Сум Христос,” и ќе заблудат мнозина.

⁶А ќе чуете за војни и гласови за војни. Пазете да не се уплашите; зашто тоа треба да се случи, но уште не е крај.

⁷Зашто ќе се дигне народ против народ и царство против царство; и ќе има глад, и помор, и земјотреси на разни места.

⁸Но сè тоа е само почеток на страдањата.

⁹Тогаш ќе ве предадат на маки и ќе ве убиваат, и сите народи ќе ве замразат заради Моето име.

¹⁰Тогаш мнозина ќе се соблазнат; и едниот ќе го предава другиот; и едниот ќе го мрази другиот;

¹¹и ќе се јават многу лажни пророци и ќе заблудат мнозина.

¹²И заради многу беззаконија, љубовта ќе олади кај мнозина.

¹³А кој ќе издржи до крај, ќе биде спасен.

¹⁴И ова Евангелие за Царството ќе биде проповедано по целиот свет, за сведоштво на сите народи, и тогаш ќе дојде свршетокот.”

¹⁵”И така, кога ќе ја видите одвратноста на запустувањето - за која зборува пророкот Даниел - како стои на свето место; кој чита - нека разбере! -

¹⁶Тогаш жителите на Јудеја нека бегаат по горите;

¹⁷а кој ќе биде на покрив, нека не слегува да земе нешто од својата куќа;

¹⁸и кој ќе биде во полето, нека не се враќа за да ја земе наметката!

¹⁹Горко им на бремените и на доилките во тие денови!

²⁰Молете се вашето бегство да не биде во зима или во сабота,

²¹зашто тогаш ќе биде голема мака, каква не била од создавањето на светот досега, ниту ќе биде.

²²И ако не би се скратиле тие дни, не би се спасило ниедно тело. Но заради избраните ќе бидат скратени тие дни.”

²³”Ако некој ви рече тогаш: ‘Еве, Христос е тука’ или ‘таму’- не верувајте,

²⁴зашто ќе се појават лажни христоси и лажни пророци, па ќе прават големи знаци и чуда, за да ги заблудат, ако е можно, и избраните.

²⁵Ете, ви реков однапред!

²⁶И така, ако ви речат: ‘Ене Го во пустината!’- не излегувајте! ‘Ене Го во една од внатрешните соби!’- не верувајте.

²⁷Зашто, како што молњата излегува од исток и светка до запад, така ќе биде и доаѓањето на Човечкиот Син.

²⁸Каде ќе биде трупот, таму орлите ќе се собираат!”

²⁹”Веднаш по тагата на тие денови, сонцето ќе потемни; месечината нема да ја дава својата светлина; и ѕвездите ќе паѓаат од небото, и небесните сили ќе се расклатат.

³⁰И тогаш ќе се јави на небото знакот на Човечкиот Син; и тогаш ќе заплачат сите племиња на земјата и ќе Го видат Човечкиот Син, како доаѓа на небесните облаци, со сила и со голема слава.

³¹И Тој ќе ги испрати Своите ангели со силен глас на труба и ќе ги соберат Неговите избраници од четирите ветра, од едниот крај на небото до другиот.”

³²”А од смоквата научете ја поуката! Кога нејзината гранка ќе смекне и ќе пушти лисја, знаете дека летото е близу.

³³Така и вие, кога ќе го видите сè тоа, знајте дека е близу - пред вратата!

³⁴Вистина ви велам, ова поколение нема да помине додека не се збидне сè тоа.

³⁵Небото и земјата ќе поминат, но Моите зборови нема да поминат.”

³⁶”А за оној ден и час, никој не знае, ни небесните ангели, а само Мојот Татко.

³⁷Како во Ноевите денови, така ќе биде и при доаѓањето на Човечкиот Син.

³⁸Зашто, како во деновите пред потопот јадеа и пиеја, се женеа и мажеа, до денот кога Ное влезе во ковчегот,

³⁹и не знаеја додека не дојде потопот и однесе сè, така ќе биде и доаѓањето на Човечкиот Син.

⁴⁰Тогаш двајца ќе бидат на полето, еден ќе биде однесен, а другиот оставен.

⁴¹Две жени ќе мелат на мелница; едната ќе биде однесена, а другата оставена.

⁴²Затоа, бдејте, зашто не знаете кога ќе дојде вашиот Господ!

⁴³А знајте го ова: ако домаќинот би знаел во која ноќна стража ќе дојде крадецот, би бдеел и не би дозволил да му се поткопа куќата.

⁴⁴Затоа и вие бидете готови, зашто Човечкиот Син ќе дојде во час, кога не мислите.”

⁴⁵И така, кој е оној верен и благоразумен слуга, кого господарот го поставил над слугите свои, за да им дава храна навреме?

⁴⁶Блажен е оној слуга, кого неговиот господар - кога ќе дојде - ќе го најде да прави така.

⁴⁷Вистина ви велам: ќе го постави над сиот свој имот.

⁴⁸Ако пак оној зол слуга рече во своето срце: ‘Мојот господар ќе се забави долго, ‘

⁴⁹па почне да ги бие своите сослужители, и да јаде и да пие со пијаниците,

⁵⁰господарот на оној слуга ќе дојде во ден, кога не очекува, и во час, што не го знае,

⁵¹па ќе го пресече и ќе го стави меѓу лицемерите. Таму ќе биде плач и чкртање со заби.”