Read Библија, Константинов Матеј 5 Bible Online

Матеј 5 - Библија, Константинов bible

Матеј 5

¹Кога виде многу народ, се искачи на гората; и, откако седна, Му пристапија Неговите ученици,

²и кога ја отвори Својата уста ги поучуваше, велејќи:

³”Блажени се бедните во дух, зашто е нивно царството небесно!

⁴Блажени се оние кои тагуваат, зашто тие ќе бидат утешени!

⁵Блажени се кротките, зашто тие ќе ја наследат земјата!

⁶Блажени се кои гладуваат и жедуваат за правда, зашто тие ќе се наситат!

⁷Блажени се милостивите, зашто тие ќе бидат помилувани!

⁸Блажени се чистите во срце, зашто тие ќе Го видат Бога!

⁹Блажени се миротворците, зашто тие ќе бидат наречени синови Божји!

¹⁰Блажени се оние кои се гонети заради правда, зашто е нивно царството небесно!

¹¹Блажени сте кога ќе ве навредуваат и гонат и говорат лажно против вас, секакви лоши зборови, заради Мене.

¹²Радувајте се и веселете се, зашто голема е вашата награда на небесата, зашто така ги гонеа пророците, кои беа пред вас.

¹³Вие сте солта на земјата, но ако солта стане блуткава, со што ќе се осоли? Веќе нема сила за ништо, освен да биде фрлена надвор и луѓето да ја изгазат.

¹⁴Вие сте светлината на светот. Град кој лежи на рид, не може да се скрие;

¹⁵ниту се пали светило, за да се стави под житно мерило, туку на светилник, и им свети на сите кои се во куќата.

¹⁶Така нека свети вашата светлина пред луѓето, за да ги видат вашите добри дела и да Го прослават вашиот Татко, Кој е во небесата.”

¹⁷”Не мислете дека дојдов да ги поништам Законот и Пророците! Не дојдов да ги поништам, туку да ги исполнам.

¹⁸Зашто вистина ви велам, додека не поминат небото и земјата, ниту најмалата буква, ни цртичка, не ќе ја снема од Законот, додека не се збидне сè.

¹⁹И така, кој ќе наруши една од овие најмали заповеди и така ги научи луѓето, ќе биде наречен најмал во царството небесно; а кој ги држи и поучува, ќе биде наречен голем во царството небесно;

²⁰Зашто ви велам, ако вашата праведност не ја надмине праведноста на книжниците и фарисеите, нема да влезете во царството небесно.”

²¹”Сте чуле дека им беше речено на старите: ‘Не убивај! А кој ќе убие, ќе биде виновен пред судот.’

²²А Јас ви велам, дека секој, кој се гневи на брата си без причина, ќе биде виновен пред судот. А кој ќе му рече на брата си „празноглавец”, ќе биде виновен пред синедрионот. А кој ќе го нарече „безумник”, ќе биде виновен за во огнениот пекол.

²³И така, ако принесуваш свој дар на олтарот и си спомниш таму дека брат ти има нешто против тебе,

²⁴остави го таму својот дар пред олтарот, и оди првин помири се со брата си, па тогаш дојди и принеси го својот дар.

²⁵Покажи бргу добра волја кон твојот противник, додека си уште со него на пат, за да не те предаде противникот на судијата, а судијата на служителот, па да те фрлат во темница.

²⁶Вистина ти велам: нема да излезеш оттаму, додека не го исплатиш и последниот кодрант.”

²⁷”Сте чуле дека им било речено на старите: ‘Не прави прељуба!’

²⁸А Јас ви велам дека секој, кој гледа на жена со желба, веќе извршил прељуба со неа во своето срце.

²⁹Ако твоето десно око те соблазнува, извади го и фрли го од себе; зашто е подобро да ти пропадне еден од членовите, отколку целото твое тело да биде фрлено во пеколот.

³⁰И ако твојата десна рака те соблазнува, отсечи ја и фрли ја од себе; зашто ти е подобро да пропадне еден од твоите членови, отколку целото твое тело да отиде во пеколот.

³¹”Исто така било речено: ‘Кој ќе ја остави својата жена, нека и даде разводно писмо.’

³²А Јас ви велам дека секој, кој ја остава својата жена, освен за прељуба, ја прави да врши прељуба, и кој се оженува со така напуштена, врши прељуба.”

³³”Уште сте чуле, дека им било речено на старите: ‘Не нарушувај ја клетвата, а исполнувај ги пред Господа своите клетви.’

³⁴А Јас ви велам: не колнете се никако; ниту во небото, зашто е Божји престол;

³⁵ниту во земјата, зашто е подножје на Неговите нозе; ниту во Ерусалим, зашто е град на великиот Цар.

³⁶Не ќе се колниш ни во својата глава, зашто не можеш ниедно влакно да го направиш бело или црно!

³⁷Туку вашиот збор нека биде: ‘да’, да - ‘не’, не! Што е повеќе од тоа, од лукавиот е.”

³⁸”Сте чуле дека било речено: ‘Око за око и заб за заб.’

³⁹А Јас пак ви велам: не противете му се на злото; туку, ако некој те плесне по твојот десен образ, сврти му го и другиот.

⁴⁰Ако некој сака да се суди со тебе и да ти ја земе кошулата, остави му ја и наметката.

⁴¹Ако некој те принуди да одиш со него една милја, ти оди две со него.

⁴²Дај му на оној што бара од тебе, и не свртувај се од оној што ти сака на заем.”

⁴³”Сте чуле дека било речено: ‘Љуби го својот ближен и мрази го својот непријател’.

⁴⁴А Јас ви велам: Љубете ги своите непријатели и молете се за оние, кои ве гонат;

⁴⁵за да бидете синови на вашиот Татко, Кој е во небесата, Кој прави Неговото сонце да изгрева над злите и над добрите, и дава дожд на праведните и на неправедните.

⁴⁶Зашто ако ги љубите оние, кои ве љубат вас, каква награда имате? Зар и цариниците не го прават тоа исто?

⁴⁷И ако ги поздравувате само своите браќа; што правите особено?Зар не го прават истото и цариниците?

⁴⁸И така, бидете совршени, како што е совршен вашиот небесен Татко.”