Read Библија, Константинов Матеј 6 Bible Online

Матеј 6 - Библија, Константинов bible

Матеј 6

¹„Внимавајте да не ја вршите својата правда пред луѓето, за да ве видат тие; инаку немате награда од вашиот Татко, Кој е во небесата.

²И така, кога правиш милостина, не труби пред себе, како што прават лицемерите по синагогите и по улиците, за да бидат славени од луѓето. Вистина ви велам, ја имат својата награда.

³А ти, кога правиш милостина, нека не ти знае левицата, што ти прави десницата,

⁴за да биде твојата милостина во тајност; и твојот Татко, Кој гледа во тајност, ќе те награди јавно.”

⁵”И кога се молите, не бидете како лицемерите, кои сакаат да се молат стоејќи по синагогите и на аглите од улиците, за да ги видат луѓето; вистина ви велам, ја имат својата награда.

⁶А ти, кога се молиш, влези во својата скришна соба, затвори ја вратата и помоли Му се на твојот Татко, Кој е во тајност; и твојот Татко, Кој гледа во тајност, ќе те награди јавно.”

⁷”А кога се молите, не употребувајте напразни повторувања како народите; зашто мислат дека ќе бидат послушани, заради многуте зборови.

⁸И така, не бидете како нив, зашто вашиот Татко знае што ви е потребно, уште пред да Го помолите.

⁹Туку молете се вака: „Татко наш, Кој си во небесата, да се свети Твоето име;

¹⁰да дојде Твоето царство, да биде Твојата волја, како во небото, така и на земјата;

¹¹нашиот насушен леб, дај ни го денес;

¹²и прости ни ги нашите долгови, како што и ние им ги проштаваме на нашите должници;

¹³и не воведувај нè во искушение, но избави нè од лукавиот. Зашто Твое е царството, и силата, и славата, во сите векови. Амин!”

¹⁴”Зашто, ако вие им ги простите на луѓето нивните престапи, вашиот небесен Татко ќе ви ги прости и вам.

¹⁵Ако вие не им ги простите на луѓето нивните престапи, ни вашиот Татко нема да ви ги прости вашите.”

¹⁶”А кога постите, не бидете тажни како лицемерите; зашто си ги помрачуваат лицата, за да ги видат луѓето дека постат; вистина ви велам, ја имат својата награда.

¹⁷А ти, кога постиш, помажи ја својата глава и измиј го своето лице,

¹⁸за да не те видат луѓето дека постиш, но твојот Татко, Кој е во тајност; и твојот Татко, Кој гледа во тајност, ќе те награди јавно.”

¹⁹”Не собирајте си богатства на земјата, каде што молецот и рѓата ги уништуват, и каде што крадци поткопуваат и крадат;

²⁰туку собирајте си богатства во небото, каде што ни молец, ниту ‘рѓа ги уништува, и каде што крадци не поткопуваат и крадат;

²¹зашто каде е твоето богатство, таму ќе биде и твоето срце.”

²²”Светилото на телото е окото. И така, ако твоето око е бистро, целото твое тело ќе биде осветлено;

²³но ако твоето око е лукаво, целото твое тело ќе биде темно. И така, ако светлината, што е во тебе, е темнина, колкава ќе биде темнината!”

²⁴”Никој не може да им служи на два господара; зашто или едниот ќе го мрази, а другиот ќе го љуби; или ќе му биде приврзан на едниот, а другиот ќе го презира. Не можете да им служите на Бога и на мамона.”

²⁵”Затоа ви велам: не грижете се за својата душа, што ќе јадете или што ќе пиете; ниту за своето тело, што ќе облечете. Зар душата не е повеќе од храната, и телото од облеката?

²⁶Погледнете ги птиците небесни! Тие ниту сеат, ниту жнијат, ниту собираат во житници, и пак вашиот небесен Татко ги храни. Зар не сте вредни многу повеќе од нив?

²⁷Кој од вас може, грижејќи се, да му придаде на својот раст еден лакот?

²⁸Зошто се грижите и за облеклото? Погледнете ги полските лилјани како растат; не се трудат, ниту предат;

²⁹а Јас ви велам дека ни Соломон, во целата своја слава, не се облече како еден од нив.

³⁰И, ако Бог ја облекува така полската трева, што денес е, а утре ја фрлаат во печка, нема ли многу повеќе вас, маловерни?

³¹И така не грижете се, велејќи: ‘Што ќе јадеме?’ или: ‘Што ќе пиеме?’ или: ‘Што ќе облечеме?’

³²Зашто сето тоа го бараат народите, зашто вашиот небесен Татко знае дека ви е потребно сето ова.

³³Но, барајте го првин царството Божјо и Неговата правда, и сè тоа ќе ви се додаде.

³⁴И така, не грижете се за утрешниот ден, зашто утрешниот ден ќе се грижи за себеси. Доста му е на секој ден неговото зло.”