Read Библија, Константинов Матеј 7 Bible Online

Матеј 7 - Библија, Константинов bible

Матеј 7

¹„Не судете, за да не бидете судени!

²Зашто со каков суд судите, со таков ќе ви се суди; и со каква мерка мерите, со таква ќе ви се мери.”

³” Зошто ја гледаш раската во окото на твојот брат, а не ја забележуваш гредата во твоето око?

⁴Или, како ќе му речеш на брата си: ‘Дозволи ми, да ти ја извадам раската од твоето око; а, пак, ете, во твоето око има греда?’

⁵Лицемере, извади ја првин гредата од твоето око, па тогаш ќе видиш јасно, како да ја извадиш раската од окото на брата си.”

⁶”Не давајте им го она што е свето на кучињата; ниту фрлајте ги своите бисери пред свињите, за да не ги изгазат со своите нозе, и да се завртат и да ве раскинат.”

⁷”Молете и ќе ви се даде; барајте и ќе најдете; чукајте и ќе ви се отвори.

⁸Зашто секој кој моли, добива; кој бара, наоѓа, и на оној кој чука, ќе му се отвори.

⁹Или, кој е тој човек меѓу вас, кој на својот син ако му побара леб, ќе му даде камен?

¹⁰Или, ако му побара риба, ќе му даде ли змија?

¹¹И така, ако вие, кои сте зли, знаете да им давате добри дарови на своите чеда, колку повеќе вашиот Татко, Кој е во небесата, ќе им даде добра на оние, кои Го молат?”

¹²”И така, сè што сакате да ви прават луѓето, правете им и вие така; зашто тоа е Законот и пророците.”

¹³”Влезете низ тесната врата, зашто широка е вратата и простран е патот, што водат кон пропаст, и мнозина се, кои влегуваат низ неа.

¹⁴Зашто тесна е вратата и тесен е патот, што водат во живот, и малцина се кои го наоѓаат.”

¹⁵”Пазете се од лажните пророци, кои ви доаѓаат во овча облека, а внатре се грабливи волци.

¹⁶Ќе ги препознаете по нивните плодови. Се бере ли грозје од трње, или смокви од чичка?

¹⁷Така, секое добро дрво раѓа добри плодови, а лошото дрво раѓа лоши плодови.

¹⁸Не може добро дрво да дава лоши плодови, нити лошо дрво да дава добри плодови.

¹⁹Секое дрво, ако не раѓа добри плодови, се сече и се фрла во оган.

²⁰И така: ќе ги препознаете по нивните плодови.”

²¹”Не секој, што Ми вели: ‘Господи, Господи!’ ќе влезе во царството небесно, а оној, кој ја врши волјата на Мојот Татко, Кој е во небесата.

²²Мнозина ќе Ми речат во оној ден: ‘Господи, Господи, не пророкувавме ли во Твое име; не изгонувавме ли бесови во Твое име; и не правевме ли многу чуда во Твое име?’

²³И тогаш Јас ќе им изјавам: ‘Никогаш Јас не сум ве познавал; одете си од Мене вие, кои правите беззаконие!’

²⁴”И така, секој, кој ги слуша овие Мои зборови и ги исполнува, ќе го споредам Јас со благоразумен човек, кој ја изградил својата куќа на камен.

²⁵И заврна пороен дожд, и надојдоа реки, и дувнаа ветрови и навалија на таа куќа, но таа не се разурна, зашто беше заснована на камен.

²⁶И секој, кој ги слуша овие Мои зборови, а не ги исполнува, ќе биде спореден со безумен човек, кој ја изградил својата куќа на песок.

²⁷И заврна пороен дожд, и надојдоа реки, и дувнаа ветрови и навалија на таа куќа, и таа падна, и нејзиното паѓање беше големо.”

²⁸И кога Исус ги заврши овие зборови, народот се чудеше на Неговото учење;

²⁹зашто ги учеше како Оној, Кој има власт, а не како нивните книжници.