Read Библија, Константинов Марко 13 Bible Online

Марко 13 - Библија, Константинов bible

Марко 13

¹И кога излегуваше од Храмот, еден од Неговите ученици Му рече: „Учителе! Гледај - какви камења и каква зграда!”

²А Исус му рече: „Ги гледаш ли овие големи згради? Нема да остане камен на камен, што не ќе биде разурнат.

³И кога седеше на Маслиновата Гора, спроти Храмот, Петар и Јаков и Јован и Андреј Го прашаа насамо:

⁴”Кажи ни кога ќе биде тоа, и каков е знакот, кога сè тоа ќе се исполни?”

⁵А Исус почна да им зборува: „Пазете се, некој да не ве измами!

⁶Мнозина ќе дојдат во Мое име и ќе речат: ‘Јас Сум’ - и ќе измамат мнозина.

⁷Кога ќе чуете за војни и гласови за војни, не плашете се! Зашто тоа треба да биде, но уште не е свршеток;

⁸зашто ќе се крене народ против народ и царство против царство; ќе има земјотреси по разни места; ќе има глад. Тоа е почеток на страдањата.”

⁹”Но вие, чувајте се! Ќе ве предаваат на судовите и ќе ве бијат по синагогите; и пред управниците и царевите ќе стоите заради Мене, ним за сведоштво.

¹⁰Најнапред треба да им биде проповедано Евангелието на сите народи.

¹¹А кога ќе ве поведат и ве предадат, не грижете се однапред што ќе зборувате; туку што ќе ви биде дадено во тој час, зборувајте го тоа: зашто нема да зборувате вие, туку Светиот Дух.

¹²И брат брата ќе предаде на смрт, и татко - чедо. И децата ќе станат против родителите и ќе ги убиваат.

¹³И сите ќе ве мразат заради Мене, а кој претрпи до крај, тој ќе се спаси.

¹⁴А кога ќе видите дека ‘мерзоста на запустението’ како што рече пророкот Даниел, да стои, каде што не треба - кој чита, нека разбере! - тогаш оние, кои се во Јудеја, нека бегаат по горите!

¹⁵Кој е на покривот, нека не слегува и нека не влегува да земе нешто од својата куќа;

¹⁶а кој е во полето, нека не се враќа да ја земе својата наметка.

¹⁷Тешко им на трудните жени и на доилките во тие дни!

¹⁸Молете се, тоа да не биде зиме!

¹⁹Зашто во тие дни ќе има неволја каква немало од почетокот на Божјото создавање, па досега, и нема да биде.

²⁰И ако Господ не ги скрати тие дни, не би се спасил ниеден човек; но заради избраните, кои ги избра, ги скрати дните.

²¹И ако некој ви рече тогаш: ‘Еве, тука е Христос! Ене, таму!’ не верувајте;

²²зашто ќе се појават лажни христоси и лажни пророци и ќе покажат знаци и чуда, за да ги измамат избраните, ако е можно.

²³А вие внимавајте! Ете, ви кажав сè однапред!”

²⁴”Во тие дни - после тие неволји - сонцето ќе потемни и месечината нема да ја дава својата светлина,

²⁵ѕвездите ќе паѓаат од небото и небесните сили ќе се расклатат.

²⁶И тогаш ќе Го видат Човечкиот Син како доаѓа на облаците, со голема сила и слава.

²⁷И тогаш, Тој ќе ги испрати Своите ангели и ќе ги собере своите избрани од четирите ветра, од крајот на земјата до крајот на небото.”

²⁸А од смоквата научете ја приказната: кога нејзината гранка омекне и разлиста, знаете дека летото е близу.

²⁹Така и вие, кога ќе видите дека се случува ова, знајте дека е близу - пред врата.

³⁰Вистина ви велам, ова поколение нема да помине, додека сè ова не се збидне.

³¹Небото и земјата ќе поминат, но Моите зборови нема да поминат.

³²А за оној ден и час, никој не знае: ни ангелите на небото, ниту Синот, а само Таткото.”

³³”Внимавајте, бдејте! Зашто не знаете, кога ќе биде времето!

³⁴Како човек, кој - тргнувајќи на пат - ја остави својата куќа и ги овласти своите слуги, секому му ја одреди неговата работа, а на вратарот му нареди да бдее.

³⁵И така: бидете будни, зашто не знаете кога ќе дојде господарот на куќата: навечер ли, или на полноќ, или кога петлите ќе пропеат, или наутро,

³⁶за да не дојде одненадеж и да ве најде заспани.

³⁷А што ви зборувам вам, на сите им зборувам: бдејте!”