Read Библија, Константинов Марко 3 Bible Online

Марко 3 - Библија, Константинов bible

Марко 3

¹И влезе пак во синагогата, а таму имаше човек со исушена рака.

²И Го набљудуваа, дали ќе го излечи во сабота, за да Го обвинат.

³И му рече на човекот, кој имаше сува рака: „Застани насреде!”

⁴И им рече: „Дали е дозволено во сабота: да се прави добро или зло? Да се спаси душа, или да се погуби?” А тие молчеа.

⁵Тогаш ги изгледа, наоколу, со гнев, и натажен заради закоравеноста на нивните срца, му рече на човекот: „Протегни ја раката!” И тој ја протегна и стана пак здрава неговата рака.

⁶А фарисеите, кога излегоа, веднаш се советуваа со иродовците против Него, за да Го уништат.

⁷А Исус се повлече со Своите ученици кон морето, и големо мноштво од Галилеја, тргна по Него, и од Јудеја,

⁸и од Ерусалим, од Идумеја и од другата страна на Јордан; од околината на Тир и Сидон, големо множество дојде при Него, откако чуја што правел.

⁹И им рече на Своите ученици да Му се приготви еден кораб, заради народот, за да не Го притискаат.

¹⁰Бидејќи мнозина излекува, така што навалуваа на Него сите, кои страдаа, за да Го допрат.

¹¹И нечистите духови, штом ќе Го видеа, паѓаа пред Него и викаа, велејќи: „Ти си Божји Син!”

¹²И им забрануваше строго да не Го разгласуваат.

¹³И се искачи на гората и ги повика при Себе оние, кои ги сакаше и тие отидоа кај Него.

¹⁴И определи Дванаесетмина да бидат со Него, и да ги праќа да проповедаат,

¹⁵и да имаат власт да ги изгонуваат бесовите.

¹⁶И ги определи Дванаесетмина: и на Симона му го даде името Петар,

¹⁷па Јакова Зеведеев и Јована, братот Јаковов, на кои им го даде името Воанергес - што значи: Синови на Громот;

¹⁸и Андреја, и Филипа, и Вартоломеја, и Матеја, и Тома, и Јакова Алфеев, и Тадеја, и Симона Хананец,

¹⁹и Јуда Искариотски, кој Го предаде.

²⁰И дојде во една куќа, и пак се собра народ, така што не можеа ни леб да јадат.

²¹А кога Неговите чуја за тоа, излегоа за да Го приберат, зашто зборуваа дека не е при Себеси.

²²Книжниците пак, кои дојдоа од Ерусалим, зборуваа дека го има Велзевула и дека со помош на демонскиот кнез ги истерува бесовите.

²³И откако ги повика, им зборуваше во параболи: „Како може сатаната да изгонува сатана?

²⁴Ако едно царство се раздели против себеси, тоа не може да се одржи.

²⁵И ако дом се раздели против себеси, тој дом не може да опстане.

²⁶И ако сатаната се кренал против себеси и се разделил, не ќе може да опстане, туку му дошол крајот.

²⁷Но никој не може да влезе во куќа на силен и да му ја ограби покуќнината, ако првин не го врзе силниот и тогаш да му ја ограби неговата куќа.

²⁸Вистина ви велам, дека на човечките синови ќе им бидат простени сите гревови и хули, колку и да хулат;

²⁹но кој похули на Светиот Дух, нема прошка довека,

³⁰туку го обвинува вечен грев. Зашто рекоа: „Има нечист дух!”

³¹И тогаш дојдоа: Неговата мајка и Неговите браќа и, стоејќи надвор, испратија при Него да Го повикаат.

³²А околу Него седеше народ и Му рекоа: „Ете, мајка Ти и Твоите браќа надвор Те бараат!”

³³И во одговор им рече: „Кои се мајка Ми и браќа Ми?”

³⁴И ги погледна наоколу оние, кои седеа околу Него и рече: „Еве ги мајка Ми и браќа Ми;

³⁵зашто, кој ја исполнува Божјата волја, тој Ми е брат, и сестра, и мајка.”