Read Библија, Константинов Лука 11 Bible Online

Лука 11 - Библија, Константинов bible

Лука 11

¹А кога се молеше на едно место и кога престана, еден од Неговите ученици Му рече: „Господи, научи нè да се молиме, како што и Јован ги научи своите ученици!”

²А Тој им рече: „Кога се молите - говорите: „Татко наш, Кој си на небесата, да се свети Твоето име! Да дојде Твоето Царство! Да биде Твојата волја како на небото, така и на земјата!

³Нашиот насушен леб, давај ни го секој ден!

⁴Прости ни ги нашите гревови, зашто и ние самите му ги проштаваме на секој должник! И не нè воведувај во искушение, но избави не од злото!”

⁵И им рече: „Ако некој од вас има пријател и отиде при него на полноќ, и му рече: „Пријателе, дај ми на заем три леба,

⁶зашто ми дојде пријател од пат, а немам што да ставам пред него!”

⁷А оној одвнатре да му одговори: ‘Не ме обеспокојувај, вратата е веќе затворена, а моите деца се со мене во постелата, не можам да станам и да ти дадам,’

⁸ви велам, ако и не би станал да му даде, затоа што му е пријател, ќе стане заради неговото настојување и ќе му даде, колку што му треба.

⁹И Јас ви велам: „Молете, и ќе ви се даде! Барајте, и ќе најдете! Чукајте, и ќе ви се отвори!

¹⁰Зашто секој, кој моли - прима; и кој бара - наоѓа; а на оној, кој чука - ќе му се отвори.

¹¹И кој е оној татко, меѓу вас, кој ќе му даде на сина си камен - ако побара леб? Или, ако побара риба, да му даде место риба - змија?

¹²Или ако побара јајце - да му даде скорпија?

¹³И така, ако вие, кои сте зли, можете да им давате добри дарови на своите деца, колку повеќе небесниот Татко ќе им даде Свети Дух на оние, кои Го молат?”

¹⁴И еднаш истеруваше лош дух, кој беше нем. А кога нечистиот дух излезе, немиот проговори, а множеството се зачуди.

¹⁵А некои од нив рекоа: „Тој ги изгонува нечистите духови со помош на Велзевул, началникот на бесовите.

¹⁶Другите пак го искушуваа и бараа од Него знак од небото.

¹⁷А Тој ги знаеше нивните мисли и им рече: „Секое царство, ако се раздели во себеси, ќе запусти, и домот против дом - паѓа.

¹⁸И ако сатаната се разделил против себеси, како ќе се одржи неговото царство? Зашто вие велите дека ги изгонувам демоните со помош на Велзевула,

¹⁹И ако Јас, пак, ги изгонувам демоните преку Велзевула, со чија помош ги изгонуваат вашите синови? Затоа тие ќе ви бидат судии.

²⁰Но ако Јас ги изгонувам нечистите духови со Божјиот прст, значи дека Божјото Царство дошло при вас.

²¹Кога силниот, вооружен човек, го чува својот двор, неговиот имот е во сигурност.

²²Но кога ќе дојде посилен од него и го совлада, му го одзема оружјето, на кое се надевал, и ќе го раздели ограбеното од него.

²³Кој не е со Мене, тој е против Мене и кој не собира со Мене, тој растура!

²⁴Кога нечист дух ќе излезе од човекот, тој скита по безводни места и бара спокојство. И кога не ќе го најде, вели: ‘Ќе се вратам во својот дом, од каде излегов.’

²⁵И кога ќе дојде, го наоѓа изметен и среден.

²⁶Тогаш оди и зема седум други демони, полоши од себе, па кога ќе влезат - живеат таму и последната состојба на оној човек станува полоша од првата.”

²⁷А кога го зборуваше тоа, една жена од множеството извика: „Блажена е утробата, која Те носела; и градите од кои си се хранел.”

²⁸А Тој рече: „Уште повеќе се блажени оние, кои го слушаат Божјото слово и го пазат.”

²⁹А кога народот се собираше, почна да зборува: „Ова поколение е лошо поколение; бара знак, но нема да му биде даден, освен знакот на Јона.

³⁰Имено, како што Јона им беше знак на Ниневијците, така и Човечкиот Син ќе биде за овој род.

³¹Царицата на Југот ќе се јави на суд со луѓето од ова поколение и ќе го осуди; зашто дојде од крајот на земјата, за да ја чуе Соломоновата мудрост. А ете, тука е поголем од Соломона!

³²Ниневијците ќе се јават на суд со овој род и ќе го осудат, зашто се покајаа од Јонината проповед, а ете, тука е поголем од Јона!

³³Никој не става запалено светило во сокриено место или под вршник, туку на светилник, за да ја видат светлината оние, кои влегуваат.

³⁴Светило на телото е твоето око. Ако твоето око е бистро - целото твое тело е осветлено; ако пак е зло, во мрак е и твоето тело.

³⁵Затоа внимавај светлината што е во тебе - да не биде темнина!

³⁶Ако целото твое тело е осветлено, без да има темен дел, тоа ќе биде целото осветлено, како кога светилката те осветлува со своето светење.”

³⁷И додека Тој зборуваше, еден фарисеј Го помоли да руча кај него; Тој влезе и седна.

³⁸А штом фарисејот го виде тоа, се зачуди зашто Тој не се изми пред јадење.

³⁹А Господ му рече: „Да, вие фарисеите ја чистите надворешноста на чашата и чинијата, а вашата внатрешност е полна со грабеж и лукавство.

⁴⁰Неразумници! Зар Оној Кој ја создаде надворешноста, не ја создаде и внатрешноста?

⁴¹Туку, дајте го како милостина тоа што е внатре, и ете, сè ќе ви биде чисто.

⁴²Но, горко ви вам, фарисеи, кои давате десеток од нане и од горчлива трева, и од секаков зеленчук, а ги занемарувате праведноста и Божјата љубов! Ова требаше да го правите, а она, да не го оставате.

⁴³Горко ви вам, фарисеи, зашто ги сакате првите седишта во синагогите и поздравите по пазарите.

⁴⁴Горко ви вам, зашто сте како гробови, што не се забележуваат, така што луѓето кои одат преку нив, не знаат.”

⁴⁵Тогаш еден законоучител Му одговори и рече: „Учителе, кога го зборуваш тоа, и нас нè навредуваш.”

⁴⁶Тој пак им рече: „Горко ви вам - законици, зашто ги натоварувате луѓето со бремиња, што тешко се носат, а вие самите ни со еден прст не се допирате до бремињата.

⁴⁷Горко ви вам, зашто им градите надгробни споменици на пророците, а вашите татковци ги убија!

⁴⁸И така вие сведочите за делата на своите татковци и се согласувате со нив; зашто тие и ги убија, а вие им градите гробници.

⁴⁹Затоа и Божјата мудрост рече: „Ќе им испратам пророци и апостоли и ќе убијат едни од нив, а други ќе гонат,

⁵⁰за да се побара од ова поколение крвта на сите пророци пролеана од создавањето на светот:

⁵¹од крвта на Авела до крвта на Захарија, кој загина меѓу жртвеникот и светилиштето. Да, ви велам, ќе се бара од ова поколение.

⁵²Горко ви вам, законици, зашто го зедовте клучот од знаењето - сами не влеговте, а им попречивте на оние, кои сакаа да влезат.”

⁵³А кога излезе оттаму, книжниците и фарисеите почнаа силно да се гневат на Него и да Го испитуваат за многу нешта,

⁵⁴дебнејќи Го за да уловат нешто од Неговата уста.