Read Библија, Константинов Лука 14 Bible Online

Лука 14 - Библија, Константинов bible

Лука 14

¹Кога еднаш во саботен ден влезе во куќата на некој фарисејски старешина, за да јаде леб, тие Го набљудуваа Него.

²И ете, пред Него беше еден човек, кој страдаше од водена болест.

³И Исус проговори и им рече на закониците и фарисеите: „Дозволено ли е да се лекува во сабота или не?”

⁴А тие молчеа. И го допре, го излечи и го отпушти.

⁵А ним им рече: „Кој од вас, кога ќе му падне синот или волот во кладенец, не ќе го извади веднаш во сабота?”

⁶И не можеа ништо да Му одговорат на тоа.

⁷А на гостите им кажа парабола, кога забележа како ги избраа првите места и им рече:

⁸”Кога ќе те повика некој на свадба, не седнувај на прво место, за да не повика случајно некој, кој е поугледен од тебе,

⁹и за да не ти рече - кога ќе дојде - оној, кој те повикал тебе, и него: ‘Отстапи му го местото на овој!’ И тогаш ќе треба засрамен да го заземеш последното место.

¹⁰Но, кога ќе те повикаат, оди и седни на последното место, за да ти рече - кога ќе дојде - оној, кој те повикал: ‘Пријателе, премести се погоре!’ Тогаш ќе имаш чест пред сите, кои се со тебе покрај трпезата.

¹¹Зашто, секој кој се возвишува, ќе биде понизен; а кој се понизува, ќе биде возвишен.”

¹²Му рече и на оној, кој Го повика: „Кога даваш ручек или вечера, не повикувај ги своите пријатели, ни твоите браќа, ни своите роднини, ниту богатите соседи, за да не те повикаат и тие и да ти биде вратено.

¹³Туку кога даваш гозба, повикај ги бедните, сакатите, хромите и слепите!

¹⁴И ќе бидеш блажен, зашто немаат со што да ти вратат! Ќе ти биде вратено при воскресението на праведниците.”

¹⁵Кога го чу тоа еден од гостите, Му рече: „Блажен е оној, кој ќе јаде леб во Божјото Царство!”

¹⁶Тој му рече: „Еден човек приготви голема вечера и повика мнозина.

¹⁷А кога беше време за вечера, го испрати својот слуга да им рече на повиканите: ‘Дојдете, зашто веќе сè е готово!’

¹⁸И сите, како договорени, почнаа да се извинуваат. Првиот рече: ‘Купив нива и треба да отидам да ја видам. Те молам, извини ме!’

¹⁹Другиот му рече: ‘Купив пет двојки волови и одам да ги пробам; те молам, извини ме!’

²⁰И третиот рече: ‘Се оженив, затоа не можам да дојдам!’

²¹И слугата дојде и му го кажа тоа на својот господар. Тогаш домаќинот се разгневи и му рече на својот слуга: ‘Излези бргу на раскрсниците и градските улици и доведи ги ваму бедните, сакатите, слепите и хромите!’

²²И слугата му рече: ‘Господаре, направено е како што заповеда, но уште има место.’

²³И господарот му рече на слугата: ‘Излези по патиштата и по оградите и натерај ги да дојдат, за да се наполни мојот дом.

²⁴Зашто ви велам: ниеден од повиканите нема да вкуси од мојата вечера.’”

²⁵А кога големо множество одеше со него, Тој се заврти и им рече:

²⁶”Ако некој дојде при Мене, а не ги намрази: татка си и мајка си, и жена си, и децата, и браќата и сестрите, па и својата сопствена душа, не може да биде Мој ученик.

²⁷Кој не го носи својот крст и не оди по Мене, не може да биде Мој ученик.

²⁸Зашто, кој од вас, кога сака да изгради кула, не ќе седне прво да ги пресмета трошоците, дали има со што да ја доврши?

²⁹И, кога ќе ја постави основата, а не може да доврши, сите - кои гледаат - да почнат да му се потсмеваат, велејќи:

³⁰’Овој човек почна да гради, а не можеше да доврши!’

³¹”Или, кој цар, кога оди на војна против друг цар, прво не ќе седне да се посоветува, може ли со десет илјади да издржи пред оној, кој иде против него со дваесет илјади?

³²Ако не може, испраќа пратеници додека е оној уште далеку и ќе моли за мир.

³³Имено така, ако некој од вас не се одрече од сè што има, не може да биде Мој ученик.

³⁴Солта е добра; но ако солта облутави, со што ќе се поправи?

³⁵Ниту е за земјата, ниту за ѓубрето, ја исфрлаат надвор. Кој има уши да слуша - нека слуша.”