Read Библија, Константинов Лука 6 Bible Online

Лука 6 - Библија, Константинов bible

Лука 6

¹Се случи во втората главна сабота, да минува низ посевите, а Неговите ученици кинеа класје, го триеја со рацете и јадеа.

²А некои од фарисеите рекоа: „Зошто го правите тоа, што не е дозволено да се прави во саботни денови?”

³Исус одговори и им рече: „Зар не сте читале што направи Давид кога огладне тој и тие, кои беа со него?

⁴И како влезе во Божјиот Дом, ги зеде поставените лебови и јаде, им даде и на оние, кои беа со него, што никому не е дозволено да ги јадат, а само свештениците.

⁵И им рече: „Човечкиот Син е Господар и на саботата.”

⁶А во една друга сабота влезе во синагогата и поучуваше, а таму имаше и еден човек, чија десна рака беше исушена.

⁷А книжниците и фарисеите Го набљудуваа - дали ќе лекува во сабота - за да можат да Го обвинат.

⁸А Тој ги знаеше нивните мисли и му рече на човекот со исушената рака: „Стани и исправи се на средина!” И стана и се исправи.

⁹А Исус им рече: „Ве прашувам вас: што е дозволено да се прави во сабота: добро или зло? Да се спаси живот или да се погуби?”

¹⁰И ги изгледа сите наоколу и му рече: „Протегни ја раката!” А тој направи така, и раката му стана здрава како другата.

¹¹А тие се исполнија со безумна јарост и се договараа меѓу себе што би можеле да Му направат на Исуса.

¹²Во тие дни се искачи на гората, за да се моли; и ја помина ноќта, молејќи Му се на Бога.

¹³А кога се раздени, ги повика Своите ученици и од нив избра Дванаесетмина, кои и ги нарече апостоли:

¹⁴Симон, кого го нарече и Петар, и брата му Андреја; Јакова и Јована; Филипа и Вартоломеја;

¹⁵Матеја и Тома; Јакова Алфеев и Симона, наречен Зилот;

¹⁶Јуда Јаковов и Јуда Искариотски кој стана и предавник.

¹⁷И кога слезе, заедно со нив, и застана на едно рамно место, и множество Негови ученици и множество народ од цела Јудеја и од Ерусалим, од Тирското и Сидонското приморје,

¹⁸кои дојдоа да Го чујат и да се исцелат од своите болести, и оздравуваа и оние, кои беа измачувани од нечисти духови.

¹⁹И целиот народ сакаше да се допре до Него, зашто од Него излегуваше сила и ги лекуваше сите.

²⁰И Тој ги подигна Своите очи кон Своите ученици и рече: „Блажени сте вие бедните, зашто е ваше Божјото Царство!

²¹Блажени сте вие, кои гладувате сега, зашто ќе се наситите! Блажени сте вие, кои плачете сега, зашто ќе се смеете!

²²Блажени сте кога луѓето ќе ве замразат, и кога ќе ве одделат и ве похулат и го исфрлат вашето име како лошо, заради Човечкиот Син!

²³Радувајте се во тој ден и ликувајте, зашто ете, голема е вашата награда на небото. Зашто нивните татковци им правеа исто така на пророците.

²⁴Но, горко вам богати, зашто ја примивте својата утеха.

²⁵Горко вам, кои сте сити сега, зашто ќе гладувате. Горко вам, кои се смеете сега, зашто ќе жалите и ќе плачете.

²⁶Горко вам, кога сите луѓе ќе зборуваат добро за вас; зашто нивните татковци им правеа така на лажните пророци.

²⁷Но, на вас - кои слушате - ви велам: „Љубете ги своите непријатели; правете им добро на оние, кои ве мразат.

²⁸Благословувајте ги оние, кои ве колнат; молете се за оние, кои ве навредуваат.

²⁹На оној, кој ќе те плесне по едниот образ, заврти му го и другиот; и на тој, кој ти ја зема наметката, не му ја откажувај ни кошулата.

³⁰Дај му на секој, кој бара од тебе. И не барај го назад твоето од оној, кој зема од тебе.

³¹И како што сакате да ви прават луѓето вам, така правете им и вие ним.

³²И ако ги љубите оние, кои ве љубат вас, каква ви е благодарноста? И грешниците ги љубат оние, кои ги љубат нив.

³³И ако им правите добро на оние, кои вам ви прават добро, каква ви е благодарноста? И грешниците го прават истото.

³⁴И ако им позајмувате на оние, од кои се надевате дека ќе добиете, каква ви е благодарноста? И грешниците им позајмуваат на грешниците, за да примат исто толку.

³⁵Туку, љубете ги своите непријатели, правете им добро и позајмувајте им без да чекате нешто. И вашата награда ќе биде голема и ќе бидете синови на Сèвишниот, зашто Тој е благ кон неблагодарните и злите.

³⁶Бидете милостиви како што и вашиот Татко е милостив.

³⁷И не судете и нема да бидете судени; и не осудувајте и нема да бидете осудувани. Проштавајте и ќе ви биде простено!

³⁸Давајте и ќе ви се даде: добра мерка - набиена, натресена, преполнета, ќе ви биде дадена во скутот, зашто со каква мерка мерите, со таква ќе ви се одмери.”

³⁹А им кажа и парабола: „Може ли слепец да води слепец? Зар не ќе паднат обајцата во јама?

⁴⁰Нема ученик над својот учител, секој кој ќе се усоврши ќе биде како Неговиот учител.

⁴¹А зошто ја гледаш раската во окото на својот брат, а не ја забележуваш гредата во своето око?

⁴²Како можеш да му речеш на брата си: ‘Брате, остави ме да ја извадам раската од твоето око!’ А сам не ја гледаш гредата во своето око? Лицемере, извади ја најнапред гредата од своето око, па тогаш ќе гледаш како да ја извадиш раската од окото на твојот брат!

⁴³Нема добро дрво што дава гнил плод; ниту гнило дрво што дава добар плод.

⁴⁴Зашто секое дрво се познава по својот род. Не се берат смокви од трње, ниту грозје од капина.

⁴⁵Добриот човек, од доброто сокровиште на своето срце, изнесува добро; а лошиот човек, од лошото сокровиште изнесува зло, зашто неговата уста зборува од она, што го преполнува неговото срце.

⁴⁶И зошто Ме нарекувате: ‘Господи! Господи!’ а не го правите она, што го велам?”

⁴⁷Секој кој доаѓа при Мене и ги слуша Моите зборови, и ги исполнува, ќе ви кажам кому му е сличен.

⁴⁸Сличен е на човек, кој гради куќа: ископал длабоко и поставил основи на камен, а кога стана наводнение реката се насочи кон куќата, но не можеше да ја помрдне, зашто беше добро изградена.

⁴⁹А кој слуша и не исполнува, приличи на човек, кој соѕидал куќа на земја, без основи. Реката се насочи кон неа, и таа се урна веднаш, и паѓањето на таа куќа беше големо.”