Read Библија, Константинов ВтЗакон. (5 Moj.) 14 Bible Online

ВтЗакон. (5 Moj.) 14 - Библија, Константинов bible

ВтЗакон. (5 Moj.) 14

¹„Вие сте синови на Господа, својот Бог. Не правете си врз себе врезаници ниту потстрижувања на челото за покојникот.

²Па ти си народ посветен на Господа, својот Бог; Господ те избра тебе меѓу сите народи на земјата за да бидеш Негов народ, Негова сопственост.

³Не јадете ништо нечисто.

⁴Ова се животните што можете да ги јадете: волот, овцата, козата,

⁵еленот, срната, срнчето, козорогот, антилопата, биволот и дивата коза;

⁶можете да го јадете секое животно што има раздвоени копита - сосем раздвоени надве - и што прежива.

⁷Од преживарите или од животните со раздвоени копита само овие не смеете да ги јадете: камилата, зајакот и питомиот зајак. Имено, па иако преживаат немаат раздвоени копита, нека бидат нечисти за вас.

⁸А свињата, иако има раздвоени копита, не прежива; нека биде нечиста за вас. Не јадете од нејзиното месо ниту допирајте ја нејзината мрша.

⁹А од сè, што живее во водата ова можете да јадете: сè што има лушпи и перки, можете да јадете.

¹⁰А што нема лушпи и перки не смеете да јадете. Тоа нека биде нечисто за вас.

¹¹Секоја чиста птица можете да ја јадете.

¹²Ама овие не смеете да ги јадете: орелот-стрвник и јастребот,

¹³дивата кокошка, соколот од кој и да е вид;

¹⁴гавранот од било кој вид;

¹⁵нојот, јастребот кокошкар, галебот ни крагујот од било кој вид;

¹⁶бувот, утот и лебедот;

¹⁷неситот, белиот стрвинар и нуркачот;

¹⁸штркот, чапјата од било кој вид; пупунчето и лилјакот.

¹⁹Сите крилести бубачки нека бидат нечисти за вас.

²⁰Сè крилесто чисто можете да јадете.

²¹Не смеете да јадете ништо што ќе пцовиса. Дај му го тоа на придојденикот кој престојува во твоите градови нека јаде, или пак продај му го на туѓинецот. Зашто ти си народ посветен на Господа, својот Бог. Не вари го јарето во млекото на неговата мајка.”

²²„Одвојувај десеток од приходот секоја година сè што ќе роди твоето посеано поле.

²³А тогаш јади го десетокот од своето жито, од своето вино, од своето масло и од првината на својот крупен и ситен добиток во присуство на Господа, својот Бог, на местото што Тој ќе го избере за да го настани таму Своето Име; за да се научиш така да се боиш секогаш од Господа, твојот Бог.

²⁴Ако ти биде патот предолг, па не можеш да го донесеш десетокот - зашто е премногу далеку од тебе местото што Господ го избра за да го настани во него Своето Име - тогаш, кога Господ, твојот Бог, ќе те благослови,

²⁵продај го тоа за сребреници, земи ги сребрениците во раката и оди во местото што го избра Господ, твојот Бог.

²⁶Тогаш купи за сребрениците што сакаш: говедо, ситно животинче, вино или опоен пијалак - што ќе ти посака душата. Таму во присуство на Господа, својот Бог, јади и весели се ти и твоите домашни.

²⁷Не го заборавај левитот, кој ќе биде во твоите градови, зашто тој нема дел ни наследство со тебе.

²⁸На крајот на секоја трета година изнеси го сиот десеток на својот приход од таа година и положи го при твојата врата.

²⁹Па нека дојде левитот - зашто нема дел ни наследство со тебе - придојденикот, сиракот и вдовицата, кои живеат во твојот град, и нека јадат и нека се наситат. Така ќе те благословува Господ, твојот Бог, во сите работи што ќе ги преземе твојата рака.”