Read Библија, Константинов ВтЗакон. (5 Moj.) 20 Bible Online

ВтЗакон. (5 Moj.) 20 - Библија, Константинов bible

ВтЗакон. (5 Moj.) 20

¹„Ако тргнеш во војна против своите непријатели па видиш коњи, коли и народ поброен од себе, не бој се од нив! Та со тебе е Господ, твојот Бог, Кој те изведе од Египетската Земја.

²Пред бојот свештеникот нека истапи и нека му зборува на народот.

³Нека им каже: ‘Чуј, Израеле! Денес тргнувате во бој против своите непријатели. Нека не ви премалува срцето! Не плашете се! Не бојте се! Не треперете пред нив!

⁴Па Господ, вашиот Бог, иде со вас за да се бори за вас против вашите непријатели и да ве спаси.’

⁵Потоа надгледувачите нека му проговорат на народот: ‘Има ли некој што изградил нова куќа а не се вселил во неа? Нека се врати во својата куќа, за да не загине во бојот па да се всели некој друг во неа.

⁶Има ли некој што посадил лозје а уште не го брал? Нека се врати во својот дом, за да не погине во бојот па да не му го обере друг родот.

⁷Има ли некој што се свршил а не се оженил? Нека се врати во својот дом, за да не погине во бојот па да не му ја одведе некој друг свршеницата.’

⁸Воените началници нека продолжат и нека му речат на народот: ‘Кој се бои и кому срцето му е обесхрабрено, нека се врати во својот дом, за да не им се обесхрабрува срцето на неговите браќа како нему.’

⁹Кога надгледувачите ќе го завршат говорот на народот, воените заповедници нека застанат на чело на народот.”

¹⁰„Кога ќе дојдеш под некој град за да се нафрлиш врз него, најнапред понуди му мир.

¹¹Ако ти одговори со мир и ти ги отвори своите врати, сиот народ што ќе го најдеш во него претвори го во поданик, нека работи за тебе.

¹²Но ако го одбие твојот мир и завојува против тебе, опсади го.

¹³Кога Господ, твојот Бог, ти го предаде во рацете, погуби ги со остар меч сите негови машки!

¹⁴А жените, децата, добитокот, сè што ќе биде во градот - сиот плен - земи ги за себе, и уживај го пленот од своите непријатели, што ти го дава Господ, твојот Бог.

¹⁵Така постапувај со сите градови, кои се многу далеку од тебе, кои не се од градовите на овие народи оттука.

¹⁶Во градовите на оние народи, кои Господ, твојот Бог, ти ги предава во наследство не оставај ништо во живот,

¹⁷туку удри ги со клето уништување: Хетејците и Аморејците, Ханаанците и Ферезејците, Евејците и Евусејците, како што Господ, твојот Бог, ти нареди:

¹⁸за да не ве научат да ги правите сите оние одвратности што им ги прават на своите богови, па да не согрешите против Господа, својот Бог.

¹⁹Кога ќе нападнеш некој град па треба да го опсадуваш долго за да го освоиш, не ги уништувај неговите дрва засечувајќи во нив со секирата. Можеш да им го јадеш плодот, а немој да ги сечеш. Зашто полските дрва не се луѓе за да можат да избегаат пред тебе во тврдината.

²⁰Единствено дрвата за кои знаеш дека не се овошки можеш да ги ништиш; нив можеш да ги сечеш и да правиш од нив справи за опсадување на градот што е во војна против тебе, додека не падне.”