Read Библија, Константинов ВтЗакон. (5 Moj.) 22 Bible Online

ВтЗакон. (5 Moj.) 22 - Библија, Константинов bible

ВтЗакон. (5 Moj.) 22

¹„Кога ќе видиш дека скита вол или овца на твојот брат, не поминувај покрај нив, туку отерај ги при својот брат.

²Ако твојот брат не е близу, или не го знаеш, дотерај ги во својата куќа, па нека останат кај тебе додека твојот брат не дојде по нив. Тогаш врати му ги.

³Така прави со неговото осле, и со неговата наметка, и со сè што ќе изгуби твојот брат, а ти ќе го најдеш. Не ти е дозволено да поминуваш покрај неговото.

⁴Кога забележиш дека ослето на твојот брат или неговиот вол паднале на патот, не отстранувај се, но помогни му да ги дигне.”

⁵„Жената не смее да става врз себе машка облека, а мажот не смее да се облекува во женски облеки. Кој го прави тоа, одвратен Му е на Господа, својот Бог.

⁶Ако патем наидеш на птичјо гнездо, со птиченца или со јајца, на дрво или на земјата, а мајката лежи врз птиченцата или на јајцата, не земај ја мајката со пилињата:

⁷пушти ја мајката на слобода, а земи ги пилињата. Така ќе имаш среќа и долг живот.

⁸Кога градиш нова куќа, направи ограда на покривот, за да не ја извалкаш со крв својата куќа, кога некој би паднал од неа.

⁹Не сеј разни семиња во своето лозје, за да не биде изгубен целиот едногодишен приход; и плодот на семето и родот на лозјето.

¹⁰Не впрегнувај во плуг заедно вол и осле.

¹¹Не облекувај се во ткаенина исткана заедно од волна и лен.

¹²Направи реси на четирите краишта на наметката со која се наметнуваш.”

¹³Ако некој маж земе жена и влезе при неа, но ја замрази потоа,

¹⁴и припише неубавини и ја озлогласи, велејќи: ‘Се оженив со неа ама кога и пристапив, не ги најдов во неа знаците на девственоста’,

¹⁵тогаш таткото и мајката на девојката нека го земат доказот на девственоста на девојката, па нека го изнесат пред градските старешини при вратата.

¹⁶Потоа таткото на девојката нека им проговори на градските старешини: ‘На овој човек му ја дадов ќерка си за жена, ама ја замрази.

¹⁷Затоа и припишува сè што е грдо и тврди: „Не ги најдов во твојата ќерка белезите на девственоста.” Но еве ги девствените знаци на мојата ќерка!’ И нека ја распрострат облеката пред градските старешини.

¹⁸Тогаш старешините на оној град нека го земат мажот и нека го казнат;

¹⁹затоа што раширил лош глас за една израелска девица, нека го казнат со глоба од стотина сребреници па нека му ги дадат на таткото на младата жена. И таа нека му биде и натаму жена, да не може да ја отпушти додека е жив.”

²⁰„Но ако обвинението - дека не се најде девственоста во младата жена - биде вистина,

²¹нека ја изведат девојката при куќната врата на нејзиниот татко, па луѓето на нејзиниот град нека ја засипуваат со камења, додека не умре, зашто направила срам во Израел, предавајќи му се на блудот во татковиот дом. Така ќе го откорнеш злото од својата средина.

²²Ако некој маж биде најден како лежи со жена мажена за друг, двата - и мажот кој лежеше со жената и самата жена - нека бидат погубени. Така ќе го откорнеш злото од Израел.

²³Ако млада девица, верена за некого во градот, ја сретне друг човек и легне со неа,

²⁴доведете ги двата при вратата на тој град па ги опсипувајте со камења додека не умрат: девојката зашто не викаше помош од градот, а мажот дека ја оскверни жената на својот ближен. Така ќе го откорнеш злото од својата средина.

²⁵Ако маж наиде во полето на свршена девојка и легне насила со неа, тогаш нека биде погубен само тој што легнал со неа;

²⁶а на девојката не и прави ништо: нема на неа вина со која би заслужувала смрт. Зашто тоа е како кога некој ќе се нафрли врз својот ближен и ќе го убие.

²⁷Тој ја затекна во полето; и ако свршената девојка викаше, немало никој да и прискокне на помош.

²⁸Ако маж наиде на млада девица, која не е верена, па ја грабне и легне со неа, та биде фатен на дело,

²⁹тогаш мажот кој лежеше со неа нека му даде педесет сребреници на моминиот татко. А бидејќи ја оскверни, нека ја земе за жена, да не може да ја пушти додека е жив.

³⁰Нека никој не се жени со жената на својот татко и нека не ја открива татковата покривка.”