Read Библија, Константинов Јован 17 Bible Online

Јован 17 - Библија, Константинов bible

Јован 17

¹Кога Исус го изговори тоа, ги подигна очите кон небото и рече: „Татко, часот дојде! Прослави Го Својот Син, за да Те прослави Синот Тебе,

²како што си му дал власт над секое тело, па да му даде на сè - што си Му дал - вечен живот.

³А ова е вечен живот: да Те познаат Тебе, Единствениот вистински Бог, и Исуса Христа, Кого си Го испратил.

⁴Јас Те прославив на земјата, го свршив делото, што Ми го даде да го извршам;

⁵а сега, Татко, прослави Ме Ти - во Себе Самиот - со славата што ја имав при Тебе, пред создавањето на светот.”

⁶”Им го јавив Твоето Име на луѓето, кои Ми ги даде од светот. Твои беа, и Ми ги даде Мене, и го запазија Твоето Слово.

⁷Сега сознаа дека е од Тебе сè, што си Ми дал;

⁸зашто зборовите, што Ми ги даде, им ги предадов ним, а тие ги примија и навистина сознаа дека излегов од Тебе, и поверуваа дека Ти Ме испрати.

⁹Јас се молам за нив; не се молам за светот, туку за оние, кои Ми ги даде, зашто се Твои,

¹⁰и сè Мое - е Твое, и Твоето - Мое; и се прославив во нив.

¹¹И не Сум повеќе во светот, а тие се во светот, Јас идам при Тебе. Свети Татко, запази ги во Твое име оние, кои Ми ги даде, за да бидат едно, како што Сме и Ние.

¹²Додека бев со нив, Јас ги чував во Твое име оние, кои Ми ги даде, и ги запазив, па ниеден од нив не погина, освен синот на гибелта за да се исполни Писмото.

¹³А сега идам при Тебе, и го зборувам ова во светот, за да ја имаат Мојата радост полна во себе.

¹⁴Јас им го предадов Твоето Слово и светот ги замрази, зашто не се од светот, како што и Јас не Сум од светот.

¹⁵Не Те молам да ги земеш од светот, туку да ги запазиш од лукавиот.

¹⁶Тие не се од светот, како што ни Јас не Сум од светот.

¹⁷Освети ги во Својата вистина, Твоето Слово е вистината.

¹⁸Како што Ти Ме испрати Мене во светот, така и Јас ги испратив во светот;

¹⁹За нив се осветувам Себеси, за да бидат и тие осветени во вистината.

²⁰Но не се молам само за нив, туку и за оние, кои преку нивните зборови - ќе веруваат во Мене,

²¹за да бидат сите едно; како што си Ти, Татко, во Мене, и Јас во Тебе, така и тие да бидат едно во Нас, за да верува светот дека Ти Ме испрати.

²²И славата што Ми ја даде, им ја дадов ним, за да бидат едно, како што Сме Ние едно;

²³Јас во нив, а Ти во Мене, за да бидат совршени во едно, за да знае светот дека Ти си Ме испратил, и дека ги љубеше нив, како што Ме љубеше Мене.

²⁴Татко, сакам оние, кои си Ми ги дал, да бидат со Мене таму каде што Сум Јас, за да ја гледаат Мојата слава, што Ми ја даде, зашто Ме љубеше пред создавањето на светот.

²⁵Праведен Татко, светот не Те запозна, а Јас Те запознав, и овие познаа дека Ти си Ме пратил.

²⁶Им го објавив Твоето име и ќе го објавувам, па љубовта, со која Ме возљуби, да биде во нив, и Јас во нив.”