Read Библија, Константинов Јован 18 Bible Online

Јован 18 - Библија, Константинов bible

Јован 18

¹Штом го рече тоа, Исус излезе со Своите ученици преку потокот Кедрон, каде имаше градина, во која влезе со Своите ученици.

²А Јуда, Неговиот предавник, го знаеше тоа место, зашто Исус често се состануваше со Своите ученици таму.

³Тогаш Јуда зеде чета и служители од првосвештениците и од фарисеите, и дојде таму со светилки, факли и оружје.

⁴А Исус, знаејќи сè што ќе стане со Него, истапи и им рече: „Кого го барате?”

⁵Му одговорија: „Исуса Назареецот.” Исус им рече: „Јас Сум.” А со нив стоеше и Јуда, Неговиот предавник.

⁶А кога им рече: „Јас Сум”, се тргнаа назад и паднаа на земјата.

⁷Тогаш пак ги праша: „Кого го барате?” А тие рекоа: „Исуса Назареецот!”

⁸Исус им одговори: „Ви реков дека Сум Јас; и така, ако Ме барате Мене, пуштете ги овие да си одат!”

⁹За да се исполни словото, што го рече: „Не изгубив ни еден од оние, кои си Ми ги дал.”

¹⁰А Симон Петар имаше меч, го извлече, го удри слугата на првосвештеникот и му го отсече десното уво; а името на слугата му беше Малх.

¹¹Тогаш Исус му рече на Петра: „Стави го мечот во ножницата! Зар да не ја пијам чашата, што ми ја даде Мојот Татко?”

¹²Тогаш четата, заповедникот и јудејските слуги Го фатија Исуса и Го врзаа,

¹³и Го одведоа првин при Ана; имено, тој му беше тест на Кајафа, кој беше првосвештеник во онаа година.

¹⁴А Кајафа беше оној, кој ги посоветува Јудејците, дека е подобро да умре еден човек за народот.

¹⁵По Исуса одеа: Симон Петар и еден друг ученик. Ученикот му беше познат на првосвештеникот, и влезе со Исуса во првосвештениковиот двор.

¹⁶А Петар стоеше надвор, пред вратата. Тогаш другиот ученик, кој му беше познат на првосвештеникот, излезе, проговори со вратарката и го воведе Петра.

¹⁷Тогаш слугинката, вратарка, му рече на Петра: „Да не си и ти еден од учениците на Човеков?” Тој рече: „Не сум.”

¹⁸А слугите и служителите беа запалиле оган и стоеја, и се грееја, зашто беше студено; и Петар стоеше со нив и се грееше.

¹⁹Првосвештеникот пак Го праша Исуса за Неговите ученици и за Неговата наука.

²⁰Исус му одговори: „Јас му зборував на светот јавно; секогаш поучував во синагогите и во Храмот, каде се собираат сите Јудејци, и ништо не говорев тајно.

²¹Зошто Ме прашуваш Мене? Прашај ги оние, кои чуја, што Сум им зборувал тие знаат што Сум говорел.”

²²Кога го рече тоа, еден од присутните службеници Го удри Исуса по образ и рече: „Така ли му одговараш на првосвештеникот?”

²³Исус му одговори: „Ако реков лошо, докажи дека е лошо; а ако реков добро, зошто Ме удираш?”

²⁴Тогаш Ана Го прати врзан при првосвештеникот Кајафа.

²⁵А Симон Петар стоеше таму и се грееше. И му рекоа: „Да не си и ти од Неговите ученици?” Тој одрече: „Не сум.”

²⁶Еден од слугите на првосвештеникот, роднина на оној, кому Петар му го отсече увото, рече: „Нели јас те видов во градината со Него?”

²⁷Но Петар одрече повторно, и веднаш запеа петел.

²⁸Тогаш го одведоа Исуса од Кајафа во преторијата; а беше утро; и тие не влегоа во преторијата, за да не се осквернат, туку да можат да ја јадат Пасхата.

²⁹Затоа Пилат излезе пред нив и рече: „Какво обвинение поднесувате против Човеков?”

³⁰Во одговор му рекоа: „Ако Овој не беше злодеец, немаше да ти Го предадеме.”

³¹А Пилат им рече: „Земете Го и судете Му според вашиот Закон.” Јудејците му рекоа: „Нам не ни е дозволено да убиеме некого,”

³²- за да се исполни Исусовиот збор, со кого навести со каква смрт ќе умре.

³³Потоа Пилат се врати во преторијата, Го повика Исуса и Му рече: „Ти ли си Јудејскиот Цар?”

³⁴Исус одговори: „Го зборуваш ли тоа сам од себе, или други ти кажаа за Мене?”

³⁵Пилат одговори: „Јудеец ли сум јас? Твојот народ и првосвештениците Те предадоа на мене. Што си сторил?”

³⁶Исус одговори: „Моето Царство не е од светов; ако Моето Царство беше од овој свет, Моите воини би се бореле да не им бидам предаден на Јудејците; но Моето Царство не е оттука.”

³⁷Пилат на тоа му рече: „Сепак си Цар?” Исус одговори: „Ти велиш дека Сум Цар. Јас се родив за тоа и за тоа дојдов на светот, за да сведочам за вистината. Секој - кој е од вистината - го слуша Мојот глас.”

³⁸Пилат Му рече: „Што е вистина?” Штом го рече тоа, излезе пак при Јудејците и им рече: „Јас не наоѓам никаква вина во Него.

³⁹А при вас е обичај да ви пуштам по еден на Пасхата. И така, сакате ли да ви Го пуштам Јудејскиот Цар?”

⁴⁰Тогаш повторно извикаа, велејќи: „Не Овој, туку Варава!” А Варава беше разбојник.