Read Библија, Константинов Дела Ап. 1 Bible Online

Дела Ап. 1 - Библија, Константинов bible

Дела Ап. 1

¹Во првата книга, о Теофиле, го напишав сè она што Исус почна да го врши и учи,

²до денот кога се вознесе, откако преку Светиот Дух им даде заповеди на апостолите, кои ги беше избрал,

³на кои им се претстави жив по Своето страдање, со многу веродостојни докази: јавувајќи им се четириесет дена и им зборуваше за Божјото Царство.

⁴И додека беше заедно со нив, им заповеда да не се оддалечуваат од Ерусалим, туку да го чекаат ветувањето на Таткото, „што го чувте од Мене”:

⁵Јован крштаваше во вода, а вие ќе бидете крстени во Светиот Дух, не по многу дни!”

⁶А собраните Го прашаа со овие зборови: „Господи сега ли ќе го востановиш Израелевото Царство?”

⁷А Тој им рече: „Не е ваше да ги знаете времињата и настаните, што Таткото ги одреди со Својата власт.

⁸Туку ќе примите сила кога Светиот Дух ќе слезе на вас и ќе Ми бидете сведоци како во Ерусалим, така и во цела Јудеја, и во Самарија, и сè до крајот на земјата.”

⁹И кога го рече тоа, се вознесе пред нивните очи, и еден облак Го зеде од пред нивните погледи.

¹⁰И кога гледаа кон небото, додека Тој се вознесуваше, ете двајца мажи во бела облека застанаа покрај нив

¹¹и им рекоа: „Мажи, Галилејци, зошто стоите и гледате во небото? Овој Исус, Кој од вас се вознесе во небото, ќе дојде така, како што Го видовте да оди во небо.”

¹²Тогаш се вратија во Ерусалим, од Гората, која се вика Маслинова, што е близу до Ерусалим, еден саботен ден одење.

¹³И кога влегоа во куќата, се искачија во горната одаја, каде живееја: Петар и Јован, Јаков и Анрдеј, Филип и Тома, Вартоломеј и Матеј, Јаков Алфеев и Симон Зилот, и Јакововиот брат Јуда.

¹⁴Сите овие еднодушно и постојано беа во молитва, заедно со некои жени и со Марија, Исусовата мајка, и со Неговите браќа.

¹⁵А во тие дни Петар стана, меѓу браќата, а имаше собрано множество - околу сто и дваесет души - и рече:

¹⁶”Браќа, требаше да се исполни Писмото, што Светиот Дух го прорече преку Давидовата уста, за Јуда, кој им беше предводник на оние, кои Го фатија Исуса;

¹⁷тој беше во нашиот број и беше добил дел од службава.

¹⁸Имено, тој придоби нива со злосторничка плата; и падна ничкум и пукна по средина, и се истури целата негова утроба.

¹⁹И тоа им стана познато на сите жители на Ерусалим, така што нивата е наречена на нивниот јазик Акелдама, што значи „Крвна Нива.”

²⁰Зашто, во книгата на Псалмите е напишано: ‘Неговиот дом да биде пуст и да нема кој да живее во него!’ а ‘неговата служба да ја прими друг.’

²¹И така, потребно е пак, еден од оние луѓе, кои беа со нас за сето време, откако Господ Исус дојде при нас и си отиде од нас -

²²почнувајќи од Јовановото крштавање до денот, кога се вознесе од нас да биде сведок заедно со нас, на Неговото воскресение.”

²³И поставија двајца: Јосифа, наречен Варсава, наречен Јуст, и Матиј.

²⁴И се помолија, велејќи: „Господи, Ти, Кој ги познаваш срцата на сите, покажи ни кого си го избрал од овие двајца,

²⁵да го прими местото во оваа служба и во апостолството, од кое отстапи Јуда, за да отиде на свое место!”

²⁶И фрлија жрепки за нив; и жрепката падна за Матија и тој се вброи во Единаесетте апостоли.