Read Библија, Константинов Дела Ап. 11 Bible Online

Дела Ап. 11 - Библија, Константинов bible

Дела Ап. 11

¹И апостолите и браќата во Јудеја чуја дека и народите го примиле Божјото слово,

²и кога Петар дојде горе во Ерусалим, обрезаните се препираа со него,

³велејќи: „Влезе кај необрезани луѓе и јадеше со нив!”

⁴Тогаш Петар почна да им зборува и да им излага редум:

⁵”Бев во градот Јопија и се молев; и во занес имав видение, како некаков сад, како големо платно, што на своите четири краишта слегува од небото, и дојде до мене.

⁶Кога погледнав во него и разгледав, видов во него четвороножни земни животни, и ѕверови, и лазачи и небесни птици.

⁷И чув глас, кој ми рече: „Стани, Петре! Коли и јади!”

⁸А јас реков: „Не, Господи, зашто ништо погано или нечисто никогаш не влегло во мојата уста.

⁹Тогаш гласот од небото ми рече по вторпат: „Она што Бог го очистил, не наречувај го нечисто!”

¹⁰Тоа се случи трипати и пак сè беше одвлечено горе на небо.

¹¹И, ете, во тој час три човека, испратени од Ќесарија до мене, застанаа пред куќата во која бевме.

¹²Тогаш Духот ми рече да одам со нив, не размислувајќи. И овие шестмина браќа дојдоа со мене и влеговме во куќата на човекот.

¹³Тогаш тој ни раскажа како во својата куќа видел ангел, кој застанал и му рекол: „Прати во Јопија и повикај го Симона, кој се вика Петар!

¹⁴Тој ќе ти каже зборови, преку кои ќе се спасиш ти и целиот твој дом.”

¹⁵И кога почнав да зборувам, Светиот Дух слезе на нив, како и на нас во почетокот.

¹⁶Тогаш се сетив на Господовите зборови: „Јован крштаваше со вода, а вие ќе бидете крстени во Светиот Дух.

¹⁷И така, ако Бог им даде ист дар, кога поверуваа во Господа Исуса Христа, како и нам, кој сум јас да можам да Му го забранам тоа на Бога?”

¹⁸Кога го чуја тоа, се смирија и Го славеа Бога, велејќи: „И така, Бог им даде и на народите покајание за живот!”

¹⁹А оние, кои беа распрснати заради гонењето, по Стефана, поминаа сè до Феникија, Кипар и Антиохија, не проповедајќи му го никому Словото, освен на Јудејците.

²⁰А некои од нив беа Кипарци и Киринејци, кои - кога дојдоа во Антиохија - им зборуваа и на Грците, навестувајќи Го Господа Исуса.

²¹И Господовата рака беше со нив и голем број поверува и Му се обрати на Господа.

²²И кога веста за нив дојде до ушите на црквата во Ерусалим, го испратија Варнава во Антиохија.

²³Тој дојде и ја виде Божјата благодат, се зарадува и ги опоменуваше сите да останат во Господа со одлучно срце.

²⁴Имено, тој беше добар човек, полн со Светиот Дух и со вера; и големо множество се присоедини кон Господа.

²⁵Тогаш отиде во Тарс да го побара Савла; и кога го најде, го доведе во Антиохија.

²⁶И така, цела година се собираа во црквата и поучија големо множество. И прво во Антиохија учениците ги нарекоа христијани.

²⁷Во тие денови пророци од Ерусалим слегоа во Антиохија.

²⁸И едниот од нив, по име Агав, стана и објави преку Духот, дека ќе биде голем глад по целиот свет; која и беше при Клаудиј.

²⁹Тогаш учениците одлучија - секој според своите можности да им испрати помош на браќата во Јудеја.

³⁰Тоа и го направија, испраќајќи им на старешините преку Варнава и Савла.