Read Библија, Константинов Дела Ап. 13 Bible Online

Дела Ап. 13 - Библија, Константинов bible

Дела Ап. 13

¹Во Антиохиската црква имаше пророци и учители: Варнава, и Симеон наречен Нигер, па Луциј Киринеец, Манаин, кој беше воспитан заедно со четворовласникот Ирод, и Савле.

²И кога Му служеа на Господа и постеа, Светиот Дух рече: „Одвојте ми ги Варнава и Савла за делото за кое ги повикав!”

³Тогаш, откако постеа и се помолија, ги положија рацете на нив и ги пуштија.

⁴И така тие - испратени од Светиот Дух - слегоа во Селевкија и оттаму отпловија за Кипар.

⁵И кога дојдоа во Саламина, го проповедаа Божјото слово во јудејските синагоги, а го имаа и Јована за помошник.

⁶И кога го поминаа целиот остров до Пафос, најдоа некој маѓепсник, лажен пророк, Јудеец, по име Варисус,

⁷кој беше со проконзулот Сергиј Павле, умен човек. Овој ги повика Варнава и Савле и посака да го чуе Божјото Слово.

⁸Но им се спротивстави Елим маѓепсникот, - зашто така се преведува неговото име - настојувајќи да го одврати проконзулот од верата.

⁹Тогаш Савле - кој се вика и Павле - исполнет со Светиот Дух, го насочи погледот кон него и рече:

¹⁰”О, ти полн со секакво лукавство и злоба, ѓаволски сине, непријателу на секоја праведност, нема ли да престанеш да ги искривуваш правите Господови патишта?!

¹¹И, еве, сега Господовата рака паѓа на тебе: ќе бидеш слеп и за некое време не ќе го гледаш сонцето!” И во истиот миг паднаа на него мрак и темнина; и тој одеше наоколу и бараше луѓе, кои ќе го водат.

¹²Тогаш проконзулот, откако виде што стана, поверува, восхитувајќи и се на Господовата наука.

¹³А Павле и неговите придружници отпловија од Пафос и дојдоа во Памфилиска Пергија. Тука Јован се оддели од нив и се врати во Ерусалим.

¹⁴А тие заминаа од Пергија и дојдоа во Писидиска Антиохија; и влегоа во синагогата во саботен ден, и седнаа.

¹⁵А по читањето на Законот и Пророците, старешините на синагогата испратија до нив да им кажат: „Браќа, ако имате некакво утешно слово за народот, зборувајте!”

¹⁶Тогаш Павле стана, мавна со раката и рече: „Мажи Израелци и вие други, кои се боите од Бога, чујте!

¹⁷Бог на овој Израелски народ ги избра нашите татковци и го издигна народот во туѓина, во Египетската Земја, и со воздигната рака ги изведе од таа земја,

¹⁸и околу четириесет години ги трпеше во пустината;

¹⁹и уништи седум народи во Хананската Земја, и им ја даде во наследство нивната земја;

²⁰за околу четири стотини и педесет години. Потоа им ги даде судиите до пророкот Самоил.

²¹Оттогаш побараа цар, и Бог им го даде Саула синот Кисов, човек од Венијаминовото племе, за четириесет години.

²²Кога го отфрли овој, им го подигна за цар Давида, за кого посведочи и рече: ‘Го најдов Давида, синот Есеев, човек по Моето срце, кој ќе ја исполни целата Моја волја.’

²³Од неговото потомство Бог - според ветувањето - му го подигна на Израел: Спасителот Исуса,

²⁴откако Јован, пред Неговото доаѓање, му проповедаше на целиот Израелски народ покајно крштавање.

²⁵А кога Јован ја исполни својата должност, велеше: „Јас не сум Оној, што вие мислите; туку, ете, по мене иде Еден, Кому не сум достоен да Му ги одврзам обувките на нозете.

²⁶Браќа, синови на Авраамовиот род, и вие, кои се боите од Бога, меѓу нив, нам ни е испратено словото за ова спасение.

²⁷Зашто жителите на Ерусалим и нивните началници не Го познаа, туку Го осудија и така ги исполнија пророчките зборови, што се читаат секоја сабота.

²⁸Иако не најдоа никаква вина, која заслужува смрт, бараа од Пилата да Го погуби.

²⁹И кога исполнија сè што е напишано за Него, Го симнаа од дрвото и Го положија во гроб.

³⁰Но Бог Го воскресна од мртвите.

³¹И повеќе денови им се јавуваше на оние, кои со Него од Галилеја отидоа горе во Ерусалим, а кои се сега Негови сведоци пред народот.”

³²”И ние ви го проповедаме Евангелието за ветувањето дадено на татковците, дека Бог го исполни на нас, нивните деца, кога Го воскресна Исуса,

³³како што е напишано во вториот псалм: ‘Ти си Мој Син, Јас Те родив денес.’

³⁴А дека Го воскресна од мртвите и дека веќе не се враќа во гниењето рече вака: ‘Вам ќе ви ги исполнам светите и верните зборови Давидови.’

³⁵Затоа и во друг псалм вели: ‘Нема да дозволиш Твојот Светец да види гниење.’

³⁶А Давид му послужи на своето поколение и според Божјата волја заспа и им се придружи на своите татковци и виде гниење.

³⁷А Оној, Кого Бог Го воскресна, не виде гниење.

³⁸И така, мажи браќа, знајте дека преку Овој ви се навестува простување на гревовите;

³⁹и од сè од што не можевте да се оправдате преку Мојсеевиот Закон, преку Него се оправдува секој, кој верува.

⁴⁰И така, гледајте да не дојде на вас, што е речено во пророците:

⁴¹’Видете, вие кои презирате, чудете се и исчезнете! Зашто Јас правам дело - во вашите денови - дело во кое нема да поверувате, ако некој би ви раскажувал.’

⁴²А кога излегуваа, ги молеа да им ги проповедаат овие зборови и во идната сабота.

⁴³Кога собирот се разотиде, многу Јудејци и прозелити, кои Го почитуваа Бога, појдоа по Павла и Варнава. Тие им зборуваа и ги наговоруваа да останат во Божјата благодат.

⁴⁴А во идната сабота се собра скоро целиот град да го чуе Божјото слово.

⁴⁵А кога Јудејците видоа множество, се исполнија со завист и со хулење говореа против Павловите зборови.

⁴⁶Тогаш Павле и Варнава им рекоа одлучно: „Требаше најнапред вам да ви се проповеда Божјото Слово; но бидејќи вие го отфрлате од себе и не се сметате достојни за вечниот живот, еве, ние им се обраќаме на народите,

⁴⁷зашто Господ ни заповеда така: ‘Те поставив за светлина на народите, да им бидеш спасение до крајот на земјата.’

⁴⁸Кога народите го чуја тоа, се радуваа и го славеа Господовото слово и поверуваа мнозина, кои беа определени за вечниот живот.

⁴⁹И Господовото слово се распространуваше по целата земја.

⁵⁰А Јудејците ги поттикнаа угледните и побожните жени и градските првенци, и подигнаа гонење против Павла и Варнава, и ги изгонија од своите предели.

⁵¹Овие го истресоа правот од своите нозе против нив и дојдоа во Иконија.

⁵²А учениците се исполнија со радост и со Светиот Дух.