Read Библија, Константинов Дела Ап. 15 Bible Online

Дела Ап. 15 - Библија, Константинов bible

Дела Ап. 15

¹А некои дојдоа од Јудеја, и ги учеа браќата: „Ако не се обрежете според Мојсеевиот обичај, не можете да се спасите.”

²А кога Павле и Варнава се впуштија во не мала расправа со нив, определија Павле и Варнава и уште некои од нив, да се искачат во Ерусалим, при апостолите и старешините заради тоа прашање.

³И така, испратени од црквата, поминаа низ Феникија и Самарија, раскажувајќи за обратувањето на народите, и правејќи им голема радост на сите браќа.

⁴Кога стигнаа во Ерусалим, беа примени од црквата, од апостолите и старешините; и раскажаа сè што направил Бог со нив.

⁵Тогаш станаа некои од фарисејската следба, кои поверуваа, и рекоа, дека треба да бидат обрезани и да им се нареди да го пазат Мојсеевиот Закон.

⁶Апостолите и старешините се собраа да ја разгледаат таа работа

⁷и бидејќи настана големо расправање, Петар стана и им рече: „Мажи, браќа! Вие знаете дека Бог веќе од првите денови ме избра меѓу вас, за да го чујат народите од мојата уста словото на Евангелието и да поверуваат.

⁸И Бог, Кој ги познава срцата, посведочи на нив, кога им Го даде Светиот Дух, како и нам.

⁹И не постави никакви разлики меѓу нас и нив, зашто преку вера ги очисти нивните срца.

¹⁰Зошто сега Го искушувате Бога, ставајќи им на вратот на учениците јарем, кого ни нашите татковци ни ние не можевме да го носиме?

¹¹Но ние веруваме дека ќе се спасиме исто како и тие, преку благодатта на Господа Исуса.”

¹²Тогаш замолкна целото множество и ги слушаа Варнава и Павла, кои раскажуваа колку чуда и знаци направи Бог, преку нив, меѓу народите.

¹³Кога тие свршија да зборуваат, проговори Јаков и рече: „Мажи браќа, послушајте ме!

¹⁴Симон ви кажа како Бог, најпрво, се погрижи да си земе луѓе од народите за Своето име.

¹⁵И со тоа се слагаат пророчките зборови, како што е напишано:

¹⁶’После ова ќе се вратам и пак ќе го изградам Давидовиот дом, кој падна; и пак ќе ги изградам неговите урнатини, и пак ќе го подигнам;

¹⁷за да Го побараат Господа другите луѓе и сите народи, кои се наречуваат со Моето име, говори Господ, Кој ги прави овие работи.

¹⁸Познати Му се на Бога сите Негови дела од вечноста.’

¹⁹Затоа сум на мнение дека не треба да ги вознемируваме оние, кои од многубошците Му се обраќаат на Бога;

²⁰туку да им се напише да се воздржуваат од она, што е онечистено од идолите, од блудство, од удавено и од крв.

²¹Зашто Мојсеј има проповедници, од дамни времиња, во секој град: го читаат во синагогите, секоја сабота.”

²²Тогаш апостолите и старешините, со целата црква, одлучија да изберат меѓу себе некои луѓе и да ги испратат со Павла и Варнава во Антиохија: Јуда, наречен Варсава, и Сила, водечки луѓе меѓу браќата,

²³и по нив го испратија ова писмо: „Апостолите и старешините, ваши браќа, ги поздравуваат браќата од народите во Антиохија, Сирија и Киликија!

²⁴Бидејќи чувме дека некои од нас, на кои ништо не им заповедавме ве збуниле со зборови и ги смутиле вашите души,

²⁵одлучивме еднодушно да избереме мажи и да ги пратиме при вас, со нашите возљубени Павле и Варнава,

²⁶со луѓето, кои ги предадоа своите души за нашиот Господ Исус Христос.

²⁷И така, ви ги испраќаме Јуда и Сила, кои ќе ви го соопштат и усно истово.

²⁸Имено, Светиот Дух и ние одлучивме да не ставаме на вас никакво друго бреме, освен овие потребни работи:

²⁹да се воздржувате од жртвуваното на идолите, од крв, и од удавено и од блудство; ако се пазите од тоа, добро ќе направите. Бидете здрави!”

³⁰И така пратените слегоа во Антиохија, го собраа народот и го предадоа писмото.

³¹А кога го прочитаа, се зарадуваа на утехата.

³²Јуда пак и Сила, кои и самите беа пророци, ги тешеа и ги утврдуваа браќата со многу зборови.

³³И откако поминаа таму некое време, браќата ги испратија со мир при оние, кои ги беа пратиле.

³⁴Сила пак одлучи да остане таму.

³⁵А Павле и Варнава останаа во Антиохија, каде заедно со многу други поучуваа и го проповедаа Господовото слово.

³⁶По неколку дена Павле му рече на Варнава: „Да се вратиме пак и да ги посетиме браќата по сите градови, каде го проповедавме Господовото слово, за да видиме како се!”

³⁷А Варнава сакаше да го поведат со себе и Јована, наречен Марко.

³⁸А Павле сметаше дека не треба да го водат оној, кој се одделил од нив во Памфилија и не беше пошол со нив на дело.

³⁹И дојде до расправа, така што се разделија еден од друг. Варнава го зеде со себе Марка и отплови за Кипар;

⁴⁰а Павле го избра Сила и тргна, предаден од браќата на Господовата благодат.

⁴¹И поминуваше низ Сирија и Киликија и ги утврдуваше црквите.