Read Библија, Константинов Дела Ап. 18 Bible Online

Дела Ап. 18 - Библија, Константинов bible

Дела Ап. 18

¹Потоа Павле тргна од Атина и дојде во Коринт.

²Таму најде еден Јудеец по име Акила, родум од Понт, кој неодамна беше дошол од Италија, заедно со својата жена Прискила, зашто Клаудиј заповеда сите Јудејци да го напуштат Рим. Дојде при нив,

³зашто беше со истиот занает, остана кај нив и работеше; зашто нивниот занает беше да прават шатори.

⁴А секоја сабота расправаше во синагогата и ги убедуваше Јудејците и Грците.

⁵А кога Сила и Тимотеј слегоа од Македонија, Павле беше подбудуван во духот ревносно да сведочи на Јудејците дека Исус е Месија.

⁶Но, бидејќи тие се противеа и хулеа, тој ги истресе своите облеки и им рече: „Вашата крв на вашите глави! Јас сум чист и отсега ќе одам при народите.”

⁷И се премести оттаму и дојде во домот на некој си Тициј Јуст, богобојазлив човек, а чија куќа беше до синагогата.

⁸И Крисп, началник на синагогата, со целиот свој дом, поверува во Господа; и многу Коринтјани, кои го слушаа, поверуваа и се крштаваа.

⁹А Господ му рече на Павла, ноќе, во видение: „Не бој се! Но зборувај и не замолкнувај,

¹⁰зашто Јас Сум со тебе! И никој нема да те допре, за да ти направи некакво зло, зашто имам многу народ во овој град.”

¹¹И така преседе година и шест месеци и ги поучуваше во Божјото слово.

¹²А кога Галион беше управител на Ахаја, Јудејците се подигнаа еднодушно против Павла и го доведоа пред судската столица,

¹³велејќи: „Овој човек ги наговорува луѓето да Го почитуваат Бога спротивно на Законот.”

¹⁴Кога Павле сакаше да ја отвори устата, Галион им рече на Јудејците: „Ако беше прашање за некаква неправда или за зло дело, о Јудејци, се разбира, би требало да ве трпам.

¹⁵Но ако тоа е прашање за некој збор, за имињата и за вашиот Закон, разгледајте сами; јас не сакам да бидам судија во тие работи.”

¹⁶И ги истера од судската столица.

¹⁷Тогаш сите Грци го фатија началникот на синагогата Состена и го биеја пред судската столица, а Галион не сакаше ни да знае за тоа.

¹⁸Павле остана таму уште многу денови; и тогаш се прости со браќата и отплови за Сирија, а со него Прискила и Акила; во Кенхреја ја острига главата, зашто имаше завет за тоа.

¹⁹А кога стигнаа во Ефес, ги остави, а самиот влезе во синагогата да расправа со Јудејците.

²⁰А кога го замолија да остане подолго време, не се согласи,

²¹туку се прости со нив и рече: „Бездруго празникот што иде треба да го поминам во Ерусалим; и ако Му биде угодно на Бога, пак ќе се вратам при вас.” И отплови за Ефес.

²²Кога стигна во Ќесарија, се искачи во Ерусалим; ја поздрави црквата и слезе во Антиохија.

²³И откако помина таму некое време, излезе и ги обиколуваше редум Галатската област и Фригија, утврдувајќи ги сите ученици.

²⁴А некој си Јудеец, по име Аполос, родум Александриец, човек красноречив и мошне упатен во Писмата, дојде во Ефес.

²⁵Тој беше поучен во Господовиот Пат, и со својот распален дух зборуваше и учеше точно за Исуса, иако го знаеше само Јовановото крштавање.

²⁶Тој почна да проповеда смело во синагогата; а кога чуја Прискила и Акила го зедоа при себе, и му го изложија поточно Божјиот Пат.

²⁷Кога сакаше да замине за Ахаја, браќата го охрабрија и им напишаа на учениците да го примат. Кога дојде, многу им помогна на оние, кои беа поверувале преку благодатта;

²⁸зашто тој силно и јавно ги побиваше Јудејците, докажувајќи од Писмата дека Исус е Христос.