Read Библија, Константинов Дела Ап. 2 Bible Online

Дела Ап. 2 - Библија, Константинов bible

Дела Ап. 2

¹А кога дојде денот на Педесетница, сите беа заедно на исто место.

²И одненадеж стана шум од небото, како кога дува силен ветер и ја исполни целата куќа, во која седеа.

³И им се јавија јазици како од оган, кои се разделија и над секого од нив застана по еден.

⁴И тие сите се наполнија со Светиот Дух, и почнаа да зборуваат на други јазици, како што Духот им даваше да говорат.

⁵А тогаш се наоѓаа во Ерусалим побожни Јудејци, од сите народи под небото.

⁶И кога се чу шумот, се собра народот и се збуни, зашто секој слушаше како зборуваат на неговиот јазик.

⁷Сите се восхитуваа и чудеа, велејќи: „Ете, зар сите што зборуваат не се Галилејци?

⁸Тогаш како ние го слушаме секој својот јазик, во кој сме родени?

⁹Партјаните, и Мидјаните и Елемитите и жителите на Месопотамија, Јудеја и Кападокија, Понт и Азија,

¹⁰Фригија и Памфилија, Египет и од краиштата на Ливија, околу Киринија; и Римјаните кои дошле, Јудејците и прозелитите,

¹¹Критјаните и Арабјаните: ги слушаме како зборуваат на нашите јазици, за големите Божјите дела.”

¹²Сите се восхитуваа и во недоумение си велеа еден на друг: „Што може да биде ова?”

¹³Други пак се подсмевнуваа и велеа: „Се напиле слатко вино!”

¹⁴А Петар стана, со Единаесетмината, и го поткрена гласот и им рече: „Јудејци и сите вие, кои живеете во Ерусалим! Знајте го ова и послушајте ги моите зборови!

¹⁵Овие луѓе не се пијани, како што мислите вие - зашто е едвај третиот час на денот -

¹⁶туку тоа е кажаното преку пророкот Јоил:

¹⁷’Во последните денови - вели Господ - ќе излеам од Својот Дух на секое тело, и вашите синови и вашите ќерки ќе пророкуваат, и вашите младинци ќе гледаат виденија, а вашите старци ќе сонуваат соништа.

¹⁸Исто така, во тоа време, и на Своите слуги и на Своите слугинки ќе излеам од Мојот Дух и ќе пророкуваат.

¹⁹Ќе направам чудеса горе на небото, а знаци долу на земјата; крв и оган и пареа од дим.

²⁰Сонцето ќе се претвори во темнина, и месечината во крв, пред да дојде великиот и славен Господов ден.

²¹И секој кој ќе го повика Господовото име, ќе се спаси.’

²²Мажи Израелци! Чујте ги овие зборови: Бог во вашата средина Го потврди Исуса Назареецот со сили, чуда и знаци, што Бог ги направи преку Него меѓу вас, како што знаете самите.

²³Вие, Него, откако беше предаден според одредената волја и промисла Божја, преку рацете на беззакониците Го распнавте и убивте,

²⁴но Бог Го ослободи од смртните болки и Го подигна, зашто не беше можно смртта да Го задржи.

²⁵Зашто Давид вели за Него: ‘Постојано Го гледам Господа пред себе; Тој ми е оддесно, за да не се поместам.

²⁶Затоа се развесели моето срце и се зарадува мојот јазик; а и моето тело ќе почива во надеж;

²⁷зашто нема да ја оставиш мојата душа во Подземјето, ниту ќе дозволиш Твојот Светец да види распаѓање.

²⁸Ти ми ги покажа патиштата на животот, ќе ме исполниш со веселба пред Своето лице.’

²⁹Мажи, браќа! Можам да ви речам слободно за патријархот Давид, дека умре и беше погребан и дека неговиот гроб е при нас до денешен ден.

³⁰Но, бидејќи беше пророк и зашто знаеше дека Бог му вети со заклетва, дека од родот на неговите бедра ќе подигне Некого, на неговиот престол,

³¹предвидувајќи за воскресението на Христа, рече: ‘Ниту беше оставен во Подземјето, ниту телото Му се распадна.’

³²Бог Го воскресна Овој Исус, за кое ние сите сме сведоци.

³³И така подигнат со Божјата десница, Тој Го прими од Таткото ветениот Свети Дух, и го излеа ова, што го гледате и слушате.

³⁴Зашто Давид не се вознесе на небесата, но самиот рече: ‘Му рече Господ на мојот Господ: седни оддесно до Мене;

³⁵додека не ги положам Твоите непријатели како подножје на Твоите нозе!’

³⁶И така, нека сиот Израелев дом знае веродостојно дека Бог Го направи Господ и Христос, Овој Исус, Кого вие Го распнавте!”

³⁷А кога го чуја тоа, ги засегна во срцето и му рекоа на Петра, и на другите апостоли: „Мажи, браќа, што да правиме?”

³⁸А Петар им рече: „Покајте се! И секој од вас нека се крсти во името на Исуса Христа за проштавање на вашите гревови; и ќе примите дар од Светиот Дух.

³⁹Зашто, ова ветување е за вас, и за вашите деца, и за сите далечни, колку што ќе ги повика Господ, нашиот Бог.”

⁴⁰И уште со многу други зборови сведочеше и ги опоменуваше, велејќи: „Спасете се од ова расипано поколение!”

⁴¹И така, се крстија оние, кои го прифатија неговото слово. И во тој ден се приклучија околу три илјади души.

⁴²И беа постојани во апостолското учење и општувањето; и во раскршувањето на лебот и во молитвите.

⁴³А страв влезе во секоја душа, зашто апостолите правеа многу чудеса и знаци.

⁴⁴А сите кои поверуваа беа заедно и сè им беше општо.

⁴⁵И продаваа стоки и имоти и тоа го делеа на сите, секому според неговата потреба.

⁴⁶И секој ден беа постојано и еднодушно во Храмот; раскршуваа леб по домовите и примаа храна со радост и просто срце,

⁴⁷фалејќи Го Бога беа омилени кај сиот народ. А секој ден, Господ ги додаваше оние, кои се спасуваа.