Read Библија, Константинов Дела Ап. 24 Bible Online

Дела Ап. 24 - Библија, Константинов bible

Дела Ап. 24

¹А по пет дена првосвештеникот Ананиј слезе со неколку старешини и со некој си говорник Тертил, и истапија пред управителот против Павла.

²И кога го повикаа, Тертил почна да го обвинува, велејќи:

³”Голем мир уживаме благодарејќи тебе и со твојата грижливост многу нешта се поправија во народов; тоа, ние, честити Феликсе, со секаква благодарност го признаваме на секој начин и на секое место;

⁴но, за да не те задржувам повеќе, те молам да нè ислушаш накратко со твојата благост.

⁵Еве, најдовме дека овој човек е зараза, дека предизвикува препирки меѓу сите Јудејци по целиот свет и дека е водач на назарејската секта.

⁶И се обиде да го оскверни и Храмот, и ние го фативме и сакавме да му судиме според нашиот Закон,

⁷но дојде заповедникот Лисиј, со голема сила, и го грабна од нашите раце,

⁸и заповеда неговите обвинители да дојдат при тебе. Ако го испиташ самиот, ќе можеш да узнаеш од него, сè за што ние го обвинуваме.”

⁹А Јудејците потврдија дека е така.

¹⁰А кога управителот му даде знак да зборува, Павле одговори: „Бидејќи знам дека многу години си му судија на народов, јас, на драго срце, ќе зборувам во своја одбрана.

¹¹Ти самиот можеш да дознаеш дека нема повеќе од дванаесет дена, откако отидов горе во Ерусалим, на поклонение,

¹²и не ме најдоа ни во Храмот, ни во синагогите, ниту во градот да са расправам со некого или да го бунам народот,

¹³а не можат ни тебе да ти го докажат она заради што ме обвинуваат сега.

¹⁴Но тебе ти признавам: дека според Патот, кого тие го наречуваат ерес, така Му служам на Бога на нашите татковци, верувајќи во сè што е напишано во Законот и Пророците,

¹⁵и дека се надевам во Бога, како и овие сами, дека ќе има воскресение на праведните и неправедните.

¹⁶Затоа и самиот се трудам секогаш да имам чиста совест и пред Бога и пред луѓето.

¹⁷По многу години дојдов да му донесам милостина на својот народ и да принесам жртви,

¹⁸при што ме најдоа, очистен во Храмот, не со народ и не со врева. И некои Јудејци од Азија,

¹⁹кои требаа да излезат пред тебе и да ме обвинат, ако имаа нешто против мене.

²⁰Или овие сами нека кажат каква неправда најдоа на мене, кога стоев пред Синедрионот,

²¹освен ако се работи за овој еден збор што го реков гласно, стоејќи меѓу нив: ‘заради воскресението на мртвите ме судите денес!’”

²²Тогаш Феликс, кој доста добро го познаваше тој Пат, го одложи нивното дело, велејќи: „Кога ќе дојде илјадникот Лисиј, ќе го решам вашето дело.”

²³А на стотникот му заповеда да го чуваат; но да му даваат извесна слобода и да не му бранат никому од неговите да му служат.

²⁴А по неколку денови дојде Феликс со својата жена Друзила, која беше Јудејка, го повика Павла и ги слушаше неговите зборови за верата во Исуса Христа.

²⁵А кога зборуваше за праведноста, за воздржувањето и за идниот суд, Феликс се уплаши и одговори: „Сега оди си! И кога ќе најдам време, пак ќе те повикам.”

²⁶Меѓутоа се надеваше дека Павле ќе му даде сребреници; затоа почесто го повикуваше и разговараше со него.

²⁷А кога се наполнија две години, Порциј Фест го наследи Феликса; сакајќи да им угоди на Јудејците, Феликс го остави Павла во окови.