Read Библија, Константинов Дела Ап. 3 Bible Online

Дела Ап. 3 - Библија, Константинов bible

Дела Ап. 3

¹Петар и Јован одеа во Храмот во деветтиот молитвен час,

²тогаш носеа еден човек, хром од раѓање. Него го поставуваа секој ден пред храмската врата, наречена Красна, за да проси милостина од оние, кои влегуваа во Храмот.

³Штом ги виде тој Петар и Јован, кога сакаа да влезат во Храмот, запроси да му дадат милостина.

⁴А Петар, заедно со Јован, се вгледа во него и му рече: „Погледај нè!”

⁵Меѓутоа тој внимаваше на нив, чекајќи само да добие нешто од нив.

⁶Но Петар му рече: „Немам ни сребро ни злато, но што имам, тоа ти давам: во името на Исуса Христа Назареецот стани и оди!”

⁷Тогаш го фати за десната рака и го исправи, а нему веднаш му зацврснаа стапалата и глуждовите, па

⁸скокна, се исправи и прооди; и со нив влезе во Храмот, скокајќи и фалејќи Го Бога.

⁹Така целиот народ го виде како оди и Го фали Бога.

¹⁰И го препознаа дека е тоа оној, кој седеше пред Красната Врата на Храмот поради милостина, и се исполнија со восхит и беа вон себе заради она, што му се случи.

¹¹А бидејќи тој се држеше за Петар и Јован, сиот зачуден народ се собра околу нив во тремот наречен Соломонов.

¹²А кога Петар го виде тоа, му проговори на народот: „Мажи Израелци, зошто се чудите на ова или зошто гледате на нас, како ние со своја сила или побожност направивме овој да оди?

¹³Бог Авраамов, Исаков и Јаковов, Бог на нашите татковци, Го прослави Својот Син Исуса, Кого вие Го предадовте и од Кого се одрековте пред Пилата, кога тој одлучи да Го ослободи.

¹⁴Вие се одрековте од Светецот и Праведникот, и молевте да ви се подари еден убиец,

¹⁵а Го убивте Зачетникот на животот, Кого Бог Го воскресна од мртвите, за што сме ние сведоци.

¹⁶И затоа што веруваме во Неговото име, - Неговото име го зацврсти овој, кого го гледате и познавате. А верата до која доаѓаме преку Него, му даде целосно здравје пред сите вас.

¹⁷И сега браќа, знам дека вие како и вашите началници, го направивте тоа од незнаење.

¹⁸Но, Бог на тој начин го исполни тоа, што го навестуваше однапред, преку устата на сите пророци: дека Неговиот Христос ќе пострада.

¹⁹Затоа, покајте се и обратете се, за да ви бидат избришани гревовите, за да дојдат, од лицето на Господа времиња на освежување,

²⁰и да Го испрати Претскажаниот за вас Исуса Христа,

²¹Кого небото треба да Го прими до времето, кога ќе биде воспоставено сè, за кое Бог зборуваше од древноста преку устата на Своите свети пророци.

²²Зашто Мојсеј рекол: „Господ Бог ќе ви издигне од вашите браќа Пророк - како мене, слушајте Го Него во сè што ќе ви рече!

²³А секоја душа, која не ќе Го послуша тој Пророк, ќе биде истребена од народот.”

²⁴А и сите пророци од Самоила и натаму - колку што зборуваа - ги навестуваа овие денови.

²⁵Вие сте синови на пророците и на Заветот, што Бог го склучи со вашите татковци, кога му рече на Авраама: ‘Во твоето Семе ќе бидат благословени сите племиња на земјата.’

²⁶Бог првин вам ви Го воскресна Својот Слуга Исуса и ви Го испрати за да ве благослови, со тоа што секого од вас ќе го одврати од вашите зли дела.”