Read Библија, Константинов Римјаните 11 Bible Online

Римјаните 11 - Библија, Константинов bible

Римјаните 11

¹И така, прашувам: „Дали Бог го отфрли Својот народ? Далеку од тоа! Зашто и јас сум Израелец, од Авраамовото потомство, од Венијаминовото племе.

²Бог не го отфрли Својот народ, кого го знаеше однапред. Или не знаете што вели Писмото, за Илија, како вика кон Бога против Израел, велејќи:

³”Господи, ги погубија Твоите пророци, ги разурнаа Твоите жртвеници; а јас останав сам, па и мојот живот го бараат.”

⁴А што му вели Божјиот одговор: „Си оставив за себе седум илјади луѓе, кои не ги преклонија колената пред Ваала.”

⁵Така е и во сегашното време, остана еден Остаток избран по благодатта.

⁶Но, ако е по благодат, тогаш не е по дела; зашто инаку благодатта не би била веќе благодат.

⁷Тогаш што? Израел не го доби она, што го бараше, а избраните го добија; а другите беа закоравени,

⁸како што е напишано: „Бог им даде дух на мртвило, очи да не гледаат и уши да не слушаат до денешниот ден.”

⁹И Давид зборува: „Нивната трпеза да им биде стапица, и мрежа и соблазан и одмазда!

¹⁰Очите нека им се помрачат, за да не гледаат! А плеќите свиткај им ги засекогаш!”

¹¹И така прашувам: да не се сопнаа, за да паднат сосем? Да не биде! Туку преку нивното сопнување им дојде спасение на народите, за да ги поттикнат на ревност.

¹²Ако нивното сопнување значи богатство за светот, а нивното отпаѓање богатство за народите, колку повеќе ќе биде нивната полнота!

¹³Но ви зборувам вам, народи; бидејќи сум апостол на народите, јас ја прославувам мојата служба,

¹⁴та на некој начин да го поттикнам на ревност својот род и да спасам некои од нив.

¹⁵Зашто, ако нивното отфрлање е помирување за светот, какво ли ќе биде нивното примање, ако не живот од мртвите?

¹⁶Ако се свети првите плодови - и тестото е; ако е коренот свет - и гранките се.

¹⁷Ако се откршени некои гранки, и ти, кој си дива маслинка, си накалемен меѓу нив и си станал соучесник во сочниот корен на маслинката,

¹⁸не фали се пред гранките! Ако се фалиш, знај дека ти не го носиш коренот, туку коренот - тебе!

¹⁹Но ќе речеш: „Гранките се откршени, за да бидам јас прикалемен!”

²⁰Добро! Поради неверието се откршија, а ти стоиш преку верата.

²¹Не гордеј се, туку бој се! Зашто, ако Бог не ги поштеди природните гранки, не ќе те поштеди ни тебе.

²²И така, гледај ги Божјата благодат и строгост: строгоста се пројавува кон паднатите, а Божјата благодат кон тебе, ако истраеш во благодатта - зашто инаку и ти ќе бидеш отсечен.

²³А и тие, ако не останат во неверието, ќе бидат прикалемени, зашто Бог може пак да ги прикалеми.

²⁴Зашто, ако си ти отсечен од природната дива маслинка и, против природата - си прикалемен на питомата маслинка, колку полесно ќе бидат прикалемени врз сопствената маслинка оние, кои и се природни.

²⁵Не сакам, браќа, да ви остане непозната оваа тајна, за да не мудрувате по своја мудрост: еден дел на Израел закораве, додека народите не влезат во полн број.

²⁶И така, целиот Израел ќе се спаси, како што е напишано: „Избавителот ќе дојде од Сион; ќе ја одврати безбожноста од Јакова.

²⁷И ова им е Завет од Мене кон нив, кога ќе им ги отстранам гревовите.”

²⁸Со оглед на Евангелието, тие се непријатели заради вас, но по изборот возљубени се, заради татковците.

²⁹Зашто Божјите дарови и Неговиот позив не го познаваат каењето.

³⁰Како што и вие му бевте некогаш непокорни на Бога, а сега добивте милост поради нивното непокорство,

³¹така и тие станаа сега непокорни, заради вашето помилување, за да бидат и тие помилувани.

³²Зашто Бог ги затвори сите во непокорство, за да покаже милост кон сите.

³³О длабочино на богатството, премудроста и Божјото знаење! Колку се недостижни Неговите судови и неиспитливи Неговите патишта!

³⁴Зашто кој ја запознал Господовата мисла? Или кој Му бил советник?

³⁵Или кој Му дал нешто однапред, за да му биде вратено?”

³⁶Зашто сè е од Него, преку Него и за Него. Нему слава во векови. Амин!