Read Библија, Константинов Римјаните 12 Bible Online

Римјаните 12 - Библија, Константинов bible

Римјаните 12

¹Затоа ве молам, браќа, заради Божјата милост, да ги принесете вашите тела во жива, света и угодна жртва на Бога, тоа да биде ваша разумна служба.

²Немојте да се прилагодувате со овој свет; туку, преобразувајте се преку обновувањето на вашиот ум, за да можете да ја дознаете која е добрата, угодна, и совршена Божја волја!

³Зашто, преку благодатта што ми е дадена, му велам на секој еден помеѓу вас: да не мисли за себе повеќе отколку што треба да мисли - туку мислите нека ви бидат насочени кон разумно размислување, според мерата на верата, која Бог му ја доделил секому.

⁴Зашто, како што во едно тело имаме многу членови, а сите членови немаат иста служба,

⁵така и ние, мнозината, сме едно тело во Христа, а како поединци - членови сме еден на друг.

⁶И имаме разни дарби, според дадената ни благодат: ако е пророштво, нека е согласно со верата!

⁷Ако е служење нека служи! Ако е некој учител - нека поучува!

⁸Кој има дар за утеха - нека утешува! Кој раздава, нека дава богато! Кој управува, нека биде ревносен! Кој покажува милост, нека го прави тоа весело!

⁹Љубовта нека ви биде нелицемерна! Отстранувајте се од злото, прилепувајте се кон доброто!

¹⁰Љубете се еден друг срдечно со братска љубов! Натпреварувајте се во почитување еден кон друг!

¹¹Бидете неуморни во ревноста! Бидете пламени во духот! Служете Му на Господа.

¹²Радувајте се во надежта, бидете трпеливи во неволја; постојани во молитва!

¹³Помагајте им на светите во нивните потреби! Ревнувајте во гостољубие!

¹⁴Благословувајте ги оние, кои ве гонат: благословувајте ги, а не проколнувајте ги!

¹⁵Радувајте се со оние, кои се радуваат и плачете со оние, кои плачат!

¹⁶Бидете едномислени едни кон други! Не стремете се кон високи нешта, туку држете се за скромните! Не сметајте се сами себеси мудри!

¹⁷Никому не враќајте зло за зло! А размислувајте за тоа што е добро пред сите луѓе!

¹⁸Ако е можно, доколку зависи од вас, бидете во мир со сите луѓе!

¹⁹Не одмаздувајте се за себе, возљубени; туку дајте му место на Божјиот гнев, зашто е напишано: „Одмаздата е Моја, Јас ќе ја отплатам! - говори Господ.”

²⁰Туку, ако твојот непријател е гладен, нахрани го; ако е жеден - напој го! Зашто, ако го правиш тоа, ќе натрупаш жар на неговата глава.”

²¹Не оставај да те победи злото; туку победи го злото со добро!