Read Библија, Константинов Римјаните 13 Bible Online

Римјаните 13 - Библија, Константинов bible

Римјаните 13

¹Секоја душа да им се покорува на претпоставените власти, зашто нема власт, а да не е од Бога; и колку и да се властите, од Бога се поставени.

²Затоа оној, кој и се противи на власта, и се противи на Божјата наредба; а кои и се противат, ќе ја примат својата осуда.

³Зашто владетелите не се страв за добро дело, туку за зло. Сакаш ли пак да не се боиш од власта, прави добро, па ќе бидеш пофален од неа.

⁴Таа Му служи на Бога за твое добро. Но, ако правиш зло, бој се; зашто не носи напразно меч. Таа е во служба на Бога, гневен одмаздник за оној, кој прави зло.

⁵Затоа треба да и се покорувате, не само поради гневот, туку и заради совеста.

⁶Затоа плаќате и даноци, зашто се Божји службеници, кои се занимаваат со тоа.

⁷Дајте му секому она што сте му должни: кому данок - данок; кому царина - царина; кому страв - страв; кому чест - чест!

⁸Не должете му никому ништо, освен да се љубите еден друг, зашто кој го љуби другиот, го исполнува Законот.

⁹Зашто заповедите: „Не прави прељуба! Не убивај! Не кради! Не посакувај!” - и ако има уште некоја друга заповед - содржани се во овие зборови: „Љуби го својот ближен како себеси!”

¹⁰Љубовта не му прави зло на ближниот. И така: љубовта е исполнување на Законот.

¹¹И правете го тоа затоа што го знаете времето во кое сме, зашто е веќе време да се разбудите од сонот; зашто сега спасението ни е поблизу, отколку кога поверувавме.

¹²Ноќта помина, а денот наближи. Затоа да ги офрлиме делата на темнината, а да се облечеме во оружјето на светлината!

¹³Да одиме пристојно како дење, не во гозби и пијанки, не во блуд и страстољубие, не во препирки и зависти,

¹⁴туку облечете се во нашиот Господ Исус Христос, и не мислете како да ги задоволите похотите на телото.