Read Библија, Константинов Римјаните 14 Bible Online

Римјаните 14 - Библија, Константинов bible

Римјаните 14

¹Примајте го слабиот во верата, не со препирки за мислењата!

²Еден верува дека смее да јаде сè; а кој е слаб, јаде само зеленчук.

³Кој јаде, нека не го презира оној, што не јаде; а оној, кој не јаде, нека не го осудува оној, што јаде, зашто Бог го примил.

⁴Кој си ти, за да му судиш на туѓ слуга? Тој стои или паѓа пред својот господар; а ќе стои, зашто Господ е силен да го постави да стои.

⁵Еден разликува ден од ден, а друг ги смета сите денови еднакви. Само секој да биде наполно уверен во своето мнение!

⁶Кој го пази денот, го пази за Господа; кој јаде, јаде за Господа, зашто Му благодари на Бога; и кој не јаде, за Господа не јаде, и тој Му благодари на Бога.

⁷Никој од нас не живее за себеси и никој не умира за себеси,

⁸зашто ако живееме, живееме за Господа; ако умираме - умираме за Господа. Затоа: живееме ли, умираме ли, Господови сме,

⁹зашто Христос затоа умре и оживе, - за да господари и над мртвите и над живите.

¹⁰А ти, зошто го осудуваш својот брат? Или ти, зошто го презираш својот брат? Зашто, сите ќе застанеме пред Христовиот судски престол,

¹¹зашто е напишано: „Јас Сум жив - вели Господ - Мене ќе Ми се поклони секое колено; и секој јазик ќе Го исповеда Бога.”

¹²И така, секој од нас ќе одговара пред Бога за себе.

¹³Затоа, да не се осудуваме веќе еден друг, туку подобро да мислиме за тоа: никој да не поставува пред братот сопки или соблазни!

¹⁴Знам, и уверен сум во Господа Исуса, дека ништо не е нечисто само по себе, туку само за оној, кој смета дека нешто е нечисто - нему му е нечисто.

¹⁵Зашто, ако се жалости твојот брат заради јадење, ти веќе не постапуваш според љубовта. Не погубувај го со твоето јадење оној, за кого Христос умрел.

¹⁶И така, не дозволувајте да се хули на вашето добро!

¹⁷Зашто Божјото Царство не се состои во јадење и пиење, туку во правда, и мир и радост во Светиот Дух.

¹⁸Имено, кој со ова Му служи на Христа, угоден Му е на Бога и мил им е на луѓето.

¹⁹И така, да го бараме она, што е за мир и за заемна надградба!

²⁰Не разурнувај го Божјото дело - заради јадење! Сè е чисто; но е зло за човекот, кој јаде на соблазан.

²¹Добро е да не се јаде месо, ниту да се пие вино, ни да се прави нешто, поради што твојот брат се сопнува или соблазнува, или слабее.

²²Имаш ли вера? Имај си ја за себе пред Бога! Блажен е оној, кој не се осудува себеси за она, што го смета за добро.

²³А кој се сомнева кога јаде, се осудува, зашто не е од вера; а сè што не е од вера, грев е.