Read Библија, Константинов Римјаните 15 Bible Online

Римјаните 15 - Библија, Константинов bible

Римјаните 15

¹Ние силните должни сме да ги носиме слабостите на слабите, а да не си угодуваме сами на себеси.

²Секој од нас нека му угодува на ближниот, во негова полза, за добро,

³зашто ни Христос не Си угодуваше Сам на Себеси, туку како што е напишано: „Хулите на оние, кои Те хулеа, паднаа на Мене.”

⁴Навистина, сè што е напишано некогаш, напишано ни е нам за поука, за да имаме надеж преку трпението и преку утехата од Писмата.

⁵И Бог на трпението и утехата да ви даде едномислие меѓу вас по примерот на Исуса Христа,

⁶за да Го славите, еднодушно, со една уста, Бог, Таткото на нашиот Господ Исус Христос.

⁷Затоа примајте се еден со друг, како што и Христос ве прими за Божјата слава!

⁸Зашто велам, дека Христос им послужи на обрезаните поради Божјата вистина, за да ги потврди ветувањата дадени на татковците;

⁹а пак народите Го прославуваат Бога поради Неговото милосрдие, како што е напишано: „Затоа ќе Те исповедам меѓу народите и ќе Му пеам на Твоето име.”

¹⁰И пак рече:” Веселете се, народи, со Неговиот народ!”

¹¹И пак: „Фалете Го Господа сите народи и да Го слават сите племиња!”

¹²И пак Исаија вели: „Ќе се јави подник од Јесеевиот корен, и Оној Кој станува за да владее над народите; на Него ќе се надеваат народите!”

¹³А Бог на надежта да ве исполни со сета радост и мир во верата, та преку силата на Светиот Дух да ви се збогати надежта.

¹⁴И јас самиот, браќа мои, сум уверен за вас, дека сте и самите полни со доброта, исполнети со секакво знаење и дека можете да се поучувате еден со друг.

¹⁵Но, делумно ви пишав малку послободно, за да ве потсетам на благодатта, која ми ја даде Бог,

¹⁶за да Му бидам служител на Исуса Христа меѓу народите, кој врши света служба на Божјото Евангелие, и да биде мојот принос од народите пријатен, и осветен преку Светиот Дух.

¹⁷И така, можам да се фалам во Христа Исуса за тоа, за Бога,

¹⁸зашто не се осмелувам да кажам нешто што Христос не го извршил преку мене, за да ги доведам народите до послушност, со слово и дело,

¹⁹во силата на знаци и чудеса, во силата на Божјиот Дух. Така што од Ерусалим и наоколу, сè до Илирик, наполно го проповедав Евангелието за Христа.

²⁰Но, при тоа сметав за чест да не го проповедам Евангелието таму, каде што Христовото име веќе беше познато, за да не ѕидам врз туѓи основи,

²¹туку како што е напишано: „Ќе Го видат оние, на кои ништо не им беше навестено за Него, и ќе разберат оние, кои не чуле.”

²²Тоа ме спречи многупати да дојдам при вас.

²³Но сега, зашто веќе немам поле за работа во овие краишта и зашто копнеам веќе многу години да дојдам при вас,

²⁴кога ќе тргнам за Шпанија; имено, се надевам дека ќе ве видам на минување и дека вие ќе ме испратите натаму, откако најнапред ќе се наситам донекаде со вас.

²⁵А сега одам за Ерусалим, за да им послужам на светите,

²⁶зашто Македонија и Ахаја одлучија да соберат некаква заедничка помош за бедните меѓу светите во Ерусалим.

²⁷Навистина, го одлучија тоа, а и должни им се, зашто, ако народите станаа соучесници на нивните духовни блага, должни се да им послужат во телесните потреби.

²⁸Кога ќе го свршам ова и кога ќе им го доставам овој плод, ќе тргнам за Шпанија преку вас.

²⁹И знам, кога ќе дојдам при вас, дека ќе дојдам со полн Христов благослов.

³⁰Покрај тоа, ве молам, браќа, преку нашиот Господ Исус Христос и преку љубовта на Духот, да се борите со мене, молејќи Му се на Бога за мене,

³¹за да се избавам од непокорните во Јудеја и за да им биде благопријатна мојата служба на светите во Ерусалим,

³²та да можам, по Божја волја, радосно да дојдам при вас и да се освежам заедно со вас.

³³А Бог на мирот да биде со сите вас, Амин!