Read Библија, Константинов Римјаните 6 Bible Online

Римјаните 6 - Библија, Константинов bible

Римјаните 6

¹И така, што ќе речеме? Да останеме ли и натаму во гревот, за да се умножи благодатта?

²Далеку од тоа! Ние, кои умревме за гревот, како ќе живееме уште во него?

³Или зар не знаете дека сите ние, кои сме крстени во Исуса Христа, крстени сме во Неговата смрт?

⁴И така, преку крштавањето во смртта, погребани сме заедно со Него, - та како што Христос воскресна од мртвите преку славата на Таткото, - така и ние да одиме во нов живот.

⁵Зашто ако сме соединети со Него во смртта слична на Неговата, ќе бидеме и во воскресението слично на Неговото.

⁶Тоа го знаеме: нашиот стар човек е распнат заедно со Него, за да биде уништено телото на гревот, па да не му робуваме веќе на гревот,

⁷зашто тој кој умрел, е оправдан од гревот.

⁸А ако умревме со Христа, веруваме дека и ќе живееме со Него,

⁹зашто знаеме дека Христос, Кој воскресна од мртвите, веќе не умира: смртта нема веќе власт над Него.

¹⁰Зашто, ако умрел - умрел за гревот еднаш засекогаш, а што живее - живее за Бога.

¹¹Така и вие сметајте се себеси мртви за гревот, но живи за Бога во Исуса Христа нашиот Господ!

¹²И така, нека не царува гревот во вашето смртно тело, па да ги слушате неговите страсни желби!

¹³И не давајте му ги вашите членови на гревот за оружје на неправдата, туку предавајте Му се сами себеси на Бога, како оживени од мртвите, а вашите членови на Бога за оружје на правдата!

¹⁴Имено, гревот не ќе има веќе власт над вас, зашто не сте под Законот, туку под благодатта.

¹⁵Па што? Да грешиме ли, зашто не сме под Законот, а под благодатта? Да не биде!

¹⁶Не знаете ли: ако некому му се предадете за робови во послушност - робови сте му на оној, кому му се покорувате: или на гревот - за смрт; или на послушноста - за праведност?

¹⁷Но благодарејќи Му на Бога, зашто вие, откако му бевте робови на гревот, му станавте послушни од сè срце на примерот на науката, на која и бевте предадени

¹⁸па така, ослободени од гревот, станавте слуги на правдата.

¹⁹Зборувам по човечки заради слабоста на вашето тело: како што некогаш ги предадовте вашите членови да им служат на нечистотата и на беззаконието, за беззаконство; така сега предадете ги вашите членови да и служат на правдата, за осветување!

²⁰Зашто, кога бевте робови на гревот, бевте слободни од правдата.

²¹А каков плод имавте тогаш, од оние работи, заради кои се срамите денес, зашто нивниот крај е смртта?!

²²Но сега, откако сте ослободени од гревот и откако се поставивте во служба на Бога - го имате вашиот плод - осветувањето; а вечниот живот - за крај,

²³зашто смртта е плата за грев, но благодатниот Божји дар е - вечен живот во Христа Исуса, нашиот Господ.