Read Библија, Константинов Римјаните 8 Bible Online

Римјаните 8 - Библија, Константинов bible

Римјаните 8

¹И така, сега нема осудување за оние, кои се во Христа Исуса, и одат не по телото, а по Духот.

²Зашто законот на Духот на животот во Христа Исуса ме ослободи од законот на гревот и смртта.

³Зашто тоа, што му беше невозможно на Законот, зашто беше слаб заради телото, Бог го изврши: испраќајќи Го - заради гревот - Својот Син во обличје слично на грешното тело и, поради грев, го осуди гревот во телото,

⁴па, праведноста, што Законот ја бара, да се исполни во нас, - кои не одиме по телото, туку по Духот.

⁵Зашто, кои се по телото, мислат за телото, додека оние, по Духот, мислат за нештата на Духот.

⁶Бидејќи мудрувањето на телото, е смрт; а мудрувањето на Духот: живот и мир;

⁷зашто мудрувањето на телото е непријателство против Бога, бидејќи не му се покорува на Божјиот Закон, ниту пак може.

⁸Оние, кои се во телото, не можат да Му угодат на Бога.

⁹Но вие не сте во телото, туку во Духот, ако Божјиот Дух навистина живее во вас. Но, ако некој Го нема Христовиот Дух, не е Негов.

¹⁰А ако е Христос во вас, тогаш телото е мртво заради гревот, а духот е жив заради правдата.

¹¹Ако навистина во вас живее Духот на Оној, Кој Го воскресна Исуса од мртвите; Оној Кој Го воскресна Христа, ќе ги оживи и вашите смртни тела преку Својот Дух, Кој живее во вас.

¹²Според тоа, браќа, не сме му должници на телото, за да живееме по телото.

¹³Зашто, ако живеете по телото, ќе умрете; но ако преку Духот ги умртвувате телесните дејства - ќе живеете.

¹⁴Сите оние, кои ги води Божјиот Дух - тие се Божји синови.

¹⁵Имено, не го примивте духот на ропството, за да бидете пак во страв, туку го примивте Духот на посинувањето, со кој викаме: „Ава - Татко!”

¹⁶Самиот Дух сведочи заедно со нашиот дух дека сме Божји чеда.

¹⁷Ако сме чеда, тогаш сме и наследници: Божји наследници, а Христови сонаследници - ако страдаме со Него, со Него и да се прославиме.

¹⁸Зашто сметам дека страдањата на сегашното време не се ништо во споредба со славата, која ќе ни се открие нам.

¹⁹Зашто сето создание со нетрпелив копнеж го очекува откривањето на Божјите синови -

²⁰имено, созданието и беше потчинето на суетата, не доброволно, туку од оној, кој го потчини - во надеж

²¹дека и самото создание ќе биде ослободено од ропството на распаѓањето; во слобода на славата на Божјите деца.

²²Имено, знаеме дека целото создание заедно воздивнува и страда во родилни маки досега.

²³И не само тоа, туку и ние, кои го имаме Духот како прв дар; ние самите воздивнуваме во себе чекајќи го посинувањето: откупувањето на нашето тело.

²⁴Зашто, во оваа надеж ние се спасивме. А надежта која се гледа не е надеж; зашто, кога некој нешто гледа, зошто да му се надева?

²⁵Но ако се надеваме на она што не го гледаме, тогаш го чекаме со трпение.

²⁶Исто така и Духот и помага на нашата слабост, зашто ние не знаеме за што да се молиме, како што треба: но Самиот Дух посредува за нас со неискажливи воздишки.

²⁷А Оној, Кој ги испитува срцата, знае какво е значењето на Духот, зашто по Божјата волја се моли за светите.

²⁸Но знаеме дека сите работи содејствуваат за добро на оние, кои Го љубат Бога, кои се повикани по Неговата намера;

²⁹зашто оние кои ги познаваше однапред, нив и ги предопредели да се преобразат според ликот на Неговиот Син, за Тој да биде Првороденец меѓу многуте браќа.

³⁰А оние кои ги предопредели, тие и ги повика; кои ги повика, тие и ги оправда; кои ги оправда, тие и ги прослави.

³¹И така, што да речеме на ова? Ако е Бог за нас, кој ќе биде против нас?

³²Оној, Кој не Го поштеди ни сопствениот Син, туку Го предаде за сите нас, како не ќе ни подари сè друго со Него?

³³Кој ќе ги обвини Божјите избраници? Бог ли, Кој ги оправдува?

³⁴Кој е оној кој ќе ги осуди? Христос Исус ли, Кој умре - но уште и воскресна - Кој е од десната страна на Бога и Кој се застапува за нас?

³⁵Кој ќе нè одвои од Христовата љубов? Неволјата ли, или притеснувањето, или гонењето, или гладот, или голотата, или гибелта или мечот?

³⁶Како што е напишано: „Заради Тебе нè убиваат постојано, нè сметаат како овци за клање.”

³⁷Но во сè ова победуваме надмоќно преку Оној, Кој нè возљуби.

³⁸Зашто сум уверен дека ни смртта, ни животот, ни ангелите, ни властите, ни сегашноста, ни иднината, ни силите,

³⁹ни височината, ни длабочината, ниту некое друго создание, ќе може да нè оддели од Божјата љубов, која е во Христа Исуса, нашиот Господ.