Read Библија, Константинов 1 Коринќаните 1 Bible Online

1 Коринќаните 1 - Библија, Константинов bible

1 Коринќаните 1

¹Павле, преку Божјата волја повикан апостол на Исуса Христа, и братот Состен,

²до Божјата црква која е во Коринт, до осветените во Исуса Христа, до повиканите свети, со сите кои го призовуваат на секое место името на нашиот Господ Исус Христос, Кој е нивни и наш;

³благодат ви вам и мир од Бога, нашиот Татко, и од Господа Исуса Христа.

⁴Секогаш Му благодарам на својот Бог за вас, за Божјата благодат што ви е дадена во Христа Исуса,

⁵и зашто во Него се обогативте во сè, во секое слово и во секое знаење,

⁶како што Христовото сведоштво се зацврстило меѓу вас,

⁷така да не сте во недостаток од ниеден дар, чекајќи го откровението на нашиот Господ Исус Христос;

⁸Кој ќе ве утврдува и до крај, за да бидете беспрекорни во Денот на нашиот Господ Исус Христос.

⁹Верен е Бог, преку Кого сте повикани во заедништво со Неговиот Син, Исус Христос, нашиот Господ.

¹⁰Браќа, ве прекорувам во името на нашиот Господ Исус Христос, сите да зборувате исто и да нема раздори меѓу вас, туку да бидете совршено соединети во еден ум и во една мисла.

¹¹Имено, ми јавија, браќа мои, Хлоините домашни дека меѓу вас има препирки.

¹²Со ова сакам да кажам, дека секој од вас зборува: ‘Јас сум Павлов’, ‘Јас сум Аполосов’, ‘Јас пак Кифин’, а ‘Јас Христов’,

¹³Дали Христос се раздели? Павле ли беше распнат за вас? Или сте крстени во Павлово име?

¹⁴Му благодарам на Бога, што никого од вас не крстив, освен Криспа и Гаја,

¹⁵за да не рече некој, дека сте крстени во мое име.

¹⁶Го крстив уште Стефановиот дом; натаму не знам дали сум крстил некој друг.

¹⁷Зашто Христос не ме испрати да крштавам, туку да го проповедам Евангелието, и не со говорничка мудрост - за да не го изгуби Христовиот крст своето значење.

¹⁸Зашто, словото за крстот е безумство за оние, кои пропаѓаат, а за нас, кои се спасуваме, Божја сила,

¹⁹зашто е напишано: „Ќе ја уништам мудроста на мудрите и ќе го отфрлам разумот на умните.”

²⁰Каде е мудриот? Каде е книжевникот? Каде е истражувачот на овој век? Не ја претвори ли Бог мудроста на светов во безумие.

²¹Зашто светот со својата мудрост не Го позна Бога во Божјата мудрост, Бог благоволи да ги спаси оние, кои веруваат, преку безумството на проповедувањето.

²²И додека Јудејците сакаат знаци, а Грците бараат мудрост,

²³ние Го проповедаме распнатиот Христос, соблазан за Јудејците, безумство за Грците,

²⁴а за самите повикани - и Јудејци и Грци, Христос, Божја сила и Божја мудрост,

²⁵зашто безумното од Бога, помудро е од луѓето; и слабото од Бога, посилно е од луѓето.

²⁶Гледајте го, браќа, само своето повикување! Нема тука многу мудри по човечко сфаќање, нема многу силни, ниту многу од благороден род.

²⁷Туку, Бог го избра она што е безумно пред светот, за да ги посрами мудрите; што е слабо пред светот, Бог го избра, за да ги посрами силните;

²⁸и што е неблагородно и што е презрено во светот - и она што се смета за ништо - Бог го избра, за да го уништи она што е нешто,

²⁹за да не може ниедно тело да се пофали пред Бога.

³⁰Од Него сте и вие во Христа Исуса, Кој ни стана мудрост од Бога, праведност, и осветување, и искупување,

³¹за да биде како што е напишано: „Кој се фали, во Господа да се фали!”