Read Библија, Константинов 1 Коринќаните 10 Bible Online

1 Коринќаните 10 - Библија, Константинов bible

1 Коринќаните 10

¹Не сакам да ви остане непознато, браќа, дека сите наши татковци беа под облакот и сите минаа низ морето;

²и сите се крстија во Мојсеја, во облакот и во морето;

³и сите јадеа иста духовна храна;

⁴и сите пиеја иста духовна напивка; зашто пиеја од духовната Стена, која ги следеше, а таа Стена беше Христос.

⁵Но Бог не најде благоволение во нив, и беа погубени во пустината.

⁶А тие нешта станаа примери за нас, за да немаме зли желби, како што ги имаа тие.

⁷И не бидете идолопоклоници како некои од нив, како што е пишано: „Народот седна да јаде и пие, потоа стана да игра!”

⁸Ниту блудствувајте, како што блудствуваа некои од нив, и во еден ден паднаа дваесет и три илјади!

⁹Ниту да Го искушуваме Господа, како што Го искушуваа некои од нив, и загинаа од змии.

¹⁰Ниту роптајте, како што роптаа некои од нив, и загинаа од истребителот!

¹¹А сè тоа им се случи за пример, и е напишано за поука нам, врз кои дојдоа краевите на времињата.

¹²И така, кој мисли дека стои, нека внимава да не падне!

¹³Никакво искушение не ве постигна, освен човечкото. А Бог е верен и не ќе дозволи да бидете искушувани над вашите сили, туку заедно со искушението ќе ви даде и излез, за да можете да го издржите.

¹⁴Затоа, мои возљубени, бегајте од идолопоклонството!

¹⁵Зборувам како на мудри; пресудете сами за она што ви зборувам.

¹⁶Чашата на благословот, што ја благословуваме, не е ли заедништво на Христовата крв? Лебот, што го раскршуваме, не е ли заедништво на Христовото тело?

¹⁷Затоа што лебот е еден, и ние кои сме многу, само едно тело сме, зашто сите од еден леб имаме заедница.

¹⁸Набљудувајте го земниот Израел! Оние, кои ги јадат жртвите, не се ли во заедница со жртвеникот?

¹⁹Па што сакам да речам? Дали жртвуваното на идолите е нешто; или дека идолот претставува нешто?

²⁰Не, туку дека она што народите го жртвуваат, им го жртвуваат на бесовите, а не на Бога; а јас не сакам вие да бидете во заедница со бесовите.

²¹Не можете да ја пиете Господовата чаша и бесовската чаша. Не можете да учествувате на Господовата трпеза и на бесовската трпеза.

²²Или пак да Го предизвикаме Господа на ревнување? Дали сме ние посилни од Него?

²³Сè е дозволено, но не е сè полезно. Сè е дозволено, но не е сè поучно.

²⁴Никој да не ја бара својата полза, туку ползата на другиот!

²⁵Јадете сè што се продава во месарница, не испитувајќи ништо заради совеста,

²⁶зашто „Господова е земјата и сè што ја исполнува.”

²⁷Ако некој од неверниците те повика на јадење и сакаш да отидеш, јади од сè што ќе сложат пред тебе, не испитувајќи ништо, заради совеста.

²⁸Ако некој ти рече: „Ова било принесено на жртва,” не јади заради оној, кој те известил и заради совеста.

²⁹Но не мислам на твојата совест, туку на оној другиот. А зошто мојата слобода да биде судена од туѓа совест?

³⁰Ако учествувам со благодарност, зошто да ме хулат за она за што благодарам?

³¹Според тоа, јадете ли, пиете ли, или ако правите нешто друго, правете сè за Божја слава!

³²Не бидете им соблазан на Јудејците, ни на Грците, ни на Божјата црква,

³³како што и јас им угодувам на сите во сè и не ја барам својата сопствена полза, но на многуте, за да се спасат.”