Read Библија, Константинов 1 Коринќаните 11 Bible Online

1 Коринќаните 11 - Библија, Константинов bible

1 Коринќаните 11

¹Угледајте се на мене, како и јас на Христа.

²Ве пофалувам дека ме помните за сè и дека ги држите преданијата како што ви ги предадов.

³Но сакам да знаете дека Христос е глава на секој маж, а мажот е глава на жената; а пак Бог е глава на Христа.

⁴Секој маж, кој се моли или пророкува имајќи нешто на неговата глава, ја срамоти главата.

⁵А секоја жена, која се моли или пророкува гологлава, ја срами својата глава, зашто е сосем исто како да е истригана.

⁶И така: ако жената не се покрива - нека се истриже! Но ако е срамно за жената да се стриже или да се бричи; нека се покрива!

⁷Мажот пак не треба да ја покрива главата, зашто е слика и слава Божја, а жената е слава на мажот.

⁸Зашто мажот не е од жената, туку жената од мажот;

⁹бидејќи мажот не е создаден заради жената, туку жената заради мажот.

¹⁰Затоа жената треба да има власт на главата, заради ангелите.

¹¹Но во Господа ниту мажот е без жена, ниту жената - без маж,

¹²зашто како што е жената од мажот, така е и мажот преку жената, а сè е од Бога.

¹³Пресудете сами во себе дали е прилично жената да Му се моли на Бога непокриена?

¹⁴Не ве учи ли самата природа дека е срамно за мажот да има долга коса,

¹⁵ако пак жената има долга коса, тоа е чест за неа, зашто косата и е дадена место превез.

¹⁶Но ако некој мисли да се препира ние немаме таков обичај, ниту Божјите цркви.

¹⁷Заповедувајќи ви го тоа, не можам да ве фалам, зашто вашите состаноци не се за подобро, туку за полошо.

¹⁸Зашто, прво, слушам дека, кога се собирате постојат раздори меѓу вас, и верувам нешто од тоа,

¹⁹зашто треба да има меѓу вас и разлики, за да се покажат подостојните меѓу вас.

²⁰И така, кога се собирате заедно, не е тоа за да се јаде Господовата вечера,

²¹зашто кога ќе се седне на трпезата, секој го зема своето јадење; и едниот гладува, а другиот се пијани.

²²Немате ли куќи, за да јадете и пиете? Или ја презирате Божјата црква и ги срамите оние, кои немаат? Што да ви речам? Да ве пофалам? Не ве фалам во тоа.

²³Зашто, јас го примив од Господа она, што и ви го предадов: дека Господ Исус, во онаа ноќ во која беше предаден, зеде леб,

²⁴и благодари, го раскрши и рече: „Земете, јадете, ова е Моето тело, кое се крши за вас. Правете го ова за Мој спомен!”

²⁵Исто така и чашата, по вечера, и рече: „Ова е чаша на Новиот Завет во Мојата крв. Правете го ова, секојпат кога пиете, за Мој спомен!”

²⁶Зашто, секојпат кога ќе го јадете овој леб, и ќе пиете од оваа чаша, ја навестувате Господовата смрт, додека дојде Тој.

²⁷Затоа, кој јаде од лебов или пие од оваа Господова чаша, на недостоен начин, ќе биде виновен против телото и крвта на Господа.

²⁸Но, човекот нека се испита себеси, и така да јаде од лебот и да пие од чашата,

²⁹зашто кој јаде и пие, а не Го распознава Господовото тело, јаде и пие за свое осудување.

³⁰Затоа мнозина се слаби и болни меѓу вас, а мнозина и умираат.

³¹Ако се осудуваме сами себеси, нема да ни се суди;

³²а кога Господ нè суди, нè накажува, за да не бидеме осудени со светот.

³³Затоа , браќа мои, кога се собирате да јадете, чекајте се еден со друг!

³⁴Ако е некој гладен, нека јаде дома, за да не се собирате за осудување. А другото ќе го уредам кога ќе дојдам.